صباحـ...يسعد له مساء
قصيده ارهقتها بكثر القراءات
فكل قراءه لها .. يعتريني احساس مغاير عن ماقبله
قصيده لاتنتظر ........ الا الإحتضانـ
للشاعر جابر هايف العتيبي
شاعر غير عادي .. تحفظه دفاتري كالسر
أشارككم قصيدة غير عادية .. قصيده أحبها
قصيده لا اجيد ان أقدمها فدعوها تتحدث عن نفسها
على المنصور طفل ٍ مـات متناثـر علـى الجـدران // ولاشفنا مـن أشـلاءه سـوى راس وجسـد مبتـور
فـي ليلـه داميـه أمطـر سحـاب ودمهـا هـتـان // على أرض الطفوله وأرتوى مـن هالعـذاب صـدور
قبل عشرين عام أذكر صـراخ أطفـال وصـوت أذان // وأشوف الصـوره بعينـي وهـذي قصـة المذكـور
سمعنـا شـي يتفجـر ووصلـت للسمـا النـيـران // وجينـا نركـض وشفنـا علـي متقطـّع ومنـثـور
وقفت من الذهـول وبرطمـي يرجـف وانـا بـردان // وأحس الأرض مـن تحتـي تشقـق جلدهـا وتفـور
وضميتـه وأنـا أصـرخ علـى المنصـور يالخـوان // تمـوت وحنـا متفقيـن بـأنـي قبلـكـم مقـبـور
علـي المنصـور كلمنـي وقلـي ياأخـي غلـطـان // ياخوي أنت الصغيـر ولاتجـي مـن قبلنـا بالـدور
أمانه قـوم وقـول أضحـك عليكـم خـادر ونعسـان // حرام الناس من حولـك تصيـح ويشهـق العصفـور
دخيلك قوم وخـل نلعـب ترانـي ضايـق وطفشـان // ترى صلحت سيكلنـا جديـد الحيـن ومـو مكسـور
يالله عـاد قـم غسـل علـى وجهـك بقـع دمــان // بسرعـه يالله والحقنـي وجيـب ألـوان أو طبشـور
نبي نكتب علـى الجـدران عـز "مطيـر والعتبـان // وأبرسم لك شكل جيتي وأبكتـب " يازمـن مشكـور"؟
علي .. وين الشخط مدفون هو مـع علبـة الدخـان // أمانـه قـوم بندخـن قبـل يطلـع عليـنـا الـنـور
أبـوي اليـوم معطينـي ربــع ديـنـار للـدكـان // وأخذت علوك عـن ريحـة زقايرنـا وجبـت بخـور
علـى المنصـور قـم تكفـى طلبتـك بالله الرحمـان // نبي نرجع نعيد مـن العمـر أيـام وبعـض شهـور
علي المنصور تذكـر يـوم أبـوق حمـارة الجيـران // وأروح المدرسـه فـوق الحمـاره وأدخـل الطابـور
وأنته طايح وتضحك ويضحـك " نايـف السكـران " // وأنا يلحقني الحارس وأهج أطمر مـن أقـرب سـور
علي المنصور تذكر حلمك وحلمـي أنـا وش كـان // تواعدنـا بإنـك ضابـط الشرطـه وأنـا الدكـتـور
وفعلا ً صرت أنا الدكتور " دجـه " مفلـس وفقـران // جريح الوقت " وأتسكع " بـأرض الشعـر والجمهـور
علـي ياصاحبـي بعـدك سكنـت بعالـم الأحــزان // نسيت الضحك وشلونـه فـلا ضاحـك ولا مسـرور
مع موتك رحل جابـر وباقـي منـه بعـض إنسـان // عيون وشعر وشعر أبيض وصمت وخافـق ٍ مقهـور
قبـل عشريـن عـام الحـزن جانـا وعندنـا لـلآن // سكـن فـوق الرصيـف ويلتحـف أبوابنـا والـدور
تشيب الحاره " الطرمـا " بـدون أصـوات للورعـان // ماغيـر وجيـه تعبانـه وشـارع منطـوي مهجـور
ولابـه غيـر عصفـور ٍ يجـي ويـرتـل الـقـرآن // على غصن الشجر يوقف " وأحلف " إنه علي المنصور
صباح السالم / منطقه بدولة الكويت
نايف السكران / الشاعر نايف العجمي
جيتي / سيارة تفحيط معروفه بجمهورها
علي المنصور / أحد أبناء قبيلة مطير وصديق لجابر هايف توفى " بقنبله " أثناء حرب الخليج
مواقع النشر (المفضلة)