مــن بعــض يــــوم
[align=center]السلام عليكم ورحمة الله وبركاته[/align]
[poem=font="Simplified Arabic,5,darkblue,bold,normal" bkcolor="transparent" bkimage="" border="inset,8,teal" type=2 line=0 align=center use=ex num="0,black"]
البارق اللّي ناض وسط الغيوم = اشوف نوضه يمّ عيني يميل
مشتاق دمعٍ ملي عيني رزوم = يوم المخايل مانتشت بالهميل
واعزتالي من ثقال الهموم = اللي غشتني بين صبحٍ وليل
ماتستكنّي لو رقيت الرجوم = لاغاب همٍّ همّ يشعل فتيل
طول الليالي واختفاء النجوم = ابرز دلايل للعنا والعويل
المشكل انّه طبع قلبي كتوم = لو قلت ابشرح جاك دمعي يسيل
ماهي بويّا جلد ذات وعزوم = العلم يبرق والمناشي تخيل
ليت السعاده عرض سلعه واسوم = وادفع وراها شرط كل الحصيل
الجرح واعي يوم جفني ينوم = والقلب عقب الجرح ليله طويل
من سبّة اللي لحّق النفس لوم = راح وتركني وسط جمرٍ مليل
لو كان مالي فيه شفّ ومروم = ماكنت احسّب لاكثير وقليل
لكن احبّه حب عازم جزوم = من طبعه الاّ يقهر المستحيل
ليت العواذل عن هوانا تشوم = ياهل المحبّه هل ترى من سبيل
حسبي على اللي حطّ هاك العقوم = يقطع قناطرها لعرق النخيل
والشجره اللي ظلّها مايقوم = مايستريح اللي تحتها مقيل
واللي جرالي شي من بعض يوم = والباقي الاّ جرح سيفٍ صقيل
من بعده اشكي هم واقعد واقوم = والقلب ميزاني وجرحي يكيل
لو كان فكري ضاق كانت علوم = ماكنت اعبّر عن ضميرٍ عليل
مارضى علاجي فيه عند اللزوم = الاّ المواصل بين خلّ وخليل
وان كان موتي لاجل يوم القدوم = ابغى مجيّك واعتبرني قتيل[/poem]
[align=center]وسلامتكم[/align]
رد مع اقتباس
مواقع النشر (المفضلة)