مساكم..طهر وعفه~
نص فائق الجمآل..أتمنى ان يصل لرقي ذائقتكم..:25ar:
يتنفّس اللّيل من ضيقِ الزّوايا كلامْ
و الوعد يفرشْ على رملِ الأماني حصيرْ
الحِلْم ينصبْ على بيدا ظروفي خيامْ
و يضمّني من شتا الواقع و صيف المصيرْ
أستصغر الحِزن رغم إني أعيش فـ ظلامْ
مثل القمر ، واقِعه مظلم لكنّه ... ( يِنيرْ ) !
أحاوِل أعكسْ طموحي في عيونِ الأنامْ
و أكحّل الحال ... لو إنّه زماني ضريرْ !
يا كم هبّت على ضْلوعي رياحِ الهيامْ
لي خلف بيبانْ صدري أسمع لْها صفيرْ
حمّلتْ نفسي من الدنيا هموم و خصامْ
و صار الأمل في عيوني مثل كفّ الفقيرْ
اللي لِيا طاح دمعه ... و الأسى فيه قامْ
يشوف نفسه وسطْ عين المزكّي كسيرْ
قالولي : صغير ... لا تحمّل زمانك ملامْ
جاوبت : قولوا لـ زماني لا تعارضْ صغيرْ !
تمرّ الآمال في عيني : ( مرور الكرامْ )
شرواةْ صحوَ الضمير فـ صدر ما به ضميرْ !
و اليوم سقتِ الطّموح و نظرتي لـ الأمامْ
و اللّي تِبقّى عليّ أفردْ جناحي و ... أطيرْ !
هِنا ترفرف من أفواه القصايد : حمامْ
و أشم لـ العز ريحة زعفران و عبيرْ
لـ عيون أرض الكرامة و الوفا و السلامْ
بحاوِل أرضي القليل إن ما رضيتِ الكثيرْ
عسى أول الصّبح يكتبني ع صدر الغمامْ
شاعر ... طموحه : ( يِجمّل موطنه للأخيرْ )
يا دار شاعرْك صمته طال له حول عامْ
مدّيه تصفيق دام إنّ الشّعر منْه ... غيرْ !
لو يازم المجد في سيره بعيد المرامْ
لا بدّ يوصل مدامه صار لـ اهله سفير ْ
هِنا يطيح العَتَب من فوق كتفِ الهمامْ
و أخطّ فـ كتابي شي : ممكن يِصير !
غيري يقول المطر ناتج من الاصطِدامْ
و أنا أقول السّحاب أتعبْه طول المِسيرْ !
يبغي يِخفّف من حْمول اللّيالي الجِسامْ
و أرخى جفونِ العنا و انهلّ دمعه : غزيرْ !
مثلي بعد ما اختنقْني الصمت ، صغت الكلامْ
نثرتْ منْه الكثير ... و اللي تِبقّى : ( كثيرْ ) !
عبدالله محمد الجابري ..
مواقع النشر (المفضلة)