أخواني وأخواتي مشرفي واعضاء وزوار هذا المنتدى المتميز . مسائكم ورود وريح عود اتمنى ان تكونوا بخير وعافية
هنا اضع بين اعينكم دررا ً نضمت لتبقى
وهي مجموعه قصائد للشاعر الغير عادي ( متعب التركي ) الذي اتمنى ان يكون بخير وسعاده ..
إليكم بعض من هذه الدرر ..
/
\
/
\
/
\
/
\
/
\
قالوا حبيبك يسمع الشعر قلت أيه=يـقـراه بعـيـونـي قـبــل تسمـعـونـه
لولاه حتـى طـاري الشعـر مـا ابيـه=مير أكتبـه مـن شـان خاطـر عيونـه
هـو روح شعـري وأمنياتـه وماضيـه=جذع الشجر وش كان لـولا غصونـه
اكتـب لغيـره والقصايـد تجـي فـيـه=كــن القصـايـد حالـفـه مـــا تـخـونـه
هـذاك لا منـه زعـل قـمـت أهـاديـه=حتـى وهـو مخطـي تـعـذرت دونــه
يمكن لـو أنـه يلمـس الجـرح بيديـه=يستغرب ان اللـي لمسهـا طعونـه
ابطـى وهـو غـايـب وزلــت حـراويـه=وأنــا مــن الـعــام آتـحــرى مـزونــه
هو مادرى اني فـي غيابـه محاتيـه=ليته نشد عـن حالـي اللـي يجونـه
واقلبـي اللـي تــوه أفـلـت عـراويـه=كيف انسرق وضلوع قلبي حصونـه
عـجـزت أرده كــان مـانــي بـراعـيـه=يوم انتثـر شوقـه وهاضـت شجونـه
يبسـن عروقـي لكـن اللـي يعـزيـه=ان اكـثــر الـعـالــم تــــردد لـحـونــه
خـافـو مــن الله لا تجيـبـون طـاريــه=لا صــرت أنــا مـوجــود لا تـذكـرونـه
لــو كــل غـالـي جـابـه الله لغالـيـه=ما شفت لك مخلوق تبكـي عيونـه
يوم طاب السهر عيت تطيب النفوس=جت من الله وانا كم كنت محتاجها
كنها من حلاها كل ليله عروس=خايفه من عيون الناس واحراجها
حي هالطول يا زولٍ عساه محروس=من عبث لوعة الايام وازعاجها
تزعل نفوس ولا تمتلي غيض روس=من يقرب لها وضلوعي سياجها
لي متى وانت يا شوق القلوب محبوس=طالت السالفه وابطيت بعلاجها
جعل قلبن على نار الغياب محموس=يحترق بين صاليها ووهاجها
من خبر له غلا بين الضلوع مغروس=غرسةٍ كل ابو شعري من انتاجها
لا تقرب لك الفرقا هذيك الهجوس=من متى والبحور تفارق امواجها
لازم اصبر على وجه الزمان العبوس ..=لين سود الليالي يضحك احجاجها
من بغى يقطع الفرجه يعاف الجلوس=لين ياصل نهايتها ومخراجها
كان شعري قصر ما طال شمس الشموس=تستريح القصايد داخل ادراجها
توديع الأحباب مثل الموت له سكره=ادمى جروحي وشق الصدر منيّـا
والقلب طير ضلوع الآدمي وكـره=لأشاقـه الطلـع لاسلـم ولاحيّـا
مصير الأحزان تنساني وتفتكـره=ماكل الأيام بيض وسمحـة محيّـا
قل غيرها ماأنت لامجبر ولامكره=لاصار ماهي غلا ماأبي لك حميّـا
لو في يدي شي ماقلت الوعد بكره=حزمت حدب الضلوع وقلت لك هيّا
لو كل غالي يجي دايم على ذكـره=ماصرت اشوفك هناك وحبك هنيّا
ياليتني لابغيت اكره قدرت اكـره=ماكان قلبي ليا جيت اكرهك عيّـا
