من روائـــع الشاعر سعد الحريص التي اعجبتني وحبيت تستمتعون بقرائتها
/
\
/
\
البارحه غنيت يـا حـادي العيـس//واليوم صمتك عن عيونـي حدانـي
اليوم تلعب بي ريـاح الهواجيـس//ولادري عشانك ضيقتي أو عشاني
ما بين لوعات الجفا والوساويـس//البرد ساكن فـارتعـاش المحانـي
وانا حبيس الصمت سجن الاحاسيس// ضاق الزمان ولا وسعنـي مكانـي
والنور طعمه في عيون المحابيـس// مـرٍ مثـل طعـم الكـلام بلسانـي
متى بشعـري يزهـرنّ الكراريـس// ومتـى بقلبـي يمطـرن الأغانـي
بيت الشعر ماهـو كـلام براطيـس// ليـت القصايـد بالدفاتـر مبـانـي
والله ليفرق شعر من يرجي الكيـس// عن شعر من ينحت صخور المعاني
ويبان فرقـي باختـلاف المقاييـس// حتى تحس بصدق وش كثر اعانـي
والا الأماني راس مـال المفاليـس// عزي لمن كانـت جـداه الأمانـي
/
/
/
هذا الكلام جروح واوجاع واشواك// كنّي على طول السكوت مغصوبـي
ازعلت ذولا..لجل يرضون ذولاك// لا مرضيٍ نفسي ولاهم رضوبـي
تعبت اقلب فـي يدينـي هدايـاك// وتعبت اشاور توبتي فـي ذنوبـي
لولا الزمن لولا الليالـي ولـولاك//ماصار طيبي دوب حبـك ودوبـي
هب الهوى يمك وبانـت خفايـاك//ولاعاد لك قلـب يميـل للهبوبـي
اول عيوبك في عيونـي مزايـاك//واليوم ميزاتـي بعينـك عيوبـي
وكانك تشوح اليوم منـا ومنـاك//والله لا ارجع كل الانظار صوبـي
وان قلت انا بنساك ياسرع مانساك//من قبل ينشف عطرك اللي بثوبي
الشمس باكـر فيـك وإلا بليـاك// ماهيب لاموتي ولاهـي غروبـي
وإذا انقطع درب يجيبني بذكـراك//كل الدروب اللي تـودي دروبـي
/
/
/
ضاقت الارض واشتد الزمان
................................راح وقت الهموم الشاعرية
من فقدتك وانا ماني بأمـان
...............................والقصايد ماعادت منبريـة
كنت اجيلك وكان الشعر كان
.............................ورد روحي وقلبي مزهريـة
اكثري حب واكثرك الحنـان
............................وش كثر كانت الدنيا طريـة
من حنانك يضيق بنا المكان
..............................وين ما اروح القاك اكثريـة
/
/
/
مريت فينا ليلـة مالهـا وصـف
.................................في وصفها ضاقت علـي العبـارة
رحبه جميله ناعمه جوهـا تـرف
.................................مثلك حبيبي واسعدتنـي الزيـاره
فعيونك التحنان وفقلبـك العطـف
.................................رغم السنين وفي سلامك حـراره
نظرتك حب وبسمتك كلها لطـف
....................................يلوق لك ثوب البهـا والطهـاره
من جرحك الأول إلى جرحك الألف
.....................................قصيدتي بيـن الألـم والمـراره
واللي كتب فرقاك ما جاز لي حرف
..............................عقبك ولا قلت افدحي يا خسـاره
اقول في نفسي ورجلي على جرف
.....................................إمـا عمـار القلـب والا دمـاره
لا طاب لك جرح ولا منقطع نزف
...............................والوقت مر وحان رفـع الستـاره
/
/
/
غابت الشمس وإلا الحزن له مغربه//وين أبغرب وأنا حزني غروبه ثقيـل
مجدبه ياجروحي والسمـاء معشبـه//ساكنه والهوى ميل جريـد النخيـل
بـارده ياحروفـي والدفـاء موهبـه//بارده مثل برد الخـوف والمستحيـل
صوتٍ أبعيد في قلبي ياليـت أقربـه//وبين قلبي ومابينـي طريـقٍ طويـل
ليت حزني مثل حزن البشر وأكتبـه//وليت دمعي مثل دمع العيون ويسيـل
أشهد أني ردي حـظ وردي تجربـه//وأشهد أني على بعض المشاعر بخيل
