بسم الله الرحمن الرحيم
السلام عليكم ورحمة الله وبركاته
اسعد الله اوقاتكم بكل ماهو خير لكم ومفيد
يسعدني ويشرفني عودتي لكم بعد انقطاع دام لفتره وجيزه (مانقدر على بعدكم)
اثناء غيابي كثرت الشائعات وانتشرت كما هو معهود في مجتمعنا السعودي خاصه والعربي عامه
ولكي نقطع دابر هذه الشائعات التي اثقلت كاهل حاملها وناقلها ولكي نريحه من هم نقلها ونشرها
هانحن نعود لنقطع الشك في القين والأفه اللي لها ودنين بيشيلوها اتنين ورئصني ياقدع
في ليلة ظلماء اختفى فيها ضوء القمر وسطعت فيها النجوم وهي تتلألأ في سماء الرياض
خرجت وجلست عند باب بيتنا (على العتبه) لكي ابحر في زورق هواجيسي لارسم مستقبل مبهر سوف يشرق باذن الله
حتى لو كان بالاحلام
وانا غارق في احلاف اليقظه حقتي حسيت بحركه خفيفه حولي
التفت الا كلبين ابيضاوان <<<يسمع باللغه العربيه
كل واحد احسن من الثاني وحجمهم صغير وكان منظرهم جميل جدا
وبيني وبينكم بهن نظافه انظف من بنات الكلب
وكل واحد منهم فيه ربطه حمراء اعتقد والعلم عند الله انه اغلا من زبيرياتي
المهم اني التفت باحثا عن صاحب هذه الحيوانات الجميله ولم اجد احد
فتحت الباب ودخلن بالحوش
قلت هلااااااااااااااا وجلست اهز واطق اصبع
لااعتقادي بان باب الغنى الفاحش فتح لي مصراعيه<<<ترجي غنى من ورى تسلاااب يالجعري
المشكله لو يشوفهن ابوي وقسم ان يذبحهن ويسلخن معهن
مير احطهن بكرتون موز واهجبهن للاستراحه
من بكرا قررت اوديهن لمحلات الحيوانات الفخمه مثل واحة الحيوان
رحت لواحة الحيوان في طريق الملك عبدالعزيز وعرضتهن عليهم وقلت لهم تراي لاقيهن بالشارع عند بيتنا
قال خلاص نشتريهم منك بـ 6000 ريال
قلت اما 6000 ريال ماتسوى كرتونهن
عاد الصراحه اني تفشلت يوم دخلت بالكرتون وشفت العالم كل واحد شايل بيده قفص كل قفص احلى من الثاني
وانا داخل بكرتون موز ومخرق له فتحات صغيره للتنفس :)
قال كم تبي فيهن
قلت شوف انا لازم استغل الوضع واكسب من وراهن
قال يعني كم
قلت 8000 ريال واقل من كذا ماراح ابيع
قال لا غالي
المهم اننا ماتفقنا جيت وعطيته صور الكلاب وقلت خلاص اذا جاء احد يبيهم هذا رقمي دق علي
وطلعت وانا شايل كرتون الموز على كتفي <<<<حمالي بسوق الحراج خخخخ
وقررت اني اوديهم لسوق الحمام لعل وعسى ابيعهم بمبلغ زين
وبعدها بيوم رحت لسوق الحمام وانا في الطريق دق جوالي الا هذا صاحب المحل حق امس
قال هاه تبيعهم علي 6500 قلت لا والله اسمح لي
انا اللحين بالطريق لسوق الحمام
قال خلاص تعال ماراح نختلف باخذهم منك بـ 8000
قلت لا يالحبيب هذا كان سعر امس اليوم الوضع اختلف صعبه ارجع من الدائري الجنوبي لطريق الملك عبدالعزيز لان السعر قليل
قال ياخوي كم تبي فيها <<<بنبره فيها من العصبيه الشيء الكثير
قلت ياخوي لا تقعد تنافخ علي اللي يشوفك اللحين يقول انهن تسلابك وانا سارقهن منك
تبيهن بـ 9000 والا مانب جاي
قال خلاص تعال
ورحت وطلعتهن من الكرتون وجاء الدكتور البيطري وفحصهن وعطون التسع الاف <<<تشقق من الوناسه
قال عاد اسمع
الكلاب هذي لفلانه بنت فلان آل ........
مير تنط عيوني وتجين نفاضه ماقد مرت علي من قبل
وقلت هاه
قال اللي سمعت وهي اللحين موجوده بالمحل
والتفت الا بنت وولد صغار كل واحد منهم جالس يخم له كلب من الكلاب حقاتي <<<صارن لوه
وفيه وحده واقفه عندهم
انا هنا جلست اضرب اخماس في اسداس
وقلت لابدة من استغلال الموقف للحصول على ماهو اهم من الـ 9000 ريال
تشجعت ورحت لها وقلت : مساء الخير ياختي <<<<احس انها فقعت ضحك مادري ليه
قال اهلين
قلت تراي انا اللي لاقيهن (وانا جالس اطق الياقه واحوف الشخصيه)
قالت : مشكور والله ماقصرت انت ماتدري وش غلات الكلاب عندي
وجيت ومديت لها التسع الاف وقلت هذا حق التسلاب طال عمرتس
قالت لا وربي ماخذهم هذا حقك والله يعطيك العافيه اللي حصلتهم لنا
وجيت وحطيتهم في يد البنت الصغيره (سنتين) وحبيتها وعطيتهم ظهري ومشيت <<<اوخص
مشيت خطوتين قال لو سمحت
مير تقلب عيوني وتصير على شكل قلب وتنبض نبض
والتفت بسرعة البرق وقلت سمي
قالت ممكن رقم جوالك علشان زوجي يدق يتشكرك
قلت ايه وش دعوه وعطيتها الرقم
ومشيت
وطول الطريق هواجيس بالمبالغ اللي راح تغرق حسابي والسيارات والهدايا والسفرات
يعني بصير ملك
لا موب ملك ملك
يعني مثل الملك بس شوي
واللحين لي اسبوعين محد دق علي :(
بس مازلت معطي نفسي امل
بان الزوج (طويل العمر) مسافر لجنيف
وراح يرجع اليوم او بكرا بالكثير
عاد انا صار عندي متلازمه دائما على لساني كل ماشفت احد وسلم علي اقوله:
سجن ايييه اللي انتا جاي تؤل عليه <<<يغني :(
المقصد اني مانسجت ولا عمري طبيت سجن بحياتي
وكل ماقيل اشاعات مغرضه
ويكون بعلمكم تراي مانب كاتم خويكم
انا شخص ثاني
تم شراء المعرف من خويكم السابق
شكله داج هاج باهالصيفيه قام وباع كل شي يخصه
وفي الختام
حاب اشكر كل من افتقدني وكل من مريت في باله
وشكر خاص جدا جدا لادارة هذا المنتدى الرائع <<<<لا يالمصري ماتخلي حركاتك
وبهذي المناسبه
هذا اهداء لكم اتمنى ان يحوز على رضاكم واعجابكم
واعتذر عن رداءت التسجيل
[rams]http://alzen.zen.googlepages.com/123.wav[/rams]
تعرفون مسجله من جوالي الجديد اللي فزت فيه في مسابقة قسم السياحه :)
برب
بروح اشوف الحركات الجديده في المنتدى
مواقع النشر (المفضلة)