[poem=font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
الخطر نزع الطمأنينه بشيّ من الجلاده = أو نقول إنّه دواعي فعل وردود الفعايل
كثر مايُطرح من ارياء ماتبيّن لي وكاده = والأكيد إنّي عرفته بعد ماشفت الهوايل
بين ويلات الحروب / وبين مفهوم الاباده = انبعث قلب الطمأنينه / مكبّل بالغلايل
يشتكي من جرح غاير / في مقرّات السعاده = مع دمار اقصى عروق المنطقه والقصف هايل
الهوى طبّه طبيبه / ماتداويه العياده = ( والجروح قصاص ) معروفه تعدّل كلّ مايل
والخطر جرح المحبّه في قليل وفي زياده = والظليمه حرب / والدنيا تناقض من تفايل
والحبيب اللّي تعدّى درب محظور السياده = جاب علم التاليه / من قدم تنداه الاوايل
شي في نفسه ولادري .. له هدف يبغى مراده؟ = كل فعله مايحمّض .. لا .. ولاله من جمايل
مرّةٍ زلّه .. ومرّه جرح .. وامرارٍ نكاده = وش بقى ؟ لاصار ساس المنزله / للسقط آيل
لو بغيت اقتصّ .. مالت معه سُلْطات القياده = وان تماديت بسكوتي ... تَصعب حلول المسايل
التجارب فــ / الحياه .. إبها دروسٍ مستفاده = من كثير الناس .. يكفي .. لِن صفت ناسٍ قلايل
والهوى : جرعة غدر .. من يطلبه يسقيه ساده = مايميزه .. كود واحد .. جامعٍ علم السوايل
والخساره فــ / العمر .. والعمر من بعد الولاده = والسعيد من البشر ... من يجمع خيار المثايل
والغريب فــ / غربته .. ماهو غريبٍ عن بلاده = الغريب : اللّي فــ / وسط اهله .. ومقطوع الوسايل
قيل : والاخلاص في صلب العمل .. يُحسَب عباده = والنجوم تشوم / مثل الشعر وحروفٍ جزايل
والجريمه فــ / المحبّه / مالها محضر إفاده = شيّ يُعْرَفْ ... ضدّ مجهول المسمّى والدلايل
والحقيقه : في مغبّ بحور / ماتبغى شهاده = والغبينه : نار للرجّال ... تشعل بالفتايل
سامر القلب العليل .. الهمّ .. والليل .. وسواده = والهجوس .. تروح .. وتجيب الدموع اللّي تهايل
مابقى لي غير .. حرف .. وجرح .. وعطور .. وقلاده = كلّ ماحاولت ابنسى .. صارت لجرحي تحايل
والخطر : خوفٍ .. ولاهو .. خوفٍ من الموت عاده = الخطر : إنّه يصير الحبّ .. وسط القلب .. زايل[/poem]
مواقع النشر (المفضلة)