** (( على كف القدر نمشي ولاندري عن المكتوب ))** <<< القصه الاكثر قراءه قمه في الابداع

[مشاعل الزين]

بسم الله الرحمن الرحيم

قصه اعجبتني وحبيت منتدى الزين واهل الزين يشاركوني فيها
لان بصراااحه روووووعه قليله بحقها للكاتبه المميزه: غلا الروح
بدون مقدماااات
اترك لكم الحكم عليها؟؟؟


هذي القصيدة اللي استوحت منها روايتها ..... اقروها قبل لا ابدأ

على كف القدر نمشي ولا ندري عن المكتوب
عبارة كنت أرددها صدق من صاغ معناها

مشينا دون لا ندري وشربـنا من بـلاهـا كـوب
وهـذي حال الـدنـيـا رمـتـنـا مـا رمـيـنـاهـا

تضحكنا تبكـيـنـا تـمـشـيـنـا على المـطـلوب
على كف القـدر نـمـشـي دروب ما رميناها

من الكاسب من الخاسر من الفايز من المغلوب
مع الأيام تـحـصـدنـا وحـنـا ما حصـدنـاهـا

وأنا واحد من الآلاف أعيش بعالمي مرعوب
أحس الأرض مهزوزة من أدناها لا أقصاها

نظرت الناس من حولي وكم بالناس هو منكوب
حوادث هزه الوجـدان أجـل بالعـيـن شفناها

ألا يا عـمـري الفاني ألا يا حـقـي الـمـسـلـوب
متى عـيـنـي بليل الياس لـذيـذ النوم يهـنـاها

متى يحـالفـنـي الحظ ويصحح وضعـي المـقـلـوب
يعـدل قسـوة الأيام وغلطة ما ارتـكـبـنـاهـا


مشاعل***

[مشاعل الزين]

نبدأ بشخصيات القصة :
(( القصة تتمحور حول 5 بنات زميلات وتربط بينهم علاقة صداقة عميقة لطالما قلت في هذا الزمن وبطبيعه الحال تمر كلن منهن بدرب مختلف في الحياة ))
الشخصيات :

نورة – نجد – هنوف – خلود – سارة


نوره ( بنيه جميلة بمعنى الكلمه بيضاء وطويلة وضعيفة بس مليانه شوي وشعرها اشقر لين اخر ظهرها شكلها بصراحه اقرب للاجنبيات وكل من شافها يحلف انها اجنبية ويستغرب من كونها بدوبة بس متحضرة شوي نورة اللي يعيبها العنااااد والراس اليابس و لسانها بيني وبينكم متبري منها ههههههههه )


نجد ( لاااااا هذي غير غير عن كل الشلة هي بدوية وهذا واضح من كلامها ولهجتها اللي تعتز فيها حيييييل نجد فيها الجمااااال العربي الاصيل هي مو جميلة بس هي بالاصح نسميها مزيونه شوية عليها ….واحلى ما فيها عيونها اللي خلقة من الله مكحله …. وطولها اللي مخلي لها هيبة … اما شعرها فمحد من الشلة يقدر ينافسها عليه لانه طويل واسود … نجد عفوية وحساسة حييييييل رغم ان كلام الناس ما يهمها … قمر الشلة )


هنوف ( ناعمة البنت بس مو لدرجة نجد ونورة شعرها اسود كاريه مدرج قصير جنية الشلة لان عليها رجه وصرقعة وسوالف استهبال موووو طبيعة رغم هذا نقدر نقول انها معقدة شوي البنت من الرياجيل والزواج وهالسوالف فحياتها كل استهبال ودراسة )


خلود ( البنيه الدلووووعه وحيدة امها وابوها ... فهم مدلعينها بشكل غير طبيعي ... ساكنة بقصر ابوها بعزها ومعزتها وذربة بشكل تستفز فيه البنات...... ورومنسيتها زايدة حبتين شعرها لين نص ظهرها بني حرير ..... كل همها الموووضه واللبس والمكياج وباقي الامور ضاربه فيها عرض الطووووفه بس فيها طيبة وحسن نية دايم مضيعتها )




سارة ( صديقتها الخامسة وهي بنت عادية الجمال وضعيفة بس ملامحها حاده شوي تموووت بالنقد والتطنز على البنات شعرها خشن شوي فمعقدها بعيشتها ومستواها الدراسي اقل من بنات الشلة وعلى الرغم من هذا البنت فيها غروور مو طبيعي مو راضيه تخليه والغيرة اللي ماكلها وهالشي اللي حذروها البنات بس هي لولا تهورها الدايم كان هي بخير بس تبقى هالبنت جزء من شلتنا وكل البنات يحبونها رغم عيوبها )


* اماااااا فرســــــان قصتنا فما راح اعرفكم فيهم لانهم بيطلعون لكم مع الاحداث وبيكملون القصة كشخصيات رئيسية ...........


