السلام عليكم
قصيدة عجبتني وقلت أنقلها لكم ومدري اذا كان الموضوع مكرر ولا لا...
القصيدة للشاعر فهد المساعد
صعب لا منك فشلت وصعب لا منك لقيت
لان من يكره نجاحك يدري انك مانجحت
امس ضقت ورحت اقلب ذكرياتي وانتهيت
عند صورة طفل صوته مثل صوتك لأنجرحت
وش مثل لا والله الا هذا انا يوم ابتديت
انطق حروفا" تلعثم في وصالك لا مدحت
هذا انا يوم الحياه ف نظرتي عشرين بيت
ومسجدين ومدرسه من طين كم فيها اصطبحت
هذا انا اصبحت اتمتم هذا انا حتى بغيت
اختنق بس القدر عيا على موتي وطحت
وصاح صوت الطفل فيني انت من وين ارتميت
قلت انا المستقبل اللي فيه كم هنت وطمحت
امس كنت ابيك تكبر بس والله لو دريت
اني اللي عشت لاجله مت عندك واسترحت
لو دريت ان الزمان يجر رجلي ماعنيت
لو دريت ان البحور بلا مواني ماسبحت
كان دربك لي طويل وكل ماشفتك هويت
قلت لك كبوة جواد وماكبيت الا وجمحت
ليه تسمعني وتمشي آآآه ليتك مامشيت
وآآآه ليتك من كثر عثرات الايام انتصحت
ضاعت احلامي وظل الحزن فيني واهتديت
للطريق اللي يوديني على دمعي ورحت
يالحزن ليتك مثل دمعي وتنزل لا رقيت
بس اعرفك لو مسحت الدمع تبقى مانمسحت
كان حلمي في وجود انسان يبكي لا بكيت
وصار حلمي في وجود انسان يفرح لافرحت
كنت اشوف الناس مثلي كل ماجعت وظميت
ومادريت ان الاوادم ناس فوق وناس تحت
آآآه ياأول ذكرياتي خذني في حضنك نسيت
بسألك عن وجه ابوي اللي معه ياما سرحت
خذني في حضنك ابى اغفى يااااااااه مبطي ماغفيت
وان لمحت دموع عيني سوي نفسك مالمحت
خذني في حضنك وبعثر في جروحي وان قضيت
هزلي كتفي وقولي عيب تبكي لو سمحت
اضحك وعلم زماني من على ومن وين جيت
طق باب الحزن واصرخ فيني لا مني فتحت
وضمني يمك وكمل ضحكتك لامن بكيت
ودي اذكر كيف كانت ضحكتي لامن فرحت
إن شاء الله اختياري يعجبكم:19ar:
مواقع النشر (المفضلة)