مادامك معيف رح لكن على فكـره=ماقلت لي ليه دمعـك سـال منيّـا
البارحة مدري وش اللـي خذانـي=يوم اجنبوا عني من الضيقة اشملـت
جيـت أتكلـم بـس عيـا لسانـي=ماكني إلا مرتكب ذنـب واخملـت
الله يسامح مـن ذكـرت ونساني=وأنا أدري إنـي لاذكرتـه تجملـت
عانيت وأدري كـل طيـب يعانـي=وعلى حساب طعوني الخضر جاملت
ياماخذوا منـي ولا احـدأ عطانـي=من طيبتي في حق نفسـي تساهلـت
عـزاي لامنـه تجهـم زمـانـي=يممـت وجهـي للكريـم وتوسلـت
واللي يبي قربـي وبعـدي لقانـي=أمشي على وضح النقاء ما تختلـت
( يامن سكنت اجمل زوايـا كيانـي=ياما على نفسي عشانـك تحاملـت)
مرات احس انك معي شخص ثانـي=ومرات احس انك حبيبي وما زلـت
لاتفرح انك دجـت بيـن المحانـي=لو ماتخـون الذاكـره مـا تسللـت
(( عشان ماضيك الجميل وعشانـي=حاول تشيل من الوفا ربع ماشلت))
((( ماني على خبرك حبيبي ترانـي=حتى عن اصغار الاماني تنازلت)))
ليـه وطيـت عـن خيـل السـروج=ليه مديـت عقـب القـراح الهمـاج
لا تجمل لي الغلطات والعوج عـوج=يضحك احجاج او ينعقد لـي حجـاج
اصبر اشوي وش علمك تهوج وتموج=ميت القلب مثلـك مايعـرف الهيـاج
ماتعودت اجامـل معتليـن البـروج=الزم العلم قبل يصير هرجك سمـاج
المشاعر تحي مثل المعاصير هـوج=ونت مالك على هوج الرياح احتجاج
جيت وقلوب حسادي تميـل وتـروج=.لا صفى جوهم ساعه قفـاه العجـاح
ابتسم لك وهمي فـوج يقفـاه فـوج=من يحبك لزوم ايصر مثلـك هجـاج
بس قلي ونا غلطان لـك ومحجـوج=وين يلقون لجروح النواعـس عـلاج
القمر غاب وانت اطفيت نور السروج=قلت يكفيك نور الوجه الاصبح سراج
كن بين الضلوع العوج صفقات موج=يوم فاض الغلا والشوق والقلب هـاج
ضيقة الصدر لو بين المحاني تلـوج=كل ضيقة لها عنـد الكريـم انفـراج
ماهو الغيض سبت كل ابو هالهـروج=بس مالي على بعض السوالف مـزاج
قبل اسافر وتنسى جيـت اسلـم عليـك=جيت ابي عمري اللي من يديني غـدى
ضاعت اجمل سنيني من عمايل يديـك=اكذب ان قلت راحت لاجل عينك فـدى
فرصة العمر قالوا لا غدت مـا تجيـك=جتني اكثر فرص عمري وضاعت سدى
جرب الخوف مره حـس بـه يعتليـك=وارفع الصوت ماتسمع لصوتك صـدى
تدري اللي ذبحنـي قولتـك مـا ابيـك=مابقالـي لثـاري لـو بغيتـه مــدى
ما هقيـت المشاعـر كلهـا ترتجيـك=قل لها بالمفـارق منهـو اللـي بـدى
هاك دمعة عيـون(ن) باكيـه تشتكيـك=هاك ريح ضمير(ن)ما استراح وهـدى
ما تناظر عيونـي زول هـذي وذيـك=ما يهز المسامـع اسـم ريـم وهـدى
قلت ماعادلي رغبـة وشوفـات فيـك=قلت يا نفس طيبـي يفرحـون العـدى
قلت عايف ونفسـي بالخفـا تشتهيـك=عزة النفـس تـدري طيـب مـا هي ردى
خل عينك تهـل دموعهـا وش عليـك=انت خدك ورود ودمـع عينـك نـدى