نبدااااااا القصة :::

(( الجزء الاول ))


دق تليفون نوره وهي نايمة على السرير الساعه 7 الصبح وكانت المتصلة نجد ...... نوره بقلبها تقول يالله صباح خير هالبنت لو احطها بجهازي بدال المنبه احسن لي كل يوم هي اللي تقومني قبل المنبه ....

نجد: صباااااااااااااااااح الخييييييييييييييير
نوره : وعمى ان شاء الله نجدوه فجرتي اذني حسبي الله على ابليسج ... جذي الناس يقومون والا حتى يصبحون
نجد: والله يا نوير هذا جزاي اني بقومج وانشطج مااااالت على هالخشه زين
نوره : اول شي عشرين مره اقولج اسمي نوره الله ياخذ عدوج مو نوير اعنبو دارج قلبتي اسمي من اسم بنت الى اسم عجيز خرفانه ...
نجد: هاااااااااااه ... شفيهم العجايز هن الخير والبركه ترى ماارضى عليهم
نوره : ادري ادري انج ما ترضين عليهم يالخبلة منتي عجيز مثلهم ههههههه
نجد : عجيز بعينج يالداجه توني ما كملت 19 سنه محنا كبر بعض... يعني لساتني بأول شبابي
نوره (شهقت ) : نجيد انتي متصلة تقوميني للدوام والا تلهيني عنه ..تأخرت ما تريقت ولا لبست شي عشان اروح الدوام يلا باي باي اكلمج وانا بالطريق ...
نجد : تستاهلين يا حبج للنووووم عله لا نمتي ما قمتي يلا البسي بااااي

وراحت نجد تركض للحمام وعقبها لبست بدله بنطلون جينز وتي شيرت فوشي لين الركبة وعدلت ملفعها الاسود وفيه ورده فوشية من كرستال على جنب ولبست كعب فوشي ضعيف وحطت كحل اسود وبلاشر وقلوس فوشي وركضت تهابد وتركض تحت على الدرج والا وامها واختها ريم تحت يتريقون وابوها يعدل غترته بيطلع للدوام ....
ام نوره : نوروووه تعالي تعالي علامج طايرة تريقي
نورة : يمى زين زين بس بشرب عصير البرتقال ... شربته وطارت بين السما والقاع لسيارتها ,,,,
ركبت سيارتها ( لكزس ) وداست للجامعه ....

نسيت لا اقولكم ان البنات كلهم يدرسون بكلية الطب اول سنه ( مستجدات ) ...جابوا نسب عالية بالجامعة ونسبهم كانت متقاربه من 91 الى 97 كلهم شطار ما شاء الله عليهم من ايام الثانوية كانوا يتنافسون على المراكز الاولى ودايم كانت نورة الاولى عالدفعه وهنوف الثانية .....

وهي بالطريق ( دقت الحنانه نجد عليها ) ونوره كانت توها سايقة السيارة فخوافة ما ترد على التليفون وهي سايقة ...... بس من حنة نجد اضطرت انها ترد عليها ...

نوره : نجدووووه ووجع انا الحين اسوق وتعرفين اني ما احب أرد على التليفون وانا اسوق تبين تربكيني انتي ؟
نجد : اسمله علينا ... نوروه يا مال البلش اخرعتيني يالملسونه وينج فيه ؟؟؟
نوره : ويني بعد عند بوابه الجامعه اسفط السيارة واجيج يالحنانه
نجد : هههههههه تصدقين شكلج يونس وانتي معصبه .. يلا تعالي البنات متجمعات نبي نسولف قبل لا يجي الدكتور ويغثنا ...
نوره : زين انتوا وينكم ؟؟؟؟
نجد: حنا بالكلاس قاعدات تعااااااااالي باي
وشوي والا نجد داخله عليهم وتصارخ ( تبي تخرعهم ) قوه يا صباياااااااااا
شهقت نجد( لا نها شافت اثنين من الشباب قاعدين ورا يسولفون وانخرعوا منها .... وقاموا البنات _ شلتها _ يضكوووووون عليها )

