اعزائي اخوانى واخواتي
اطرح لكم هذه القصيده القديمه لي واتمنى ان تنال شرف رضاكم واستحسانكم
قصيده بعنوان : مدوح وحمايد
يابنـــــــت ياللى راس مالك ملايين ....... انا فقير وراس مـــالي قصايد
صحيح احبك بس وينك وانا وين ؟؟...... بيني وبينك فرق شــاسع ونايدّ!
ودّك تــــعرفينى وبالحال تدرين ...... دامك تبين العلم فالــــعلم كايد
اقري قصيدى بعد جيتى تشوفين ..... وعن حالتى اخذي جزيل الفوايد
لايخــدعك فينى كلام المعادين ...... ولاتسمعي عنّي كــــلام الجرايد
ربعي هل التاريخ والمجد ذربين....... وما ضنتي به عندهم شخص زايد
فى وســــط مجلسهم يفزّو مهلين ......... وتباشروا لاجيتـــهم بالوسايد
وكل ٍ يقول اّمر:على الراس والعين..... ولاضاق صدري كلهم لي سنايد
اهل الكرم واهل الوفاء والنياشين....... عتبان والعـــتبان عند الشدايد
لكن تعالي وافهمي هرجي الحين ...... وماجيت الك فى مــدح ربعي بازايد
لي عزّتي ما اشكى ولو صرت نصين ...... اموت وطعونى بجوفى لهايد
انا جــــريح الصمت بين المنادين ........ وانا خويّ الذيب شبل البدايد
واناصليب الراي صـــقر الميادين ........ وانا نديم الليل راعي العوايد
مر ٍ يسمونى طبيب المــــــــحبين ...... لاصابهم فالنفس همّ وضهايد
ومرات تلهمني طروق المجانين ....... وامشي بعكس الريح مصيود صايد
واحيان تطلقني قيود المساجين ....... واطلق لها طيري نهار الهدايد
وارفع كفوفي مثل كل المصلين ...... واسجد لربي وانحني بالركايد
في يدّي اليمنى طموح البسيطين .... وفى يدي اليسرى لفعلي شهايد
واّشوف باليمنى دموع المساكين ....... واّشوف باليـــسرى شراار ووقايد
وفي شطر بيتي لوعه ٍ للمواسين ........ وفالشطر الايسر فال خير وسعايد
ماهو بانا الى يعطي الراي رايين ..... واضح صريح ووافي بالوعايد
ولي حاجةٍ في خاطري من زمانين......... مكانها بين النجوم البعايد
ولي ضيقةٍ ما عالجوها المداوين ........ تلقينها فى بعض شعرى شرايد
كنّـــــي فقير ٍكاسر ضهره الدين ....... يغصّ يسهج ماهتنا بالرقايد
جرح الزمان وجرح ناس ٍ قريبين ......... في ذمتى ماله علاج وضمايد
ملدوغ من هالجحر مره وثنتين ...... وصدمه ورى صدمه وجتني عدايد
وانا معك وافي مدامـــك بتوفين ...... واهديك من شعرى وسام وقلايد
قول وفعل واّطول وانتي تطولين ....... وترى الفلك دوار والوقت عايد
ولاتحرجينى كان فينى تحسين .......... خلينى ابقى فى حياتك محايد
يالمترفه انتي رصيدك ملايين ...... وانا ملايينى مــــــــدوح وحمــايد
وسلامتكم : طلال العتيبي
مواقع النشر (المفضلة)