السلام عليكم ورحمة الله وبركاته
الوقـت يامقـسـى عـنـاه وعـذابـه
حطاب ليـل ولـه معاويـن وفـزوع
احد (ن) منـه يمكـن يعالـج صوابـه
واحد (ن) يموت بعلته مـوت جربـوع
يروح مثـل مقـاط محـد (ن) درابـه
لاحبـل يرقـى ولاصـوت مسمـوع
بغـى يجيـب رشـاه ورشـاه جابـه
من عالي الشفه علـى ضربـه الكـوع
هـذاه مقـاط اللـى ارشـاه التـوابـه
واصبح مثل للناس في كـل موضـوع
قصـه مقـاط وقصـتـى ماتشـابـه
اسباب وقت وكـل قصـه لهـا نـوع
مقـاط صفـى فـي زمانـه حسـابـه
وانا بلشت في وقت طامـع ومطمـوع
كم واحـد (ن) وقـت اللـزوم تهقابـه
واليـا نصيتـه غيـر الطبـع بطبـوع
والصاحب اللى صحبته ضحـك نابـه
يبينى ابقى لـه علـى الـدوم مـزروع
ان شـاف وجهـي قـال يامرحبـابـه
وان غبت ينسانى على راس الاسبـوع
واليـا نسانـى منهـو حظـره جنابـه
انساه واجعـل دونـه الخـط مقطـوع
وعيب (ن) عليـه كـان طقيـت بابـه
لونى امسي بالخـلا ميـت (ن) جـوع
مـن خلقـه الدنيـا تجـوع الذيـابـه
بس المهـم تعيـش والـراس مرفـوع
وتكسب بعـز النفـس قـدر ورحابـه
وتمشى على خط (ن) سليم (ن) ومشروع
الشاعر رشيد الزلامي
يروح مثـل مقـاط محـد (ن) درابـه
يقولون ان مقاط رجال نزله صديقه من فوق الجبل على ماكر طيور يعني عش طيور(الصقر) وحطه برشا(الزبيل) ومسكه من فوق لما وصل مقاط او مقيط للعش وشاف الطيور فرح
وقال هذا لي
وهذا لاخوي
وهذا لولد عمي
المهم وزع الطيور وهو ماخذاهن
الرجال اللي فوق زعل
وقال له خذ رشاك يامقاط
واطلق الحبل وطاح الله يخلف على اهله ومااااااات
وسلامتكم
مواقع النشر (المفضلة)