( طبعا اتعرفون ان كلية الطب مختلطة يعني بنات وشباب في المحاضرات ومو مفصولين بس البنيه نست روحها هههههههههههه)

قعدت متفشلة ومنحرجه من موقفها ....
نجد: ههههههههههههههههااااااااااااااااااااااااااااي هذا ذنبي اليوم يومنج تزفيني
هنوف : ههههههههه عادي تعيشين وتاكلين غيرها يا حلوة .....
خلود :ههههه نواري لا تتضايقين عادي موقف صار بس شكلج كان يونس ههههه
سارة ":يختي شفيج منهبلة اليوم في وحدة تسوي جذي الحمد لله والشكر عالعقل شيقولون عنج الشباب ( قالتها بنقادة )
ردت عليهم نوره : يختي انطمي انطمي انتي وياها مالت عليكم زين اكلتوني ... وراحت خذت ملفها وكتابها وقعدت قدام قبال الدكتور
البنات : تعالي تعالي خلاص نوره شفيج ذابحج الثقل مساع شزينج
خزتهم نورة بطرف عينها وماردت وقعدت قدام..........

دخل الدكتور ... ودخلوا وراه الطلبة والطالبات (( ما احب طبع الطلبه اذا قعدوا برا واذا دخل الدكتوردخلوا وراه جنهم سرب...ا نثبروا من الاول واقعدوا انطروه داخل )) ...
خلصت المحاضرة .... وطلعوا البنات لان عندهم بريك ( استراحه ) ساعه وبعدها عندهم محاضره

وراحوا كل الشلة المشتله للسكوير ( اللوبي ) >> وهو مكان وسيع يقعدون فيه الشباب والبنات بين المحاضرات

قعدوا البنات وقاموا كالعاده يحشون بالرايح والراد (( حريم هذي طبيعتهم )) هههههه .....اللي يعلقون بينهم على لبسها والصبي اللي يعلقون على قصة شعره وما يخلون احد بحاله بس طبعا تعليقاتهم بينهم بس عشان محد يسمعهم .....
فجأه وينقلب وجه نوره الوان ...... وانتبهت لها نجد والتفتت تبي تشوف الشي اللي قلب نوره ... شافته

شافت بدر ( ولد خالة نوره ) وهو بالسنه السادسة بنفس الكلية ... مار هو وربعه يسولفون

وعين نوره ماطاحت منهم ... التفتوا عليها البنات كلهم (( لان كل الشلة يدرون عن حب نورة لبدر ))

هنوف : نووووره وين رحتي عند حبيب القلب ..... هاااااااااااه
نوره ماردت عليها
اشرت لها نجد انها تسكت وتخلي نوره

وهمست نجد تكلم نوره : نوره مدري ليش متعبة عمرج على واحد مو حاس فيج... طنشيه
ردت عليها نوره (بحسرة): بس انا عندي احساس كبير انه يدري عن شعوري ناحيته
نجد: والله من هبالج مبينه له حبج .... عشان جذي شايف روحه عليج ... ومو معبرج يالخبلة
نورة(وهي تطالع فيه من بعيد وهو يسولف ويضحك مع ربعه) : خليها على ربج نجد خليها على ربج
هنوف المرجوجه : يلا صبايا انا جوعانه امشوا للكفتيريا باكل ... وانتي هييييييييه ( تقصد نوره ) بطلي هبال ولا تطالعين ولد خالج ترا والله الرياجيل ما يستاهلون الحب (((( معقدة البنت صح ههههههه)))
نجد معصبه عليها : جوع جدي انثبري لازم تبلعين يعني .... يا حبج للاكل لويحصلج تاكلين الصحون كلها ... ومصيبه تاكل اكل الدوووود ولا يبين عليها ...

هنوف : ههههههههه موتي حره ... ويلا يالعلل امشوا وراي للكفتيريا .... وهين يا نجد ان ما خربت لج عباتج هاللي كاشختلي فيها بالاكل ماني هنوف

نجد: هههه بامج خير سويها وربي لرد الصاع صاعين ... مفصلتها غاليه يا قلبي

(( نجد ما تلبس بدل مثل باقي البنات دايم تلبس عبي بحكم مثل ما قلت كونها بدويه حيييييل فأهلها ما يرضون ولا هي تحب لبس البدل اصلا ... بس عبيها دايم غريبه وحلوة فيها حركات كرستال ملون يعني حلووووه )) وهم نوره بعد تحب تلبس عبي بس مو دايم يعني تنوع بين البدل وبين العبي ....

