رثاء ..كتابة وإنشاد ..... خمسه صفر ..
مرثيه في والدي رحمه الله ... نايف المسعودي .. الذي وافاه الأجل في عصر الجمعه الموافق 5/ صفر / 1428هـ... بالريااااض ..
[poem=font="simplified arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
خمسه صفر ضاقت علي الوسيعات = في يوم جمعه يغتشيني ظلامه
اغيب في لحظه ولو فقت لحظات =غديت مثل اللي فزع من منامه
تاطن ياسود الليالي وعجلات =ولانفقد إلاّ الرووس واهل الفخامه
هيهات يارووس الرياجيل هيهات= هيهات ياراع الكرم والزعامه
هيهات اجر الصوت يابوي حسرات =ياللي عليك اسمي رفيع ٍ مقامه
ولالي جدا ياكود ذرف الغزيرات=وقلب ٍ على فرقاك حل انحطامه
والله لأبكي وأذرف الدمع زافات =عليك ياشيخ ٍ حميت الجهامه
وتبكي جموع ٍ فوق قبرك غفيرات =وعُود ٍ يبس ضاميك مات بصرامه
وعليك تلعات الرقاب الستيرات =من دمعهن فوقك تنثر غمامه
ويبكيك قصر ٍ هامته للطويلات =ويبكي شداد ٍ مارتخى للمسامه
عليك ياشيخ الحكم والمروات =يامالك الشيمه عزيز الكرامه
عزيز قوم وساس صنع الجميلات =مايحتري مردود كف الشهامه
ريف النشاما فالليالي العسيرات =والطيب يبقى في فعوله علامه
حمايها في وقفته للصقيلات =والفعل من يمناه يثبت احكامه
كف العطا يمناه مد الجزيلات =من ساس جده مع خوال وعمامه
حلال من صكت عليه الصعيبات =ولا يلحق العاجز لك الله ملامه
شيال حمل اللي حموله ثقيلات =تخف من ثقله بعزم وصرامه
مامد كفه للكفوف الرديات =فهيم كفه صافحه للزعامه
ولا يلتفت يم الحكي والدعايات=يرجح بميزان المراجل كلامه
يقلط على فعله رجال الشكالات =ولا يلحق المقفي كثير الندامه
الغايب الحاضر بصيته ولو مات =له بصمة ٍ تبقى ليوم القيامه
العمر رحله والليالي محطات =وليا وفت .. لّقْبْ .. بالاسم انظمامه
قدوم ومغادر وللخلق رحلات=وكل ٍ تحمد له وصول السلامه
والله خلقنا في زمنا مقامات =وكل ٍ على قدره بقدر احترامه
نمشي بذا الدنيا ونسلك مسارات=مسار خير وشر لاهل الفهامه
احد ٍ مساره خير في كل حزات =واحد ٍ على درب الندامه هدامه
يالله ياكاشف صدور ٍ خفيات =يامبين ٍ درب الحلال وحرامه
اقولها مره ومره ومرات =تجلي بنورك عتمته من ظلامه
وتدخل الغالي جنان ٍ فسيحات =والفوز بالفردوس يوم القيامه
يالله من غر المزون المحيزات =تسقي ثرى قبره وتروي مقامه
وتغفر له الزله وكل الخطيات =دعواى تقبلها لعبدك مرامه
عبد ٍ دعاك بحكم تنزيل الايات =يرفع يديه وينحني لك بهامه
وختامها يافارج ٍ كل كربات =باسمك دعيت اتقبله في ختامه[/poem]
الحرالأشقر
رد مع اقتباس
مواقع النشر (المفضلة)