البديل للمقاطعه... احلام اقتصاديه:-اربد نت
لأني بنت صناع الحياه وكانت السبب الأساسي بدخولي عالم المنتديات ... كبرت
معها فكره بعد فكره ومشروع بعد مشروع وتعلمت انه لازم لكل تراجع عن قرار بديل
وانه الكلام ما بغير كتير والفعل أهم بكثير ... وخاصة كمسلمين .. يمكن ما شاركت
كتير بالحديث عن الإحداث الدنمركية مع إني استفدت وفهمت كثير أمور من المواضيع
المضافة بس ظل السؤال شو يا ترى البديل؟؟؟ قاطعنا أشهر وسنوات وبعدين شو ح نعمل؟
وخاصة بعد تصريحات الدنمرك بخسائر لمليارات الدولارات يعني كنا بشهر ندعمهم
بمليارات ويتقدموا على حسابنا وإحنا مرتاحين!! طيب هال منتجات يلي كنا ب نستهلكها بمليارات
كم ممكن نتوقف عنها أو نمتنع عن شراءها؟؟ ولو شيء ثانوي ليش أصلا بندفع ه المبالغ الكبيرة؟
اسئله كتير بتدور ببالنا ... ولازم في حل وبديل لنستمر الخسائر والصحوه ونثبت انا ما بنتنازل
عن حقنا تجاه دينا ورسولنا الكريم ...
طبعا خلال حديثي مع مجموعة صناع الحياه بالرياض وكنا بنشتغل دايما مع بعض
خبروني بأنهم بيحاولوا جمع مبالغ كبيره لتعويض أصحاب المجمعات التجارية التي أعلنت المقاطعة
يعني لما نحكي العزيزيه وكارفور والعثيمين والتميمي والعزيزيه بجدة و نحن نتكلّم عن ملايين
ويلي بيعيشوا بالسعوديه ودول الخليج ممكن بيعرفوا اكتر وبيستوعبوا الوضع
وانه تسحب هيك كميات يعني خساره كبيره عليهم ومنع الاستيراد لكميات جديده يعني
عجز يصيب الدنمرك... وكان البديل انه يتم شراء الكميات او تعويض اصحابها بجزء
من المبلغ واتلافها والباقي ربنا اكيد بيعوضهم فيه... قاطعوا واعطو بديل مؤقت عملوا شيء
واستوقفتني حادثه خبرنا عنها مشارك فلسطيني معنا عن رجل من بيت لحم واسمعوها
اذا بتحبوا " كان هذا الرجل راجع لبيته ببيت لحم بعد تعب وقطف الزيتون وعصره وانتج
30 تنكه ولما حملها ورجع لبيته اوقفوه الجيش الصهيوني عند المعبر وطلبوا منه يشتم
رسولنا الكريم لعنهم الله مقابل ان يعبر مع كميات الزيت فرفض واخذوا يسكبوا تنكه وتنكه
حتى فاضت الارض بالزيت رجع فرحان مع انه كان شريط مراحل التعب والشقاء بتمر
بخاطره بس المهم ما تنازل ولا رضي يسئ لأكرم البشر ... فاقسم الرجل بانه ما ان فتح باب بيته
إلا وامامه 30 تنكة زيت ... ربنا كريم يا اخوان وعوضه وانتصر لرسولنا وعوضه
من وين؟؟ سمعوا اهل البلد بقصته وصار كل واحد يحمل تنكه ويحطها في بيته"
اقسملنا بانه سمع بهالقصه وانها حقيقه وفعلا ما تمالكت نفسي فرح وحزن واعتزاز وكل
المشاعر يلي ربنا خلقها فينا
الفكره والاحلام الاقتصاديه:-
بعد هالمقدمه الطويله ويمكن البعض يسميها محاضره بدي احكيلكم عن جنوني وشو البديل
بنظري .. البديل يا اخوان انا نسعى لايجاد سوق بديل للسوق الدنماركي .. طيب كلكم بتحكوا هيك
شو جبت جديد حضرتي؟؟
الفكره انه هالسوق نكون احنا جزء منه ومساهمين بايجاده ؟
كيف يا فالحه؟ طبعا اول كلمه حكالي اياه اخوي
اول شيء نقتنع انه ب نملك القدره ونبحث الامكانيات وبعدها في خطوه كتير مهمه
وهي تعميم النتائج وهالفكره على اكبر قدر ممكن من منتديات او طلاب جامعات او اهالي
وفي شيء مهم وهو تقبل الدول وخاصه السعوديه والخليج وخاصه انه الدراسات اثبتت
بانه السعوديه وحدها تستهلك نصف الانتاج من الدنمارك بانه تساهم بدعم البدائل
وتفتح باب الاستيراد لباقي الدول العربيه ونخرج من القرارات السياسيه بمقاطعات
لمواقف نعلمها جميعا ايام حرب الخليج الاولى والثانيه
كيفية التطبيق:
نرتب الافكار ونحدد المطالب ونجمع اكبر تأييد من المسلمين ولو بنعمل رابط للتصويت
ونقوم بنقلها للسفارات العربيه مثل السعوديه والامارات واكبر الدول المستهلكه
وفيها خطط لمشاريع ممكن من خلالها نؤسس مزارع لانتاج الحليب او دعم شركات عربيه
قائمه اصلا وتحسين انتاجها بما يوازي المنتجات الدنمركيه وغيرها
ممكن يساعدونا
في مقر لجان المرأه ممكن نعمل لسيدات دورات لكيفية انتاج الاجبان والالبان
وفي اشخاص متبرعين بذلك
وكل واحد معنا ممكن يعمل شيء .. كل واحد حتى الطلاب بالمدارس ممكن يساهموا بشي
كل المشاريع الناجحه كانت حلم وصارت هدف وطلعت للنور وخاصه الخالصه لوجه الله وعزة الدين الاسلامي
ممكن نوقف حكي ونبحث عن بدائل يمكن البديل يلي بحكيه مستحيل او ما بنقدر عليه
ما بنملك الاراده والايام والثقه بانه ربنا رح يوفقنا
بس انت فكر كمان ببديل لنستمر بشئ بديناه وما تهبط معنوياتنا كالعاده وننسى
ويرجعوا يستهينوا فينا اكثر ..دينا دعانا للعمل والجهد والانجاز
في خطط اوليه بحاول ارتبها ممكن انجح لو بكسب صوت معي من بينكم
ومن اهلي صوت ومن الاصدقاء صوت ومن الحاره صوت يمكن بدنا وقت
لنشوف النتائج بس بالنهايه بكون حاولت وممكن اقابل ربنا وسيدنا محمد واحكي
اني حاولت وجربت بقدر استطاعتي .. ممكن هالمحاوله تغفرلي كتير عن الايام
يلي ضيعتها بالحكي والتنظير اذا تحملتني للنهايه خبرني انت شو البديل عندك
وشو رأيك " هبل"ولا "بحلم" ولا مستحيل
ولا حتكون ايدك وايدي وايدهم جميعا وحده ونحاول؟؟
عن جد بستنى جوابك شو ما كان
هذه رسالة لكم و لكل من يهمه الأمــر في كل المنتديات و المواقع و الأماكن .. مشرفة في منتدى اربدنت الثقافي الإعلامي العربي الأردني و نرجو منكم التفاعل أو حتى نشر تلك الرسالة لكل من يهمه الأمر ( بنت الأردن )
شـــكرا