وطلعوا من السكوير رايحيين للكفتيريا بعد هوشاتهم الدايمه (ما يقعدون راحه هالبنات )

وهم بالطريق مر عليهم بدر ورفيجه خالد (( بدر وخالد حيييييييل علاقتهم قويه مع بعض )).... ولبسهم دايم الدشداشه والغتره وطاقين النظاره الشمسية كالعاده .... لانهم ما يحبون يلبسون بدل الا بالسفر

بدر( طويل وحنطاوي وجذاب بس ضعيف شوي واحلى ما فيه ابتسامته .... وهو نكته )
رفيجه خالد ( طويل وله جسم رياضي وحنطاوي ... بس وسيييييييم ....واللي مزينه عقله وثقله... وفيه وفا مو طبيعي ) وكلهم اعمارهم 24سنة

مر بدر جنب البنات وهم ماشين وشاف نورة بينهم .... ابتسم ووقف يسلم عليها
بدر : مرحباااااا نوره ... شلونج يا بنت خالتي..؟؟؟

طبعا البنات ما وقفوا كملوا طريقهم للكفتيريا ... وبعد خالد عن بدر ووقف بعيييد شوي عنهم وهو يطالع بنورة من ورا النظارة ...

ردت نوره ( بفرح ) : هلا والله بدر ... انا تمام انت شلونك؟؟؟ وشلون خالتي ؟؟؟
بدر: بخير الله يسلمج تسلم عليج ... هااا شلون الدراسة معاج؟؟؟
نوره : الحمد لله ماشية مع اني توقعتها اسهل من جذي.....
بدر ( يستهبل ): الله يهداج كلية طب وتبينها سهلة شلون بالله ؟؟؟ فهميني
استحت نورة وسكتت : صح كلامك ....
قالها بدر : يلا اخليج الحين بس امانه لو بغيتي شي قوليلي لانج مثل اختي سلمى (( قالها متعمد لانه يعرف بحب نوره له من تصرفاتها ونظرتها اللي فاضحتها ... بس عشان يقهرها ويستانس على ردة فعلها ))
انقهرت نورة ... وقالت بسرعة : يلا باي اخليك الحين بروووح لصديقاتي
ابتسم بدر لانه حس انه نرفزها بكلامه : بااااااااااااايات (( بدر من داخله انسان طيب مو خبيث بس ما يدري ليش هو يحب ينرفز هالبنت بالذات ويغتر عليها .... يمكن عشانها بنت خالته؟؟ ... او يمكن عشانها تهورت وبينت له حبها؟؟ ... يمكن كل شي جايز بهالدنيا ))

دخلت نوره كافتيريا البنات وهي معصبة ومفوله من التعصيب ....

نوره قطت شنتطتها على الطاولة بقوووووة

نجد: شفيج شفيج حستي اكلنا يا المتهورة
نوره : يوووووه بروح اخذ لي اكل.... ترا مالي خلق لانتقاداتكم
وقامت تاخذ لها اكل .... وقعدت خلود تطالع فيها من بعيد وهي تمشي ... فانكسرت خاطرها على رفيجه عمرها
وقالت: هالبنت مو طبيعية من دخلنا هالكلية انقلب حالها 180درجة ماااااا ادري شفيها ... ياربي الله يعين
هنوف ناقده على خلود ) لااااااا شوي شوي يالبارده لا تتلف اعصابج ههههههه يعني ما تدرين شفيها؟؟؟ اللي فيها من سوالف هالخبل ولد خالتها فيها مالت عليه صج الرياجيل بليدين احساس مثلج خلوووود هههههههه

خلود ( طفرانه منها ): مالت عليج يالمعقده .. اسكتي اسكتي بس مخلين الاحساس خله لج يا مرهفة المشاعر.. نجد شوفيها ترا هالبنت حاطه دوبها ودوبي فكيني منها هالنسرة قطييييييييييعه
نجد: بسسسسسس انتي وياها اسكتوا فضحتونا بالكفتيريا كل البنات سمعوا سوالفكم يالغثيثات يا مال السد اللي يسد حلوقكم ...زين
هنوف : زيييييييييييين يا ابلة ههههههههه

نطت ساره بعد ما كانت تراقب نورة وكلامها وحركاتها ودخلت عرض بالسالفة بين البنات وقالت : يااااااربي هالبنت ماعندها كرامة متى بتفهم ان الصبي ما يبيها .. عايفها ...غصب يحبها يعني ؟؟؟

انصدموا البنات من كلامها وفتحوا حلوقهم منذهلين من اللي سمعوه ... صحيح انهم يعرفون ان ساره تغار من زمان من نورة لانها اشطر واحلى منها ... بحيث ان ما في وجه مقارنه بين نورة وسارة ... بي ما توقعوها تحقد عليها للهدرجه ........

