مرحبــــــــــــا بالحلوين
عارفة ان العنوان عجبكم عشان كدا دخلتوا
عرفت انكم ملقوفين :*
تبغوا تعرفوا ايش هي المفاجئة :5ar:

بصراحة اول مرة اجيب حلى لكم $777
حلى من عمل ايدي اليوم سويته وحبيت
اصوره ليكم عشان تجربوه لانه بصراحة
مرة طعمه خيال واي واحد مايحب التمر
بياكله غصب بهادي الطريقة
طريقة سهلة جدا وتخلصيها في نص ساعة
ابدا دحين معاكم بالطريقة خطوة خطوة وبالصور
عشان تتسهل ليكم اكتر

حلاوة التمر

المقادير :

تمر خالي من البذور الكمية اللي تحبيها
انا تقريبا فصفصت اربعين تمرة
نص اصباع زبدة
علبتين بسكوت شاهي مطحون (اولكر)
علبة قشطة
علبة وسط حليب نستلة مركز
جبن كيري 12 حبة
ملعقتين طعام شوكولاتة بودرة
اعواد خلال


الطريقة :

سيحي الزبدة على النار في قدر وارمي عليها التمر
وقلبي الين تصير لينة معاك وتشرب كل الزبدة
ورشي عليها شوية بسكوت عشان تتماسك معاك اكتر




تبدائي تكوري فيها على شكل كور صغيرة زي اللي في الصورة




بعد كدا تاخدي البسكوت المطحون
وتدحرجي التمرة عليها من جميع الجهات




وبعد ماتخلصي الكمية ترصيها في البايركس وتصير بهدا الشكل



تاخدي اعواد الخلال وتغرسيها في كل تمرة كما هو موضح في الصورة




نبدا دحين بعمل الخلطة اللي هي جبن كيري وقشطة
ونستلة ونحطها كلها في خلاط الاز از اوخلاط الكيك
وتصير معاك وسط لاتقيلة ولا خفيفة
وتصبيها بحذر على كور التمر عشان ماتجي
على الاعواد وتخبصلك الحلاوة
وتتركي كمية بسيطة منها تقريبا ربع الخلطة تخليها على جنب




باقي الخلطة تضيفي عليها الشوكولاتة
وتخليطها جيدا
وبعدين تصبيها فوق الخلطة على شكل رخامة زي الصورة وهدا شكلها
النهائي وتحطيها نص ساعة في التلاجة الين تتماسك



وانا نقصت كم حبة عشان تشوفوا شكلها النهائي
واتمنى تعجبكم




وبالهناء والعافية
:confused: :confused:


اختــــــــــــــكم
نورمينـــــــــــــــــــا