ضايق البال مايستانس الحالـه=وانت لاغبت عني كني الحالـي
جتك الاشواق رجليـه وخيالـه=غير الاول تحمل شوقي التالـي
ليت من قال متعب خابت امالـه=شاف بعيونك الخدرات منزالـي
واحدأ فيك ماهو منشغـل بالـه=اشهد انه بها الدنيا هو السالـي
راوي العود يزهالك وتزهالـه=عاد من يقدر ايلومه إليا مالـي
صاحبي والقصايد فيك مختالـه=وأنت لك حق فيهن يوم تختالـي
دام نفسك لحب الشعـر ميالـه=ليه ماصير شاعر وانت في بالي
من تمناك لاتنشد عن احواله=كيف عقب العسل يستطعم الحالي
عقبك النفس مذعوره ومهتالـه=سود الايام هزت برجي العالـي
لكن القلب من يمك على حالـه=في تناسيك ليه اكذب على حالي
قلت لك نعمة النسيان00 زوالـه=ذكرياتك بعضها قـام يبرالـي
كل مامرني طيفك علـى فالـه=قلت يامرحبا في ريحة الغالـي
شلت همك وهمي ماحدأ شالـه=كن قلبك غدى ياصاحبي خالي
إبتعدنا وكلـن راح فـي حالـه=بين هالناس لكن كنـي الحالـي
يا سعودلا تنشد تـرى مانـي مجيـب=خل الذي خافي لـه شهـور.. خافـي
إن شفتني مغتاظ.. لي حق و مصيـب=يا سعـود مزعلنـي جديـد اكتشافـي
الغالي اللي كـان مـن قلبـي قريـب=بيني و بينه.. صـار مثـل التجافـي
إن قلـت زلـه.. مثلنـا زلتـه عيـب=من قال لك شمس الضحى مـا تشافـي
إن قلت هقوه.. يمكن تصيب و تخيـب=كم لي سنه .. ما شفت فيـه اختلافـي
و إن صار في نفسه بعض شكة و ريب=حتى البحر ما هو على طـول صافـي
صرنا من الصده .. سوات المصاويب=كلن نقـل جرحـه و قـال: امتعافـي
أصعب فراق.. فراق عكف الأشانيـب=مـا هـو مفـارق لابسـات الغدافـي
و الذيب لا منه عوى.. جاوبـه ذيـب=و العلم حامض.. بس ويـن الأشافـي؟
دامه لقى لـه غيـر قلبـي معازيـب=الله يسمـح درب هــاك السنـافـي
يروح.. لا يرجي رسـول و مكاتيـب=هو خابر إنـي.. مـا اتلفـت خلافـي
واللـي تعلـى فـوق روس المراقيـب=أكيـد مـا تسقـى عليـه السـوافـي
رح بشر اللي _شال شلفـا_ تريحيـب=قلـه: تـراهـا كلبـوهـا عـوافـي
اليوم نفسي طابـت.. و باكـر يطيـب=جرحي.. لو انه مـن يديـن المشافـي
خلصت.. و الدنيا دروس و تجاريـب=سجل يـا بـو عبدالعزيـز اعترافـي
يا وسيع البـال .. ضيقـت الصـدور=رحت ما علمتني وين انـت سـاري؟
في غيابك.. مـا لخلـق الله حضـور=وفي حضورك.. ما لهم بالبال طـاري
ليـه مـا تختـال يـا بـدر البـدور=و القصايد لك وصيفـات و جـواري
لـك بنـات الفكـر ربـات الخـدور=يكشفن الثامهـن.. و الجـرح عـاري
جعل قلب مـا مـلاه الصـدق نـور=عند وجه اريح.. مـا يلقـى مـزاري
التغاضـي عجـز لا طـال القصـور=ليه أداري؟.. و انت عني منت داري؟؟
الزمـان قصيـر .. والدنيـا تــدور=كل يوم يضيـق فـي عينـي مـداري
