قصيدة الشرهه للشاعر حمد البريدي ٢٠١٤
بسم الله الرحمن الرحيم
قصيدة الشرهه للشاعر حمد البريدي ٢٠١٤
لحدن ٍ يحاكيني ترى الخاطر اقصاه
والدمع ..يا قلب العنا مايطيبك
حتى لو ابكي وش ورى دمعي و ماه ؟
ويلي على ادري ويش قلبي يبي بك
تطري علي والقلب ماجاه كفاه
غايب لكن غيبتك ما تغيبك
متعومسْ الخاطر وياقلب ويلاه
ماقد ذبحني الا سكوتك و طيبك
ولا انت! يا لاهي ولا ادري ويش الهاه
طف ِ بوصالك مابقى من لهيبك
ياحبك لقطع المواصيل حباه
قطعت قلبي منك لا قطع صيبك
وسويت فيّ اللي سواتك ماسواه
واتحملك مهما جرى و ارتضي بك
ياذابحي ياصبر ذا القلب صبراه
ذبحته بكفك وهو ملتجي بك
اتروح..؟ روح و دربك الله يرعاه
لو ابغى اجيبك اعرف وشلون اجيبك
در في ثرى الدنيا و مثلي ما تلقاه
تبــــــــطي عظم ماشفت زولن يذيبك
حظ الهوا الي اتعيش به بس حظاه
لانه الوحيد الي قدر يختلي بك
ادرى عليك من الهوا و اتحاشاه
واورف بك و اهيم بك و اعتني بك
لانك سحاوي و السحى يكسر اجباه
وشلون ماتبغي الهوا يستحي بك
[[عيبي احبك لو غرامك معاناه
وانت الغياب الي بلا عذر عيبك]]
اضيق من جفواك و اجرها اااه
اخاف من غدر الزمان يغدي بك
لو انك تدري خاطري عقبك ايش جاه
يمكن تنوح الليل و اتطر جيبك!
اشره على الحب الي عطيتك اياه
ملعون حظ ٍ حط ْحبي نصيبك
هملتني بين الامل و المحاتاه
مدري عدوك صرت ولا حبيبك ! }
الشاعر // حمد البريدي
رد مع اقتباس
مواقع النشر (المفضلة)