مسائكم شعر
/
\
/
\
نفس المكان اللي سهرنا به العام
ونفس الطريق المظلم اللي مشيت
قابلته وضج الفضا جرح وآثام
قابلته وياليتني مالقيته
قال : أنت وقفت .. وقلت أنا الدرب قدام
ضحك خطا .. قلت الخطا مستميته
قال الغرام يزغزغ بصدرك أنغام
مستبشر ٍ فيني .. بعينك قريته !
قلت : الغرام أكبر من أحلام الأقزام
قال الهوى يومك تبيعه شريته
قلت أن بدت عندك حسابات وأرقام
تذكر وش أول قلب أمنك بيته ؟!!
تذكر نزف ليله من جروحك آلام
تذكر على شانك يجافي مبيته
تذكر شلون يموت بسكوت منضام
نخل شموخه في يدينك حنيته
تذكر !! أول اللي مامضى كله أوهام ؟
معقوله أنك كل هذا نسيته !!
ياصمت مايرحم يعذبني أجرام
يجتاحني سيل الكلام وضميته
وياضحكتٍ تاهة على شفاه الأيتام
زرع ٍ زرعته في يدينك جنيته
ياحيف .. ياحب أنهدم ليه مادام ؟
وأنا الذي من دم قلبي سقيته
ياحيف ياحلم انقتل .. أحلى الأحلام
ماكن شي .. وكان عمر وقضيته
وكانك نسيت أيام .. تنساك الأيام
تبلاك مثل المسلم اللي .. بليته
يا للأسف موتك على حد الأقلام
حرف ٍ كتبته .. ماعجبني محيته
والعاطفه خبري بها أول العام
( حبــك في سلة مهـمـلاتـي رمـيـتـه )
مواقع النشر (المفضلة)