بسم الله الرحمن الرحيم

قصيدة غلطان من قال خيره كل تأخيره ٢٠١٤

غلطـــان من قال خيره كل تأخيره ...

مايستوي في السَبَق ريّض وعجلاني...





الحـــق ماكــل تأخيــــره بــــها خيــــره ...

كم فرصةٍ ضايعه من عمر الإنســاني...



طرايد الصيـــد ماتهـــدأ عـــلى ســـيره ...

تبـــــغالـــــها راميٍ ماهـــو بمتـــواني...



رامي ســـريعٍ بتصـــويـــــبه وتذخيـــره ...

إن فاتها الســــهم الأول صابـها الثاني...



الوقت ماينتــظر من عـاش في حـــيره ...

والــدرب ماينمشــي من غيــر برهاني...



كل المصـابيـح تطفي فـي مشــــاويره ...

مايجــلي الظلمـــه إلا نــــور الإيمــاني...



احسب مكاسب زمانك من مخاسـيره ...

قــدام تطلــع من المشـــوار خســـراني...



ماكل ميـــراد مرتـــويــــــه مصــــاديــره ...

كـــم واردٍ غـــادر الميـــراد ظميـــــاني...



بايامنا من وصــــوف الخيل تصـويــــره ...

تقبــل وتقــفي وعمــر العبــد ميـــداني...



تقبـــل مغيــره عليه وتقــفي مغيــــره ...

حتــى يغـــادر من الميـــدان وحـــداني...



يانايـم الليل حلمـــك ويش تفســــيره ...

القلب في غفــلته والطـــرف نعســــاني...



مايقطـع الــدرب من ديــره ليا ديــــــره ...

إلا غــلامٍ ســـرى والصبــــح مابــــاني...



إن شـــفت نبت الربيع تفوح أزاهـــيره ...

إحــذر تباطــا تقـــول أمــداه وامــداني...



إليــا تبـــاطيت في غفـــله وتفكيـــره ...

ماتـنـتـبــه لين وإليــا كل شــي فــــاني...



إغنــم ربيعـــك ليا عجّــت نواويــــــــره ...

واقطــف ثمــارك مادام العــود ريــاني...



فرصتــك ماغيـرها والعمـر ماغيــــــــره ...

قبلـك ربيـعي ( تباطيـت.. وتعــــداني )...