ردت نجد : سويروووه يا مال الوجع اللي يوجعج انتي ماتستحين ... شلون تقولين عن رفيجتج هالكلام ؟؟؟

خافت سارة من لهجتها وقالت : هااااااااه لا انا ما اقصد بس كنت ابي اقول انها ما لازم تتعلق بوهم ... حرام

ما اقتنعت هنوف بكلامها وقالت : والله وهم والا مو وهم انتي مالج شغل. بين البنت وولد خالتها حاشرة روحج ليش ...؟؟؟

جت بترد عليها ساره الا ونورة طابه عليهم مع اكلها ... فاضطروا يسكرون الموضوع ...

قالت نورة : بنات تدرون انه الدكتور س2 الظهر بيمتحنا

(شهقوا البنات كلهم وغصوا بالاكل )........... واكلهم كالعادة ورق عنب وتبولة وعصير...... يعني عشتوا مسويات ريجيم ......

ردت نجد : يا ويلي وليه ما قلتي لنا عشان ندرس ؟؟
هنوف : نوروه ووجع ليش ما تكلمتي وقلتي لنا من امس .... عشان ندرس بعد احنا بدون دراسة ما نفلح
سارة بحقد : نورة شنو هالحقد اللي فيج ( كلن يرى الناس بعين طبعه يا ساره ) ليشما تقولين لنا والا عشانج شاطرة يعني شفتي روحج علينا ... وقلتي بالطقاق خلهم يسقطووون ...؟؟؟

انصدمت نورة : شفيكم بنات اكلتوني ... وبعدين شهالكلام يا ساره انتي تعرفين اني مو جذي ولا الخباثة عادتي وترااااا توني دريت وانا عند المطعم قبل خمس دقايق قالتلي وحدة من البنات وانا مثلكم انصدمت .... بس شنسوي بعد ؟؟؟ لازم نمتحن

وكملوا البنات اكلهم ... ودق تليفون خلود
ردت : هلا دادي .. انا تمام
قامواااااا البنات يعلقون عليها كالعاده ......
هنوف : ههههههههه ياربي يا هالبنت يا كثر مياعتها دادي الناس يقولون هلا يبه وان كثروا ومصخوها قلوا بابا.. لكن هالبنت مياعتها بزووود
سمعتها خلود وردت عليها بسرعه : مالج شغل انتي شحارج ؟؟؟ يالملقوفه
قالت لها هنوف : اقول ردي بس ردي على دادي لا تنطرينه على التليفون ههههههههههه
خلود : يوووووووه منج غثيثة (وردت تكلم ابوها )
قالت لهم ساااارة : يلا يلا قوموا المحاضرة بتبدا بعد شوي
قاموا البنات بسرعه وراحوا كملوا الثلاث محاضرات اللي باقية لهم اليوم ..... وبعدها ركبت خلود سيارتها ( رنج روفر ابيض ) وراحت البيت قبلهم
اما البنات الباقيات فقعدوا يتغدون بالكلية والساعه 4 ركبت نورة سيارتها وخذت معاها سارة عشان توصلها لبيتهم لان سايقها تأخر عليها ....
وراحت هنوف بسيارتها ..... ونجد جالها السايق .........


