قالو قصيمي؟ قلت ربعي هل الطّيب
نعم .. قصيمي رافع الرّاس للعال
ما نيب من اللي يمسك الحبل للسيب
أو يرخص الشّيمة لأبو فلان بريال
انا قصيمي أصل و حنّا المعازيب
و داري بريدة ديرة الجّد و الخال
دار النّشاما ناطحين المواجيب
يا علّ تسقيها المخاييل همّال
جماعتي .. ربعي .. رفاع المناسيب
من روس قومٍ صيتهم جال و إجتال
وش قالّك يالعوني؟ و قوله بنا مصيب
قال الشّرف ، قال الحقيقة و الإكمال
قطّاعة البيداء على شمّخ النّيب
و على القدم داسوا مصاعيب و جبال
من ديرة البصرة على الشّام تغريب
مشوه رجليّه و هم باشهب الّلال
سنادي لا جاء للصعايب طلاليب
نطّاحة الكايد حشيمين الأفعال
هم ربعي القصمان صقور الشخانيب
أفخر بسمعتهم مع الناس تنقال
و جدّي مع اللي سردبوا بالسراديب
و هدّوا مقاصير بها الضّد نزّال
مسمّين الصلعان عصم الأشانيب
أنصار المنتخي بالأرواح و المال
حامين ديارنا بوقت المصاعيب
يوم الزّمن اللي به سلب و قتال
بأفعالهم نفخر و أعلمك يا اديب
و إصحى تعذربهم نسمّيك يا حثال
قلته عقب ماشفت هرج الكراعيب
و شفت الأمور اللي قصيرات وهزال
من شلّة كلّه حثايل زقاليب
ما يعرف الصّالح من الطّالح الضّال
يسبّون دار العز دار الضواريب
رجّالهم يسوى ثمانين خيّال
ما يرتضي بالجور حتّى الخراعيب
و طيش الكلام الشّين للنفس غربال
ودّي كلام الحق يلفظ من الجيب
و راعي الخطاء يعدّل عن الميل لامال
إنشد عن القصمان شبّان و مشيب
تلقى رجاجيل لهم وزن و ثقال
و منهم مناديب و منهم مناصيب
و تسلّحوا بالعلم في كل منوال
أولاد علي ،،، مابهم شك أو ريب
تكرم لحاهم عن غلط كل عذّال
ستر العذارى فهود بيض الرعابيب
لا جاء نهار فيه عٍج و زلزال
دونه نبيع الروح بليّا مطاليب
و نارد حياض الموت في كل ابو حال
لا شالوا العصيان ،،، شلنا المحاديب
ودون الشّرف نزعل ولا نخاف رجّال
يا معيبين الناس فيكم معاييب
و لو تفهمون العيب ماصرتوا اسفال
أنا غثى بالي هروج الحطاطيب
ناسٍ تعذربنا على غير مدلال
مخلّفات أقوام ناسٍ سكاريب
خجمان رجال مابهم عز و أرزال
يقطعك يا دنيا بنا شقّت الجيب
عيال الحمايل مالهم كار يا رجال
وقت به الثعلب غدا اشجع من الذّيب
و للبومة الخرساء صفى الجو و إنجال
و صلاة ربّي عدد رمل العراقيب
على نبيٍ للثقلين مرسال