قصيدة دوا الضيقه

والله إني ضايقٍ والصدر بالهم إمتلا

والغبون اتجر وسطه ياعلي موّالها

ماهي ضيقة عاشقٍ يشكي فراق أم الحلا

ولاهي ضيقة فقر ولا دين ولا امثالها

والله إلا ضيقةٍ لو هي توزع عالملا

كان تكفيهم ويبقى مثلها وأدبالها

والسبب في ضيقتي بعض العرب ؟ ولا بلا

خلني ساكت وربك ياعلي حلالّها

غير تدري وش دواها يازبون اللي انجلا؟

لا إنقطع عن أجهزتنا برجها وارسالها

الخلا يابن عجي إي والله انه الخلا

هو دوا الضيقه وهو حلال عقد حبالها

ماحلا دق العصب في كل راس .. وماحلا:

الجنابي في عروض مخضبين سلالها

وماحلا طوي المسافات الطويله بالفلا

لين ننزل عند واديها وبين جبالها

وماحلا نص العمود وماحلا شب الصلا

والدلال الصفر ذات الكيف صف بجالها

وقام شفرة قومه الوافي بها ومد (اشهلا)

وعدلت روس النشاما ماحوا فنجالها

النشاما اللي ليامن جيتهم قالوا: هلا

من خواطر صافيه تنبان بإستقبالها

المطاليق الصقور اللي مواكرهم على:

راس نايف والطمان تشوم عن منزالها

وجلستهم على طيب ونقا قلب وغلا

والسوالف والعلوم الطيبه واجزالها

والسمان من القصيد اللي من الهزله خلا

وعقبها لعب اقحطان اللي يجمّل حالها

قزوعي والقزوعي من دون طبلٍ يطبلا

مابه الا صوت خبط القاع وصوت رجالها

لعب هيبه العبوه اجدودنا من اولا

فالحرايب عقب مالعدوان تلقى فالها

ياعلي طالبك هيا ياعلي صوب الخلا

ودي اسلا لعنبو الدنيا على آبوريالها