بالليل عالساعة 9 دقت هنوف على نوره............
هنوف : هاي ماي دير
نورة : هلا هلا هنوف
هنوف: شلونج ؟ شخبارج ؟ من زمان عنج؟ يالقاطعة جذي لي مدة ما شفتج (تستهبل)
نورة: هههه ايه مدة طويلة بس من 5 ساعات يالمفترية
هنوف: يختي هوا 5 ساعات شويه دي كتير
نورة : هنوفوه شفيج متأثرة بالكلام المصري
هنوف : هههههه لا ابد وانا اختج بس توني خالصة من فلم مصري ....
نورة : .......... ( بعالم اخر)
هنوف حست برفيجتها متضايقة ومتكدر خاطرها ...... قالت بنفسها : اكيييييييد من سالفة اليوم
هنوف : نورووووه ترى حالج مو عاجبني هاليومين
نورة : ولا انا عاجبني حالي.....
هنوف : والحل معااااااااج ...؟ ومع هالعلة الغثيث ولد خالتج
نورة : لاااااااااتسبين وبعدين معاج وترى الحل بيد ربج مو بيدي
هنوف (عصبت ): لا بسب وبسب وبسب بعد ... من هاللي قلب حالج فوق تحت .. يختي شوفي نفسيتج شلون تغيرت من هالسنه هاذي ...!! وترى انا رفيجتج من عمر يعني ملاحظة حالج عدل
نورة : مااااااااا ادري يا هنوف ( وقامت تبجي )
هنوف حز بخاطرها حالها وتندمت انها كلمتها بهالموضوع بس كان لازم تعدل حالها المايل ) وقلت لها:
شوفي يا نورة مو عشانج رفيجتي انا اقولج هالكلام لاااا انا اقول من احساسي ان هالولد ما يستاهلج ولا يستاهل دمعة من عينج .....
نورة : هنوف مدري شفيه علي كل ماشافني قام يستفزني بأي طريقة لين يخليني اطفر واحنا على هالحال من ومان من كنا صغار ........
هنوف : بس لا تبجين وربج بيفرجها.... بس تبين مني طنشيه وهو بيركض وراج ....
نورة : ما اقدر يااا هنوق صعبة اطنشه .. وصعب اكثر اني اتقبل سوالفه اللي يطفرني فيها
هنوف : خلاص يا نورة اتركي اللي كاتبه ربج يصير
نورة : ونعم بالله.... الا بسألج عن البحث المطلوب مننا
هنوف : ايه شفيه ......................(( وكملوا سوالف بحوث وكتب مالكم فيهااااااااا )) هههههههه
وبالليل س 9:30 شبكوا الخط البنات وقاموا يسولفون ... ضحك وسوالف ... وعبط .....

اليوم الثاني ....
دخل نورة الكلاس مبجر ما لقت احد الا طالبة وهي ما تعرفها .. فحطت كتبها بالكرسي وطلعت للسكوير ....
دخلت السكوير يووووووه ما في احد .... شفيني داشه مبجر اليوم الكلية ....؟؟؟
************************************************** ***

[مشاعل الزين]

اليوم الثاني ....
دخل نورة الكلاس مبجر ما لقت احد الا طالبة وهي ما تعرفها .. فحطت كتبها بالكرسي وطلعت للسكوير ....
دخلت السكوير يووووووه ما في احد .... شفيني داشه مبجر اليوم الكلية ....؟؟؟

قعدت نورة بالسكوير وقامت تقرا مذكرات ماده صعبة معقدتها .... وشوي ودخلت عليها سارة
سارة : قوة نورة ... شفيج جايه الكلية مبجر اليوم ؟؟؟
نورة : هلا سارونه ... مدري جايني نشاط زايد شوي اليوم ... فقلت اجي مبجر
سارة : وين البنات ؟؟؟؟
نورة : محد جا بس انا ....
وشوي والا اسرة بققت عيونها من بدر اللي كان داش للوبي ...
سارة : نوروه شوفي شوفي من جا ؟؟؟
طالعت نورة بالمكان اللي تطالع فيه سارة والا تلاقي بدر ... يطالع يتلفت وجنه يدور له احد مو لاقيه ... شافهم وجا لهم ...
بدر مبتسم : صباح الخير ....
البنات : صباح النور .... 0 طبعا ساروه قعدت ما قامت ولا تسألوني ليش لانها ملقوفه شوي )
بدر: شلونج نورة :؟
نورة : انا بخير ... وانت؟؟
بدر: تمام ... نورة ما عرفتينا باللي معاج ....! ( سارة تشققت من الوناسه ان فيه احد عبرها وبدر بعد )
نوره بنفسها ( يا لقافتك يعني لازم تدري ): هذي رفيجتي ساره
بدر( لقاها فرصه ينرفز نورة كالعادة ) : اهاااا ما قلتيلي ان عندج رفيجه حلوة جذي ( ساااره الدنيا مو شايلتها)
نورة ( ماتت من القهر ) : والله مو لازم تعرف
بدر : بس بس لا تعصبين شقلنا احنا .... خلاص بس حبيت اسلم عليج واقولج اذا محتاجه شي ؟؟ بعد انتي بنت خاتي لازم نتوصى فيج....
نورة : لا سلامتك مابي شي
سارة لقتها فرصة: بلى يا ليت بدر اذا كنت فاضي تشرح لنا هالمذكرة اللي مع نورة لانها معقدتنا كلنا .. اذا سمحت ؟؟؟
نورة ( انقهرت من جرأتها ... هذي وهي توها تتكلم معاه طيحت الميانه .. انا اوريج يا سارووه ): ما له داعي ...
بدر : لا لا خلاص انا مستعد اشرحها لكم ....كم نورة عندنا احنا ؟؟؟ ( بدر كان يعز نورة من معزة خالته )
وبعدين لو سقطتي فيها يا نورة امي بتحط الحره فيني بتقول ليش ما ساعدتها ؟؟؟ هذي مثل اختك ..( قالها بيقهر نورة )
سارة : خلاص بنحدد الوقت اللي يناسبنا ونقولك ...
نوره ( صج هالبنت ما تستحي فشلتني )
بدر : خلاص اتفقنا ... والحين انا استئذن بروح اشوف رفيجي خالد من مساع وانا ادوره ومو محصله .. باي
البنات : باي

