الا ياحلولات لو طفولتي تعود .. يومـــــــــاً ..
بسم الله .. ماشاء الله ..
[ أســتــفــتــاحــيــة ]
:: يمتلكني احساس بالقوّه ::
احياناً يمتلكني احساس بالقوه
ومن قوة الاحساس احس اني قوي من جد
لدرجة اني اطالع في لمبة الشارع واحس اني اقدر اقشعها
ثم اطالع في هندي مار من قدامي
واقول في نفسي متباهياً
اقشع ام اللمبه من مكانها واصفقه على راسه
واحياناً يزيد هالاحساس ويزيد لين احس اني
من زود القوّه اللي فيّ
لو انقز على الارض فشّيت الكرة الارضية
__________________
يقولكم فية واحد ..
فية واحد دايم مستغرب .. ومرة قام من النوم وماستغرب .. قام استغرب ..
تقفون موتوا ضحك ..
^
عالعموم ماعلينا من هالمقدمة السامجة ..
:: ماعلينا ::
كلمة تقال
للانتقال من مقال الى مقال
<< ياملا الجنة الباردة ..
بخش بمويضيعي دوغري ..
< بدري علينا ..
المهم ..
كثر القيل اني مااكتب مواضيع الا بنفسي .. هو صدز هالحتسي .. !
اذا شايفين هالشي بوة بياخة .. خبروني ازا بتريدوا ..
او اتصلوا عاهالرئم 00966 والباقي ماتغير ..
وبغير هالعادة ان شاء الله .. بالمواضيع القادمة ..
عاد موضوعي اليوم يتكلم عن برائتي ايام الطفولة .. < اية هين
وان شاء الله هذا اخر موضوع اكتبة بنفسي .. تلبية لطلبكم ..
نــبــدأ ..
كان ياماكان .. كنت انا طفل صغير < أجل كبير .. !
وكنت اقطر فرح وابتهاج وبراءة ..
جاء ذاك اليوم اللي كان عمري فية ست سنوات .. وبدى قلبي يقرقش على بنت
الجيران .. ( قلوب من هنا لعندة )
على ذيك الايام كنا عايشين بهيوستن بأمريكا بحكم شغل الوالد الله يرحمة بالسفارة
السعودية .. طبعا كنا عايشين بمجمع سكني تبع السفارة وكلة سعودين ..
يعني الدعوى خليطي .. زيطة وزمبليطة .. وماني مليوم لو تولعت بة ..
بدى الزجار يشتغل بي .. ( الزجار = اظهار القوة والسُلطة على الجميع ) ..
وبديت اكفخ بعيال الجيران واحوس مريرهم لاشفتة مرت من عندي ..
واتميلح عندة و اسبح بالعطر لاجيت اطلع .. جاء هذاك اليوم اللي قررت بيني وبين
نفسي اني اعطية هدية .. طبعاً ماكانت بدون مناسبة .. كان عيد الفطر ..
قدمتلة الهدية اللي هي كانت عبارة عن ( سبحة ) < ياهيك هدايا .. يابلى ..
وكانت هالسبحة لأبوي الله يرحمة هدية من مدري من .. بس كانت عزيزة علية ..
المهم ظربت علية جلادة خذيتة من الروظة بالسرقة .. ولفيتة بالشطرطون
ورحت لم بيتهم مع صلاة العيد .. عشان اظمن ان ابوي وابوة مايشوفونن
لانهم وقتة بالصلاة ..
طقيت الباب وفتحتلي .. ( وجة عيونة ترومش ) .. وكانت بالبجامة
وبدون سلام ولاكلام ولا مقدمات ..
قلتلة .. ريم خوذي هذي لتس .. مديت الهدية .. وخذتة وفتحتة على طول ..
وقالت : وشي هذي .؟ قلت : سبحة ..
قالت : يع وش اسوي بة .. شايفن شايبة ( تقصد عجوز ) عشان تنطينن هذي .. !
قلت : عادي اصلاً دايم اشوفة مع ابوي < يبي يكحلة اعماة ..
قالت : يع مالت عليك وعلى عيديتك وتسبدي ..
وجدعتة علي وصكت الباب .. عاد انا تحطمت وتكسرت مجاديفي ..
وبدت الروح الشريرة تشتغل ..
