... {سبع ساعاااااااات اسولف واتكلم واستخف دمي} ...
[align=center]السلام عليكم ورحمة الله وبركاته
... مساء الخير ...
هذي قصيده اعجبتني وحبيت انقلها لكم ...
سبع ساعات أسولف وأتكلم وأستخف دمي
وهي تسمعني وتضحك ومبسوطه على الأخر
::
سبع ساعات اعلمها عن أحزاني وعن همي
واسولف عن حكايا الطفل كان وصار هالشاعر
::
سبع ساعات تتساقط حروف الصدق من فمّي
على صحرا مسامعها سحاب العشق متناثر
::
سبع ساعات وتحلف لي براس العشق وتسمي
تقول أنت الوحيد اللي ملكني حبك الساحر
::
سبع ساعات ونادتني بأسمه ما هو بأسمي
تناديني فهد واسمي انا ياللأسف جابر
::
تشنج كل شيٍ كان حولي ومسمعي يدمي
ركز خنجر فهد في مسمعي من صوتها الخادر
::
تخدّر فكري وجسمي وذاب بداخلي عظمي
وصرت اسمع صدى صوتٍ يردد غلطة الشاطر
::
يردد غلطة الشاطر بعشرة واقعي وحلمي
وترددها زوايا غرفتي والواقع الغادر
::
كثير اصوات شقت جلدي اللي يحتضن عظمي
وصراخ الباب والدولاب والشباك والساتر
::
وونات القلم والدفتر اللي يلتفت يمي
وخايف وش ابي اكتب بوسطه من هنا لـ باكر
::
وكانت ساكته وصوت النفس من خشمها و خشمي
ربع ساعه وبحة صوت قالت: خير وش صاير
::
وطرا في بالي عبدالله وخالد واحمد ونشمي
ولآخرهم فهد تسعه وانا مدموغه العاشر
::
وقلت ابداً مغير الخير ولكن امسحي رقمي
اكيد انه فهد جالس سبع ساعات وهو ناطر
::
وقالت لي: رجاءً أو أقولك .. طير ياعمي
مسوي حضرتك في هالزمان العاشق الطاهر
::
وقالت لي:أقول! وقلت: أنا بقول وذا علمي
عجب هالناس وش هالناس تخطي وبالخطى تكابر
::
انا يابنت بنثر لك حياتي واجمعي لمّي
بعضه بنثره في مسمعك هالحين ومن خاطر
::
ترا عمري انا تسعه وعشرين وكذا رسمي
ولكن عشت أيامي دبلها مقبل وعابر
::
أصيل وكل أصيلٍ مايبي مدحي ولا ذمي
وسبع انعام في هالناس اخص الحامد الشاكر
::
انا من نجد وربعي هم عتيبه وخالي الدحمي
وبرقا لحمي ودمي وانا من روق ومع ناصر
::
انا جابر ولد هايف وسلم الطيب هو سلمي
ابو الي مربيني على الجزلات واتفاخر
::
انا راعي مجاهيمٍ يشع بفخذها وسمي
وراعي خيل وراعي بير وبيتٍ مبغضه كافر
::
على الرمضى ابت رجلي بأرضٍ عاشقه ضمي
وشمسٍ تشرق وتوقف على راسي وانا صابر
::
عرق وجهي يصب وامسحه بشماغي وكمي
وألد عيوني عن ناسٍ سرقني يمها الناظر
::
وانا شاعر ولو اكتب عجز كل فكر في نظمي
ولاني بالغرور احكي ولكن واثق وقادر
::
وانا رجال هاوي للقمم ويقودني عزمي
وابي ارقى على راس الجبل وانتي مع الحادر
::
عرفتي ليه انا طاهر؟ لأنك همي وغمي
ولأن الدنيا في عيني جبل نرقاه ونغامر
::
يابنت الناس شفتي كيف بليّا سلاح مانرمي
ولانوقف بوجه البندق المليان ونخاطر
::
خلقنا الله بشر بعقول وذا واقع وذا وهمي
وكلٍ يتبع مراده وفينا رابح وخاسر
::
وقالت لي فمان الله شعلت النار في جسمي
فمان الله يالطاهر ومثلك قله ونادر
::
ورحت آخذ كتاب الله واحلف بالكتاب:" امي
لو ان اسمي فهد بالله ماكان احلى من جابر..؟!!
****
للشاعر جابر بن هايف العتيبي[/align]
رد مع اقتباس
مواقع النشر (المفضلة)