نورة على طول التفتت لساره : سااااااروه صج ما تستحين بسرعه طيحتي الميانه مع الولد وقمتي تشرطين
ساره : يوووووووووه عادي نونو الولد مبين عليه حبوب ... وبيساعدنا عشان ننجح لا تعقدينها بروحنا مستجدات ضايعات ما ندري شالسالفه .. وبعدين انا تعمدت عشان تتقربين منه يالهبلة ... هذا جزاي ابي مصلحتج؟
نورة : بس بس انطمي البنات جوا

خلود: هاااااااي بنات
نورة : وعليكم الهاي ... الناس يسلمون
خلود : ياااااي نونو شفيج صايرة معقده اكيد اعدتج هنوفوه
نورة : ههههه لا تسمعج الحين صدقيني بتحط حرتها فيج ...
خلود: بروحها مو مخليتني بحالي..مأزمتني هالبنت
البنات : هههههههههههههه
وجو بعدها نجد وهنوف .... وقاموا يسولفون وراحوا بعدها للكلاس لان المحاضرة بدت
طلعوا من المحاضرة وراحوا للكفتيريا ...........
خلود: بنات ترا امي مسويتلي حفلة عيد ميلادي ولازم كلكم تجون ....
نجد : اكيد نجي يا قلبي لو ما جيناج نجي لمنو ... ابشري
نوره : خلاص اوكي ببلغ امي
سارة: هاااااه .. مدري بشوف اهلي... ان شاء الله يرضون
هنوف : انا يا خلود اسمحيلي يمكن يدخلون جدتي االمستشفى ومضطرة اقعد معاها وقت ثاني اجيج ان شاء اللله

(( نسيت لا اقولكم ان هنوف يتيمه ابوها وامها توفوا بحادث لما كان عمرها 13 وجدتها هي اللي ربتها وساكنه بالبيت مع جدتها وعمها بس لان ما لها غيرهم بالدنيا ... وعمها اسمه نواف (24 ) ويدرس برا بايرلندا طب ... ويجيهم من وقت للثاني.... هو متعلق بهنوف حييييل لانها من ريحه اخوه الغالي )

خلود : حسافه هنوف .. الحفلة ما تنور الا بوجودج بس ما دامه ظرف اضطراري بنسامحج
هنوف: تسلميلي خلوده

وكملوا البنات سوالفهم عن حفلة خلود اللي بتكون يوم الاربعاء يعني بعد 3 أيام ..... وكل وحده بتستعد لها من الحين (( حركات البنات بعد ))

وانتهى الدوام على خير ... بالليل كانت نجد قاعده مع جدها وابوها بالصاله وامها ومرت اخوها بالمطبخ يسووون العشا ....
نجد تموت بجدها حييييييل ومتعلقه فيه وهو بعد يموت فيها لانها حفيدته الكبيرة بعد اخوها طلال ..
الجد: نجد يا بوج وش سويتي بالجمعيه ؟؟؟
ابوها: أي جمعيه يبه؟؟
الجد: هذي بعد ما غيرها اللي تروح لها كل يوم الصبح
نجد : ههههههههههههههههه جدي قصدك الجامعه
الجد : أي عليج نور ... هذي هي ما غيرها ... وش سويتي بها ... وش علومها؟؟
نجد : علوم الخير جدي... ابد ماشيه فيها وانا بنتك
الجد: بعدي والله كفوووو يا بعد راسي
نجد : يبه خلود مسويه حفلة ببيتهم وودي اروح لها... ممكن؟؟
ابوها: لا شي يوديج لبيوت الناس اقعدي بس مالج حاجه
نجد ( متضايقه ) : تكفى يبه الله يخليك والله ضايق خلقي من الدراسه وبعدين كل البنات بيروحون لها وانا باخذ امي معاي ماني رايحه بروحي
ابوها : لا يعني لا ... نجد لا تغثيني
الجد: بس يا ابوطلال لا تضيق لا بنتي خلها تروح تونس مع ربايعها ... لاتكسر كلمتي
ابوها: ما عاش من يكسر لك كلمه يبه ... خلاص نجد روحي يبه جدج توسط لج كالعاده ... محد مخربج علي الا ابوي
الجد + نجد : ههههههههههههههههههههه
راحت نجد تساعد امها ومرت اخوها ( خزنه ) بالمطبخ وقالت لهم عن الحفلة.... وطلبت من خزنه تروح معاها السوق عشان تشتري بدله لهالمناسبه وهدية لرفيجتها ...... ووافقت خزنه

