الــجزء الثامن
*
!! صدمتني فيك !!
باللي سويته من ثواني ..
{ يعني اش قصدك }
تبي تخليني منك اعاني ..
بيت بو عبدالرحمن
شما
يلست على الشبريه وربعت ريلي ، لين الحين مب مستوعبه الي قاله خالد حسيت برجفه في ايدي بعدها انتقلت الرجفه لكل جسمي ، قاومت دمعه في عيني تبا تنزل بس للأسف نزلت
غمضت عيني وأنا أذكر الموقف
خالد: يا حرم خالد ، يا عبدالرحمن وابوج يدرون ؟؟؟؟ اختاري عاد !!!!!!!!
طالعته مب مستوعبه : بشو يدرون
خالد : بالي فيج ، ما يندرى بويه بس ولا لج سوالف بعد
شما : شو أنت ما تستحي على ويهك شو يالس تقول ، أي سوالف
تجدم مني وطالعني بغضب : شو أي سوالف شوفي فديتج اذا هلج مدمغين وما يدرون تراني عارف كل سوالفكم أنتو البويات فاهمه
ما شفت جدامي لحظتها وركضت من جدامه بس ما وحالي الا بايد تمسكني :
خالد : اليوم شو الخميس ، الخميس الياي ابغي اسمع ردج ، جان ردج لاء نفس اللحظة بخلي عبدالرحمن وابوج يدرون بسوالفج ، وجان ردج هيه أنا بس الي بدري ، قالي باستهزاء : وشوفي عاد لو لاء ، شو بيصير فيج ، ما اظن لو قتلهم زوجوني اياها بياخذون رايج ، يعني في الحالتين بتاخذيني بس الفرق أن بتنفضحين جدام الكل ، عاد أنتي بهواج تبين الكل يعرف ولا حبيب قلبج خالد بس
هد ايدي بعد هالكلام الجارح والتهديد الصريح ، صديت عنه و توجهت لبيتنا وأنا يائسة مصدومه غضبانه كاره عمري كل شي تقدرون تقولون ، ودخلت غرفتي
ياربي شو أسوي لو عبدالرحمن عرف ، شو بيسوي فيني ، معقوله يجتلني ، أكيد ، وأبويه ، شو بيصير فيه ، كيف بستر على عمريه بأني أوافق أخذه بس كيف أخذه ،أخذ خالد خالد الي بسببه تخليت عن أنوثتي بسبب رفضه لحبي ، والحين يباني أوافق عليه ، بعد ما غرست كرهه في قلبي ، بعد ما صار ما يعنيلي ، لاء دخيلكم ، انا حالفه ما أخذه ولو شو ما باخذه ، وبشوف أخرتها وياك يا خالد ، لازم أمسك عليه شي قبل يوم الخميس عسب يوم الخميس أهدده بهالشي بس شو ، شو يا شما ؟ ومن وين بتيبينه هالشي الي بمسكه على خالد من وين ؟؟ لحظة عويش
مافي غير عويش ؟؟
رحت بسرعه صوب مبايلي ودقيت لعواش بنت عمي مثل المينونه :ألو
عواش:هلا وغلا شميم
شما : مب وقته سمعي عواش أي وقت خالد بيطلع من بيتكم دقيلي على طول أبغي أي عندكم ضروري دخيلج
عواش: شو السالفه شميم
شما : سوي الي قتلج عليه
وصكيت التلفون في ويها مب وقتها تسأل، أ رحت الحمام وغسلت ويهي وطالعت ويهي ،أنا ريال ومافي شي بياثر عليه ولين يوم الخميس وايد أشياء بتتغير ، وبنشوف يا خالد ، يا أنا يا أنت .؟.؟ دام تام برع فتره طويله لا حسيب ولا رقيب أكيد له قصة ولا قصتين الا قولي قصص حب يا رب يطلع متزوج وعنده عيال ، يا رب
أوووووووووف كيف أفكر وليش ما قال لاهله ، اذا متزوج ، ليش ؟؟ امممم ماعلي بنشوف آخرتها ؟
وان شاء الله أنا الي بكسب في هالحرب يا خالد أنا مب أنت بنشوف آخرتها وياك
ثاني يوم
الجمعه
بيت ميره
شمسه
يا ربي اليوم ماشي دوام ما بشوف سلطان ، امممممممم ساعه كم الحين
خيبه مسرع ما صارت 3 ونص
وبعدين يعني أبغي اشوفه ، امممم ، رقمه انحفر في راسي بس ما أقدر ، ما أقدر اتصل فيه لو شو ما صار ما بتصل ، أنا بنت ناس وعمري ما فكرت بهالطريقه ، بس هالانسان غير ، هالانسان أحسه وفي ، أحسه برئ ،ما أتوقع أن هالويه يعرف بنات أو يرمس بنات أتوقعه صادق ، حساس ، رومنسي ، يعني مثل ما أبغيه هذا هو فارس أحلامي مافي غيره ، شو أسوي الحين
