هـل أجـمـع الأحـزان
هل أجمع الأحزان وألم همي=هل أشحن الأجراح في قلب مجروح
هل أمزج العبره بتركيب دمي=هل آخذ أفراحي على حب مذبوح
هل أتبع اللوعات مع كل يمي=هل أستطيع أمسح من الدمع مسفوح
يسرف على الخدين فوارجمي=من موقه الدافي جرى سرف ناضوح
هل أجمع أشتات الشقاوه وألمي=وأحط أنا المسموح في غيرمسموح
ماأدري عن الجابات ماأقدرأسمي=كنيتها لايصبح السد مفضوح
مابين ذاك وذاك والهم عمي=يسوق رغباتي على مذبح الروح
لوكان أبويه ماتزوج على أمي=كان إسترحت من العنا قبل ماأروح
لأحباب ماقالوا ترى العلم تمي=إقلط تفضل قدمك الباب مفتوح
إن قلة الفرحه من الغبن شمي=يانفس ماليها الشقا غبن وجروح
شمي عذابك لا تقولين ثمي=مافيه ثم وكل ماجاك ممنوح
خوذي من اللوعه وبالحزن ضمي=بأحضانك الغربال ضميه لايروح
ضمي عذابك تحت ردن وكمي=خليه يبني بالخفا قصرواصروح
بي حسرتي وآقولها ملي فمي=حيث إن مالي منك يازين مصلوح
لك حب لكن حب ماله منمي=ماأحد إمنميله وأنا همي النوح
ياشوق زدني منك لوعه وغمي=زدني عذاب وهات مع كل ساموح
كل ماسمحلك وقت زود بسمي=أنته وماسويت ياشوق مملوح
الموج هاج إبغبة البحرطمي=طم المركب ثم واصلت في لوح
موج هبط بيه وموج يزمي=ويصفق عليْ عاصف هوى كل لافوح
ماغيرألوح فوق لوحي وأومي=في جومابه للرؤى صافي أوضوح
أنا العذاب وكل مابي يهمي=ودرسي من الأيام والوقت مشروح
إن كانت أسماع المحبين صمي=صوتي تصاعد بالنداء صاح مصدوح
سمع الصفا واللي بالأحباب ذمي=من به بقايا حب للعرض مطروح
هل كل هذا ياغلا مايهمي=ماله مجازومن خوافيك ممسوح
دعوة موده ياعساها تعمي=نادى بها شوق الغلا كل مملوح
شبعت غبن وشلت حزني وهمي=يوم أشحن الأجراح في قلب مجروح
رد مع اقتباس
مواقع النشر (المفضلة)