أيه مذنب في هالدنيـا وهـي مذنبـه//من دفا حلمي الطيب لبـرد الرحيـل
عذري اللـي متعبنّـي وأنـا متعبـه//مال قلبي على بعض الهقاوي دليـل
كل طيرٍ له اللـي بالسمـاء يجذبـه//وكل غصنٍ تجوز له الهبايب يميـل
صرت أقول الكلام المر وأستعذبـه//صرت أخاف الدفاء لوني وحيدٍ نحيل
كم صبرت وليال الصبـر مستغربـه//لين قلة حلاة الصبر لو هـو جميـل
الزمن صعب والنسيان يـا مصعبـه//والدفاتـر نشيّلهـا الهمـوم وتشيـل
/
/
/
يا حادي الركب لا تنطح هجير الشمـوس//و أحجب ظما البيد عن ماها و عن عيسها
كل ٍ علـى قـد فهمـه و الليالـي دروس//و هل الحجـا تفهـم الدنيـا و تدريسهـا
و الشجره اللي علت في جذعها نخر سوس//لو تصبر الريح عنها كـان مـا جيسهـا
ابقطع الصمت في صوت ٍ كما حـد مـوس// و أقرع طبول الوفا و أضـرب مراويسهـا
ما كانت الحرب إلا حرب روم و مجـوس// و إلا أرضهـا يعربيهـا فـي تضاريسهـا
في قدومها تفتن الأنظـار مثـل العـروس// و عجوز شمطى إذا أقفت فـي هداريسهـا
ليا قبست قل طالبهـا و طـاب الجلـوس// لـو قلـت يـا كثرهـم فينـا معاريسهـا
ماهي بداحس و غبراهم و حرب البسوس// جحافـل الـروم تزمـي فـي كراديسهـا
أقول وجه الزمـن باكـر علينـا عبـوس// والله يكـذب فـزع نفسـي و أحاسيسهـا
/
/
/
العذر مكتوب لاصـار الخطـاء مقـري//آسف على ضحكتي وآسف على احزاني
خطـاي معـذور والا غلطتـي عـذري//و مرارة العذر في قلبـي وفـي لسانـي
مدري وش اللي ذكرت وضاق به صدري//مدري وش اللـي نسيـت ولاتنسانـي
لبست انا ثـوب لاطولـي ولا قصـري//ياطيبـه القلـب ويـن القلـب ودانـي
سنتين من عمرها مرت ومـن عمـري//سنتيـن احـس الزمـن فيهـا تعدانـي
سنتين مرت حياتـي مـن ورا ظهـري//والحب سجنـي ومسجونـي وسجانـي
والشعر مطرود من قلبي ومـن فكـري//سنتين ماني ب انا مانـي باحـد ثانـي
غنيت للنـاس والدنيـاء علـى خبـري//والشعر في دفتـري مغـرور وانسانـي
غنيـت للحـب يـوم عيونهـا تغـري//يوم الوفـاء والكـلام الطيـب الحانـي
غنيت للدمـع يـوم(ن) البكـى كبـري//واليوم انا اكبر من دموعـي وحرمانـي
اليوم ماعاد يمدي اللـي جـرح يبـري//مليـت كثـرت خطاياهـم وغفـرانـي
مليت انا الشعر مل الشعر مـن شعـري//مليت انا الحـب مـل الحـب وجدانـي
و لو هي عليه عزيز النفس من صغري//ما شاور القلـب فـي كرهـي لعدوانـي
ان رحت ياكثرهـم وان جيـت ياكثـري//ضاقت بي عيونهم لـو كنـت وحدانـي
تعبت وازريـت مامليـت مـن صبـري//ليـت الـذي راح منـي كثـر ماجانـي
احيان ودي اطيح مـن التعـب وازري// و تشيلنـي عزتـي وسلـوم جـدانـي
/
/
/
أنفض كلامك عن غباره
..............................صمتك فقلبك لـه رنيـن
قلبك ماكـان إلا مغـاره
............................ترسم بها جـرحٍ حزيـن
رسمٍ نقشته في حجـاره
...............................يشبـه رسـوم الأوليـن
ياوجهٍ أخجل من وقـاره
.......................... حلو النبا سمح الجبيـن
ربح الزمن هذا خسـاره
...........................والخافيـه باكـر تبيـن
طاحة فأمريكـا عمـاره
..........................هزت ديـار المسلميـن
منها بدت حرب الحضاره
.............................حـربٍ تـروع الآمنيـن
ماتاسع الجـرح العبـاره
........................ويضيق فالصدر الآنيـن
أصعب من الموت أنتظاره
.......................والأصعب العيش المهين
مواقع النشر (المفضلة)