أسير بيتهم يعني ، يا ربي ارحمني ،،، امممم أمي ما قالتلي سالفتها ويا هالريال بوناصر ، مافي غير اخليه يخطب أمي ويتزوجها ويون يسكنون بيتنا ، عسب أقدر أشوف سلطان ويكون قريب ، لحظة وين سار تفكيري كيف أرضى ،أمايه تتزوج ،أمي أنا ، ويا ريال غير أبويه ، غير الانسان ايل طول عمريه أشوفه ، بس كيف ، كم أقبلها ما أقدر الصراحه ، بس لحظة ما فكرت في شي أمايه مب انسانه مالها احساس ، ليش هالانانيه ايل فينا ، بس منو الي قال أن بوناصر يباها وأنه خاطبنها قبل وأنه كان يحبها كلها تفسيرات وتبريرات من عندي ممكن كان ربيع أخوها وبس ، شو الي خلاني أفكر هالتفكير الامور بدت تتعقد ، الحين كيف أشوفه
اسير بيتهم وني ازور بوناصر ، بس ليش ازوره هذا يارنا مب من اهلي
مافي غيره
بطي
امممممممممممممم
طالعت أختي أسما : أسما بطي وين راح
أسما :أظني في الغرفه الثانيه ليش
شمسه : لاء بس اسأل
قمت من مكاني بسرعه وشفت أمي في ويهي
ميره : وين سايره
شمسه : ها ولا مكان هني ادور بطي
مشت عني أمي ورحت الغرفه الثانيه وين بطي وين راح هذا بعد
شمسه :بطوووووووي
بطي : نعم خالو
شمسه : وين كرتك
بطي : كرتي في الحوي ، ليش
شمسه : مب ناوي تلعب بها
بطي : الحين حر ، بعدين ليش خالو
شمسة :قوم بنلعب بها
بطي : الحين
شمسه : هيه الحين
هز راسه بطي بالموافقه وطلعنا برع ،اووووووف الساعه 3 ونص تقدرون تتخيلون الحر والجو والشمس ، وخاصة بيوم الجمعه بس مافي غير هالحل عسب أشوف سلطان
فر عليه بطي الكره و مسكتها بايدي
بطي : خالو بالريل مب الايد
شميه : كيفي أنا بكون حارس
مسكت الكره : بطي تعال أوقف هني
وقفته على اساس أن وراه يكون الايدار الي يفصل بينا وبين بيت بوناصر
وفريت الكره وابتسمت لما صبت الهدف وطاحت الكره في بيتهم
شمسه : اوييييييييييه
ههههههههههههههه ضحكت في داخلي على ويه بطي المصدوم
بطي : خالو كرتي طارت
شمسه : ماعليه الحين بنسير بنيبها من البيت الثاني
بطي : انا بيبها وبي
شمسه ":شو لاء لاء انا بي وياك
بيت بوناصر
سلطان
آآآآآآآآآآآآآآآآآآخ عنبو ، رااااااااااااااااااااااااااسي ، عثره ، منو عق هالكره
سمعت ضحكة من التلفون
: شو حبيبي منو عق عليك الكره
لحظة منو هاي يالسة تضحك علي
سلطان:أقول قلبي أكلمج خلاف
وصكرت التلفون في ويها عنبو مب باقي الا هاي حطيت ايدي على راسي ويلست افرك المكان الي طاحت عليه الكره :آخ عنبو مب فره مره على راسي قاصدينها اشك والله اني مقصود
طالعت :لحظة هذا بيت شمسه ، ماشي الا ولدهم عنلاته من صبي خلا اشوفه جان ما لعنت خيره
سمعت جرس الباب يدق
رحت للباب وأنا محرج خربوا عليه مكالمتي ويا ربيعتي وهاي يديدة بعد ، أنا براويكم مسودين الويه
فجيت الباب وأنا محرج بس ، زالت كل عصبيتي أول ما شفت ويه شمسه ، يلست أطالعها إلا قولوا أتأملها
لابسة مخوره ووقايه بيت ويايه بيتنا ، امممم جنها ماخذه راحتها بزياده ، بالحل مسموحه دام عيني الي بتتمتع وبتشوف خلا برايه ، ابتسمت لها ابتسامه شقت ويهي
سلطان : مرحبا الساع هلا والله قربوا
سمعت حس الولد يقول بنقمه : خالو هذا نازعني ذاك اليوم
قفط ويهي الحين تخطيطي كله هذا بي يخربه آخر شي
طنشته ويلست أطلع ويه شمسه الي حسيته احمر
شمسه :أخويه كرتنا طاحت عندكم ممكن تعطينا اياها
طالعتها مبهم ما سمعت الي قالته كنت مشغول اتامل ملامح ويها : ها