دقت بالليل نجد على نورة وفلوها ضحك وسوالف وشبكوا هنوف معاهم بالمكالمة .....

بعد ثلاث ايااااام ( موعد حفلة خلود )

تجهزوا البنات واتفقوا انهم يطلعون مع بعض لبيت خلود

لبست نورة بنطلون جينز فيه شغل ذهبي من تحت وبدي ذهبي فيه كرستال مع تراجي (حلق ) ذهبي طويل وحطت مكياج ذهبي ....

ونجد كانت لابسه ثوب تايجر (نمري) وفيه شغل احمر من فوق .... قصير.... لا بسه تراجي لونهم احمر ... وحاطة مكياج ناعم حيييل وروج احمر .... وفاله شعرها الطويل ومسويته بف ....

ساره كانت لابسه بدله ورديه طويله مع حزام فضي ... ومكياج وردي ناعم .... ومموجه شعرها وحاطه ربطه ورديه ....

خلود... كانت ناعمه هالبنت مستشوره شعرها الكاريه الاسود ... ولابسه بدله زيبرا اسود وابيض فيها شغل كرستال اسود.... طويلة وفيها فتحه على طرف ....

............. دخلوا البنات بنت خلود وشافوا الناس كانت البيت مزحوم فوق وبالسرداب بعد ...شوي وشافوا م خلود باركو لها وراحوا يضبطون اعمارهم ... وشوي ودخلت عليهم خلود
خلود: قوووة يقولون فيه بنات معجبات يسألون عني ؟..
البنات: هــــــــــلا خلود ..... كل عام وانتي بخير
( سلموا عليها وعطوها الهدايا ... ورحوا تحت بالسرداب مع امهاتهم عشان الرقص كان تحت )

استانسوا البنات ورقصوا وفرفشوا ....وكانت خلود كل شوي لما تمر عليهم يعلقون عليها ( مهبل هالبنات )

جت خلود باخر الحفلة وقعدت معاهم تاكل من الكيكه بعد ما تعشوا من البوفيه
وشوي والا في وحده من الحريم تناديها ....
المره : خلود خلود
خلود ( انتبهت لها ): هلا خالتي ام حمد ..... وراحت لها
ام حمد : خلود حبيبتي ... منو هذي ام نفنوف تايجر اللي كنت قاعده معاها؟؟
خلود : هذي رفيجتي نجد .... وياي بالكليه خالتي
ام حمد : ايه يحليلها .... شكلها بنيه مؤدبه وحلوة بعد
خلود : أي خالتي هذي نجد رفيجتي من عمر .... تهبل هالبنت
ام حمد : خلاص حبيبتي روحي لرفيجاتج استانسي

شوي وردت لهم خلود .....
ساره ( ذبحها الفضول ) : خلود من هذي المرة اللي نادتج... شكلها ذربه ؟؟؟
خلود: أي هذي خالتي بدريه ام حمد ... هذي رفيجه امي من عمر.... كانت تبيني ورحت لها ... بطلي لقافه
ساره : ههههههههههههههه حرام عليج انا ملقوفه
نجد : انتي ام اللقافه كلها
نورة : لا وانتي الصاجه جدتها هههههههههههههههه
سارة: ترا ما تضحكون مليقات
نجد : ما عليج زود هههههههه
وكملوا السهر ضحك وسوالف ... وامهات البنات كانوا قاعدات فوق يسولفون مع بعض... ولما صارت الساعه 11ردوا لبيوتهم .......


اكتفي بالفصل الاول بانتظار ردودكم وتعليقاتكم


مشاعل***

[بـ8ـنـQـت]

القصه واااااااايد حلوه

ننتظر الجزء الياي
مشكوووووووووره

[بـ8ـنـQـت]

الووووووووووو