هذه القصيده في الطير هي الفائزه في المعرض
الدولي للصيد والفروسيه في ابوظبي 2005

للشاعر :مشعل عواض العتيبي.


ياطير ريشك زان عن ريشك العام
وامن المواري فيك عشرين شاره
وراعيك من كثر الهواجيس مانام
مخنوق من جو البلد والحضاره
القيض خلاني من البيت لزام
ولاني من هوات السفر والتجاره
تجارتي شوفك مع ربع احشام
في خايع عشب البسيطه خضاره
بأول دخول الوسم والغيث مرزام
والليل زاد بحسبته عن نهاره
وكلٍ بقلبه علم والرب علام
وراعي الولع فكره على الطير داره
لاصرت ياطير السعد وافي ٍ تام
ولاصار صقارك يعرف الصقاره
طيرٍ عليه الوصف للصيد جزام
هو غاية اللي عاشقين النداره
جثل المناكب والنحر منه قدام
افهق جناحينه خذت بالصداره
هبرٍ مجسه مايجي ريش وعظام
يفرق على وصف الطيور بجداره
ومفرع بياض الراس قطعه من الخام
واللي بقى خالط حماره شقاره
يقصر من الشبرين من رؤس الاقدام
وعرضه غلب طوله بزين ومهاره
واكفوفه الحرشا على الوكر تنظام
وألا استدار ..الوكر ضيق مداره
بوزه عريض ومنخره مبرم ابرام
طلق الحجاج وعين مثل الشراره
عاري خفيف الريش ضاري وضرغام
اجرد وفيه من الدقوق بغزاره
إليا نطحته كنه الغيم لا هام
وإليا قفيته شفت نيران واره
مشددٍ يلفت نظر كل سوام
ودق بشليله مثل جمر الزقاره
من عاتقه تلقاه متزين وزام
كنه يشخصها بوسط الزباره
وله صيادٍ لا من ضرب مدمي وسام
مثل الرصاص اللي مضبط عياره
افحج مسرول هجر ملموم مقدام
من وين ماجيته صخاه ووقاره
ولا قيل تلاب ٍ ولا قيل ردام
معاودي صاملٍ في طياره
العام فرخ وهالسنه بكر عزام
مثل الشجاع اللي براسه نعاره
يستاهل التقدير مني والآكرام
لأنه خوي الدرب وقت المناره
ما جاني من الترك وإلا من الشام
عطية الدبوس رجل النماره
يسلم ولد سلمان من شر الايام
واللي بعد بالطير ساق البشاره






¸.
•
( `•.¸
`•.¸ )
(¸. •'(¸.•' * `'•.¸)`'•.¸ )
.• `•.¸
`•.¸ )
وردة ,,
(¸. •'* `'•.¸)`'•.¸ )
.• `•.¸ الـــــــروح,,
`•.¸ )

¸.•
(`'•.¸(` '•. ¸ * ¸