يوميات طالب في اجازة ]] كوميديا بحرينيه روعه ]]
اخواني وأخواتي الاعضاء
السلام عليكم والرحمه
اني لعضوه من محبي الكوميديا
وبينما كنت على صفحات الانترنت
اعجبتني قصه من تاليف هاوي بحريني في احد المنتديات
وهذه القصه تروي لنا حال الكثير من الشباب في عصرنا
الحالي اثناء العطله الصيفيه واوقات الفراغ لديهم ولكن هذا
الهاوي قد اختار اللكنه البحرينيه او البحرانيه مثل ما يقال
في طرح القصه ...... (( فاستمتعوا بالقراءة وان ما فهمتون
كلمه ترى حورية البحرين حاضره )) ولا تنسون تشكروني ..فتابعوا
معنا ...........
الحلقة الاولى
طق طق طق طق
الأم : عبود .. عبود ما تقوم تصلي
الى متى بعد ؟؟؟؟
هذي هي شغلتك من عطلت من المدرسة بس سهر في الليل ونوم في
النهار
طق طق طق طق طق طق طق طق
عبود : أوووووووووووووووووووووه
ما تفجين أنتين ..عورتين راسي .. يعني الواحد ما تغط عيونه في هالبيت
الأم : طيح الله حظك ... وين ما يطيح حظك وانته كله نايم
عبود : قلت لش فجي لا راويتش
الأم : ويش بتراويني
قوم جان فيك خير يالراسب
لكن الحين بجي أبوك من الشغل وباقول ليه انت الظاهر ما ينفع وياك الطيب
فتح عبود عيونه وهو يوقف
طالع الساعة والا هي أربع العصر
قام بسرعة
الحين بجي أبويي وبيعطيني محاضرة طويلة عريضة
دش الحمام يغسل وبعد ما غسل عيونة من الغمص
وسيدة على المطبخ
عبود : ويش الغده
الام : عساك غدغده ..صليت الا قاعد تسأل عن الغده
عبود : أي صليت
الام : متى صليت ؟؟.. مالحقت تصلي يالجذاب
عبود : حطي ليي غده لا تعورين راسي
الأم : أحط لك سلال في جبدك .. ما في غده الا أول تصلي
عبود : ما أبغي غداش زين
وطيح المواعين اللي على الطاولة وطلع
الأم : جدي تسوي يا قليل الصلوات .. ابشر عند أبوك الحين هو على جيه
رجع عبود حجرته وصك الباب عليه
وبعدين قام يفكر
خلني أطلع من البيت الحين قبل لا يجي أبويي ويسوي ليي سالفة
نفش كشته وتوه بيطلع تذكر انه ما عنده فلوس
من وين يجيب فلوس الحين
أكيد أمه ما بتعطيه
لكن ما ليه الا حصالة أخوه جسوم أبو لخشوم
دش حجرة أخوانه ومن غير ما أحد يحس وشوي شوي
بطل كبت جسوم وطلع الحصالة الفخارية
ومن جيبه طلع السجين وقام يوسع الفتحة اللي في الحصالة
وبعدين قلبها على وجهها وخضها بزور
طلعت ليه خمس ربيات شالها بسرعة وخشها في جيبه
ورجع الحصالة مكانها
طلع من البيت
او وينك على البرادة
اشترى ليه قوطي جقارة
وقعد يدخن
رد مع اقتباس
مواقع النشر (المفضلة)