بسم الله الرحمن الرحيم

قصيدة حمود جلوي استراحة محارب , اشعار حمود جلوي , شعر استراحة محارب , ابيات من كلمات الشاعر حمود جلوي


من واقع الخبرة وكثر التجارب
ومساير الدنيا على كل مضمار

وإن العمر رحله والإنسان غارب
تسري به أبحار " وترسي به أبحار

وإن التفكر استراحة محارب
وإن الحياة أسرار تسكن بها اسرار

لقيت كل من عنا الوقت شارب
كل يعاني ضيقها إكبار وإصغار

الناس فوق الناس والوضع خارب
ماعاد لك يالطيب حشمه ومقدار

كل على لقمة عياله يحارب
هذا يبي جنه وهذا يبي نار

ولقيت ناس في بعضها تضارب
ما تلتفت للعيب لو صار ماصار

تلعب على أربع جهات المآرب
في كل نعش" دقت ألفين مسمار

ولقيت حرمه كل أبوها عذارب
أحبابها قلة وعدوانها اكثار _ _

ماردها مارب ولاسد مارب
يغنيها عن كل المشاوير مشوار

حرمه ولكن عن ثمانين شارب
تصغر لها كبارن وتكبر بها صغار

يشرق لها التاريخ لو كان غارب
ماهمها أحمد و ناصر ونصار

ولقيت في بعض الأقارب عقارب
ماعندها لأدنى المعايير معيار

ترقص على مليون قارب و قارب
في هندسة ذبح المواجيب شطار

ولقيت رجل كل مافيه ضارب
يعزف تقاسيم الحضارة على الطار

رجل على كل التقاليد ضارب
في حجة إن عاداتنا صارت غبار

يشوف في حلق الشوارب تقارب
بين الأمم رهبان وشيوخ وأحبار

والمشكله ماهي بحلق الشوارب
المشكلة بعض الشوارب غدت عار

يا عنتر الشداد وشفيك هارب
تعال ناظر تالي الوقت وش صار

ماعاد فينا قلب للموت طارب
ولا عاد به أبجر ولا فيه فقار

صرنا لخلق الله حقول وتجارب
وصارت لحايانا مصالح وتجار

خلنا انتبهذل المهم مانحارب
واطلق شنب نشري سكوته بدينار

ودامه زعيم النصر ماكل وشارب
ما أظن ترجع غزه أو يهدم جدار

خلاصة الموضوع ياعيال عارب
لا سيفكم يذبح ولا حولكم ثار

خلكم مع ليل الطرب والمشارب
لأنكم في هالطريقين شطار