صاحبي محتاج لـك شعـر و شعـور=و إحتياجي شي.. ما كـان إختيـاري
من متى و الغصـن يختـار الطيـور=من متى و البـال يختـار الطـواري؟
لا تسمي صمتـي البـارح .. غـرور=إنكساري خلف هالصمـت امتـواري
في غياب الشمس وش ذنـب الزهـور=و المطر لا شح وش ذنب الصحـاري؟
اللقـا لحظـات و الغيـبـه شـهـور=تقصر الخطوات و يطـول انتظـاري
لو قريـت المنكتـب بيـن السطـور=ما كتبـت لغلطـة العمـر اعتـذاري
صمت هالمينا.. مثل صمـت القبـور=ما رسى مركب.. ولا لاحت صواري
كل حاجه طعمها مر فـي هـذا الزمـان=هـم هالدنيـا و حنٌـا نعيـش لهمـهـا
المكان اللي عرفنـاه مـا عـاد المكـان=و القلوب.. أحداث الأيـام زادت غمهـا
صاحبي حتى أنت ما عاد تستاهل حنـان=أنت بعثـرت المشاويـر و انـت تلمهـا
البكا في مثل هالحال نوع مـن الهـوان=و المهونـه كـل رجـال حـر يذمهـا
صاحبي.. لو كان للناس و الدنيـا أمـان=ما تموت ورود الأحـلام قبـل نشمهـا
خل عنك علوم الأحباب .. واللـي كـان=انتهت..وسيـرة الأشـواق مانـي يمهـا
كلما تظما لياليـك قمـت اكتـب عشـان=تنزف جروحي و الأيـام تشـرب دمهـا
الكلام الموحش يخـاف نـور الشمعـدان=تحترق أسمـى معانيـه قبـل يضمهـا
من زمان أكتب على شان تقرا.. من زمان=بس ما شفت المكاتيب جابـت همهـا
ذكراك لاهبت يجي عطرهـا صلـف=واستنشقه بالصـدر مثـل الخزامـى
إي والله إن غيابهامكـلـف كـلـف=إي والله ان عـروق قلبـي تـوامـى
رمش النواعس والحجاجين والزلـف=ياماخـذن قبلـي قلـوب النشـامـى
أمضى من المصقول واسبق من الشلف=سهم الهـوى لوكنـت عنـه اتعامـى
لا يخدعك صبري على الجرح ماخلف=هالشعر غير جـروح قلبـي تدامـى
لي خاطر بينه وبيـن الشقـا حلـف=ياماعثـت فيـه المقـاديـر يـامـا
من عاش هالدنيا بلا صاحب وولـف=عزالله إنـه عـاش عيشـت يتامـى
خل السوالـف والمشاريـه والحلـف=مبطي وأنا علـى الجـروح اتسامـى
قلب(ن)يضيق بذكريات الهوى جلـف=وقلبي مثـل جـرد القفـار يترامـى
ماهـو خطاعشـان ادور معاذيـر=ولاهوغلط عشـان ادور صوابـه
اليوم تـوه عـود لوكـره الطيـر=واصبح يشوف العالم اكثر رحابـه
مستغربين انه ملى قلبـي الخيـر=ليه الغرابة! وين وجـه الغرابـة؟
تعبـت ادور للخطـاوي مشاويـر=ليـن التعـب زاد الليالـي رتابـة
يبكي فرح من شاف بعض التباشير=معذور لـو دمعـه يبلـل ثيابـة
من كنت بأول خامسة طفل صغير=كنت امتلي حزن وغموض وكأبـه
كنت أشعر اني غير والمدرسه غير=هيمان في جو النبـي والصحابـة
كنت المح بوجه الليالـي تعابيـر=وأقراء همومي قبل أعرف الكتابة
والشعر غاااب وله محبة وتقديـر=اول غيابـه شلـت هـم لغيابـه
بالنفس كان لبعض هالأمر تأثيـر=والليلة اهون مـن جنـاح الذبابـه