شفتها احمرت زود : كرتنا
هزيت راسي : هيه هاي كرتكم الي طاحت على راسي
شمسه : آسفه والله ما كان قصديه
ابتسمت لها عيبني الوضع وبغيت ازيد بالرمسه عسب ترمس : بالحل مب مشكله ، والحين شو تبون الكره يعني
طالعتني بمعنى شو تشوف أنت : هيه أخويه لو سمحت
سلطان :اسمي سلطان ، لو تناديني باسمي أحسن
شفتها فجت عينها وطالعتني
سمعت حس الياهل : نحن نبا الكره
أوووووووووف وياه هذا شو يبا
نزلت لمستواه :وانت شو اسمك
الياهل : بطي
سلطان : وخالتك شو اسمها
بطي : ليش
لاحظت أنها ساكته ما شفت ويها ، ما ادري مصدومه مستانسه مستغربه متصنمه ما أعرف شو سالفتها
حسيت بصوت يدي بوناصر : سلطان من عند الباب
سلطان : امممممم يرانا
شفت يدي ياي بسرعه وطالعني بنظره ما عيبتني مول : قوم أنت مرحبا مرحبا بنتي شحالج
فجيت عيني شو يقول هذا خرف شو قوم أنت ما ابغي اخرب صورتي جدام شمسه ولا جان رديت عليه
شمسه : هلا عمي اسمحلنا طاحت كرتنا في بيتكم وينا ناخذها
بوناصر : البيت بيتج الغاليه ، قربي قربي
رحت بعيد عسب يدي ما يلاحظ رحت صوب سيارتي وفجيت الباب وظهرت قلم
ورحت صوب كرتهم الي طاحت على راسي
وكتبت ايميلي ، ما فاد الرقم بس الايميل اكيد بيفيد بتزيغ ادق على رقمي عسب لا اعرف رقمها ، بس الايميل ممكن تسوي أي ايميل وتضيفني عليه
ابتسمت وأنا اشوف يدي واقف وياها برع ، ابتسمت واستانست على خططي ومخي الي بيطيحها طيحه ؟؟؟؟؟؟
شمسه
قلت في خاطري بخوف أمـــــــــــــايه ، شو هالبلشة الي ابتلشت فيها والله لو تدري أمايه ولا اسوم بتستوي لي مصيبه لا صارت ولا استوت ، بلعت ريجي خلصت من سلطان طلعلي هالشيبه وين اقرب الحين
بوناصر : اقربي داخل فديتج أنتي من غريبه نحن اهل
شمسه : لا عمي مرة ثانيه ان شاء الله
شفت سلطان قرب وفي ايده الكره ناولني اياها :
سلطان : هاي كرتكم
هزيت راسي بمعنى هي وشليتها بسرعه
شمسه : مشكورين ، عن أذنكم
مسكت ايد بطي ومشيت به بسرعه صوب بيتنا أول ما دخلت البيت :اوووووووووف ما بغينا
بطي : خالو ، منو هذيل
صديت صوبه أنا كيف نسيته
شمسه : بطي مب تقول لحد أن الكره طاحت بيت اليران
بطي : ليش خالو
شمسه : ما باهم يضحكون عليه ويقولون ما اعرف اشوت
بطي : زين خالو ما بقول
ابتسمت له براحه يا ربي انا كيف سرت بيتهم ، شو سويت في حياتي أنا
طالعت الكره بابتسامه : يعني ما طحتي الا على راسه حرام عليج عورتيه
شفت بطي يطالعني مستغرب : خالو تكلمين الكره
هههههههههههه ابتسمت على عمريه : لاء
لحظة شو هذا شو مكتوب على الكره ، شفت ايميل ، هذا اكيد ايميله
يعني الي كنت افكر فيه صح الرقم كان لي والحين الايميل بعد لي بس شو يبا مني انا قلت ما بتصل فيه ، بس ما يمنع أني اضيفه واشوف شو يبا ، بس مب جني بصغر في عينه لاء لاء شو اضيفه ما يصير ما بضيفه ولا برمسه كيف فكرت اصلا
طالعت الايميل امممم رحت بسرعه صوب المطبخ وفجيت الماي وغسلت الكره عسب محد يلاحظ الايميل وخاصة أنها كره بطي يعني عادي ابوه ولا امه يشوفون
ودخلت البيت أول شي سويته رحت لغرفتي على طول وفجيت الدفتر الي اكتب فيه خواطري وفتحت الصفحة وكتبت فيها
الايميل وحتى الرقم الي سمعته أمس وكتبت اسم سلطان
اممممممممم ما عرفت ليش بس كتبت في الدفتر للذكرى لا غير
ابتسمت وصكرت الدفتر وأنا ما اعرف كم بقاوم وشو بسوي وبشو بفكر ؟؟؟
مواقع النشر (المفضلة)