وقلت والله ماافوتة لة .. هين بس .. ويوم جاء الليل اجتمعوا كل اللي بالمجمع السكني
عند واحد من الجيران .. يعني شبة عزيمة .. وذاك اليوم كانت منطيتن اشكل
ولاتلقيلي اعتبار .. قلت هينين بس .. وجاء العشاء وجلست بجنبة .
وكانوا عازلين الصغار عن الكبار ..
قلت فرصتي دامة بجنبي بسويلة شي يقهرة .. فتحت البيبسي حقة وشربت منة شوي
وصوتت لة امة .. وقامة قلت يالله فرصتي خلن اعثابة قبل تجي ..
وانا اخذوة واطلعبة كل مابحلقي من نخامة .. ( وجة مكشر )
وركدتة بمكانة .. يوم جت وقعدت تبلع ومسكت البيبسي يوم احس اني
انقبض قلبي .. وجغمت منة .. يوم تلون وجهة .. وشالت الطابق عن افمة
يوم امطت من افمة للعلبة يعني نص هالنخامة بأفمة ونصة بطابق البيبسي ..
وصرخت .. يااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اع
يماااااااااااااااااااة < عاد اللي ماهي ملوسنة .. ياساتر ..
عاد جت امة وشالتة وطلعت كل مابتسبدة < == استفرغت يعني ..
ورجعت لبيتهم وتنكدت اول يوم من العيد ..
بس ماحسيت ان تسبدي بردت ..
ثاني ايام عيد الفطر ..
الساعة 10 الصبح تقريبا ..
افطرت وطلعت .. ومعي اخوي .. اللي كبري بوة نوع من الذراقة والدباشة ..
بس ماعلية يمشي حالة ..
قمت امشي على بيوت المجمع كلهن حوالي 12 بيت ..
واقولهم .. اليوم فية حفلة عند ريم .. وتقول تعالوا العصر ..
واخوي ينط من وراي ويقول يتسذب يتسذب .. والناس معطينة اشكل ..
عاد من غبائهم مافكروا ولاقالوا ليش مو ريم اللي تعزمنا ..
المهم جا العصر .. وانا واقف على النافذة الا اشوف كل عيال المجمع متجهين
لبيت ريم .. بدا قلبي يدب بوة شئ من الرعب ..
ودي هذيك اللحظة اقولهم ارجعوا امزح معكم .. مابوة لاحفلة ولاشي ..
خبري بأبوة عصبي ودايم يسطر عيال الجيران ..
لبدت هذاك اليوم ببيتنا ماطلعت .. يوم جا عقب المغرب وهو يجي ابوة ..
وينتلن من اذاني ويمسحبي البلاط قدامة .. ويمسكن حي ويطلقن ميت ..
عاد ابوة بوة تعصب لعيالة مو طبيعي ..
والقهر يشاور هالمطرسة ريم .. يقولة يكفية هالضرب والا ادبغة زود ..
تضحك هي .. قلت وش مهمتس مانتي موجستن شين ..
وكل هالحركات وهالعمل .. بزعمي بجيب راسة ..
ونكون قصة حب عفيفة ..
اثرة هي جابت راسي .. وتودست ببطني ..
واخزياة بس ..
طلعت من راسي وصرت كل يوم اسمع ..
للصبر اخر .. خلاص .. خلاص .. عافك الخاطر ..
وبعدة بمدة رجعنا واستقرينا هوني ( يعني بالسعودية )
وبدت الايام تنسني دابرة الدابر ..
أنتهت ..
وباقي الكثير والكثير من الذكريات اللي سويتة بذيك الديار ..
سالفتي مع الخط الساخن ..
ويوم اسافر مع الجيران دون علم اهلي ..
والمزيد المزيد < اسلوب تشويق ولا بريال ..
ان شاء الله ننزلهن بالقريب العاجل اذا انتم تبوني اكمل كتابة مواضيع عن نفسي ..
عالعموم بفتح تصويت ..
هل انت مع او ضد كتابة د.كيف مواضيع بنفسة .. ؟ < لا ياشيخ مصدق عمرك ..
والسلام خير ختام لمجلسنا العام ..
والسنة هذي بعد ..
:confused:
مواقع النشر (المفضلة)