مفتوح باب الرجى لو هب مليون ريح=والريح ماتاخذ الغرسه مـن عروقهـا
القوس مكسور والرامي يقوم ويطيـح=والسهـم منعـاج والايـام خازوقهـا
لو لبسو ساقط الهرجه ثيـاب المديـح=قلنـا سحابـة وبلـة يابـس حلوقهـا
ياحادي الركب لا توده عليه وتصيـح=ماعاد هي سالفـة ليلـى ومعشوقهـا
مديت شوفي وشفت الكون رحب وفسيح=والارض حدر المواطي والسماء فوقها
مادام عين الرضا ماها هماج وشحيـح=ابتبـع الغيمـة اللـي رفـة بروقهـا
مدري عن المقبلة لكن عسى الله يبيـح=اللي تهـز القلـوب وهزنـي شوقهـا
غنيت للحب ولسـان المحبـة فصيـح=والبدو سبـة غناهـا ضيقـة خلوقهـا
باكر يروح الشتاء والثلج قصره يسيح=مايفضح الثلج غير الشمس وشروقهـا
المـوت هيـن البـلا وش ورا المـوت=عنـد الحسـاب يهـون سهـم المنايـا
باكر نمـوت وتصبـح قبورنـا بيـوت=وعقـب القصـور بضيقـات الزوايـا
في جوف الارض وكل من حولك سكوت=وتعاقبـن بالقـبـر عــوج الحنـايـا
يـارب يامنجـي نبيـك مـن المـوت=سترك وعفـوك يـوم كشـف الخفايـا
باكر اليا جينـا علـى داعـي الصـوت=شيبـان واطفـال وشبـاب وصبـايـا
ندعـي وحنـا بيـن باكـي ومبهـوت=ورحنـا لهـا ننقـاد مـثـل السبـايـا
يـارب تهدينـي قبـل لحظـة الفـوت=وتغفـر ذنوبـي ياكـريـم العطـايـا
اشكيـك هـم داخـل الصـدر مكبـوت=وأيامـي الــي بالخطـايـا مـلايـا
أن لاذ بك من كـان طايـع ومبخـوت=فـي مـن يلـوذ المرتكـب للخطـايـا
يـارب ياقـادر علـى كـل طاغـوت=لا ياقـف اللـي وحـدوبـك خـزايـا
رحماك لامنـا صحينـا مـن المـوت=واليـا وقفنـا عنـد بـابـك عـرايـا
نسيتنـي علمنـي شلـون ابنسـاك=في هالزمن نسيان الاحباب عـادي
وشلون لامرت على البال ذكـراك=وطيفك سرق مني لذيـذ الرقـادي
وشلون لا قالوا لي الناس وش جاك=من كنت في لـذة منامـك تنـادي
وشلون اعيش اللـي بقالـي بليـاك=لا من غدينا كل واحـد.. بـوادي
لو قلت اداوي جرحي اللي تباطـاك=ماكل جرح يفيـد فيه...الضمـادي
اعلنت حبك ليـن كـل .. تمنـاك=غلطه وغيري من خطاي استفـادي
لو لي..مثل قلبـك تمنيت..فرقـاك=واكيد قبلك بالجفا.. صرت بـادي
حلوه عذاريبـك وحلوه..مزايـاك=حتى بيوم فراقنـا.. كنـت هـادي
كن الليالي ودها تكسـب رضـاك=وآنا يطول مع الليالـي .. جهـادي
في ذمتي.. ماهي غريبة خطايـاك=مبطي وقلبك لو تنبهـت.. غـادي
سهله على من كان مثلك..وشرواك=مثل الثياب.. يغيرون .. المبـادي
علمني اكره..ذكرياتك..وطريـاك=وانسى من الليلة.. صدوق الـودادي
ولاني بقايل عقبها ..وين ابـالقاك=راضي لو ان جروح قلبي .. جدادي
ولا القصايد.. جعلها مـن فدايـاك=لبستها..مبطـي ثيـاب ..الحـدادي
باكر على المخطى يدورن الافـلاك=ونشوف.. من يصعب عليه البعادي
:25ar:
مواقع النشر (المفضلة)