مشاهدات ...
تقول ::
مايشك خيط بإبره الا بأمر زوجته ..
علومه كلها عندها
أمحق من رجال ....؟؟
على صعيد آخر ..
ذا الرجال عمره ماسمع لي كلمه ..
لا قلتله يمين قالي يسار ..
أمحق من رجال ....؟؟
ــــــــــــــــــــــــــــ
تقول ::
نعنبوها كل حلال أخوي لها ولأهلها ..
مابقى إلا تلبسهم وتأكلهم من فلوس أخوي ..
على صعيد آخر ..
برسلك 5 آلاف أخذتها من زوجي ..
وعندي شنطة ملابس للنوري يومها صغيره برسلها بعد ..
ـــــــــــــــــــــــــــــــــ
تقول ::
من زين بنتها يوم تطلب لها مهر 50 ألف
على صعيد آخر ..
أنا بناتي ماأزوجهن إلا بـــ 100 ألف ..
وبيوتن لحالهن ...
ــــــــــــــــــــــــــــــــــــ
تقول ::
والله اللي ماعينت خير ..
تمنع عيالها من سلامٍ على عماتهن ..
يهب ياوجهها ..
على صعيد آخر ..
ان شفتكم مسلمين على خالتكم والا محاكينها ..
ياويلكم مني ..
وان دقت عليكم لاتردون ...
ـــــــــــــــــــــــــــــــــــ
السلام عليكم ورحمة الله وبركاته
موضوعي .. ولو اني حاطته بقسم النقاش .. بس ترا مو منتظره أحد يناقشني
يمكن فهمتوا المقصود منه ..
ويمكن لأ ..
اللي بقوله .. اني مليت من المجتمع النسائي ..
ومليت من تناقضاته .. ومليت من سخفه .. ومليت ومليت ومليت
كنت دايم من مناصرين المرأه .. وأي موضوع يمسها تلاقون لساني يلوط أذاني
وكنت أحب كوني امرأه .. وكتبت خواطر وقصايد تعبر عن فخري بهالشي ..
لكن .. وكالعاده مادايم الا وجهه ..
كبرت .. وزادت علاقاتي .. واختلطت بالنساء وصرت أجلس وأسولف وأشوف
وحطوا تحت أشوف هذي مائه خط ..
والله اللي أشوفه .. يوجعني براسي ..
ويخليني محتاره ومتفاجئه ومنصدمه ..
وقرفانه ..
وعلى قد ماأنا أقرف .. أستغرب دايم ليش تصرفاتهم ماتجوز لي .. وليه أنا ماأسوي مثلهم
وأقول أوقات .. اكبري شوي وأكيد بتصيرين مثلهم ..
وهذا أنا كل سنه أكبر سنه .. ومازلت قرفانه
صفاتي وطبعي مايله أكثر لصفات الرجال .. وأقصد هنا الرجال مو أشباه الرجال
الرجال مايهمه اذا حكى فيه ناقص .. وأنا كذا
الرجال مايهمه كلام النسوان ولا يحب يسمعه .. وأنا كذا
الرجال مايحب سوالف الحش والبربره اللي لاتودي ولاتجيب .. وأنا كذا
الرجال عشان رجال مثله يحشم قبيلته وأهله كلهم .. وأنا كذا
الرجال مايحب الأسواق والتفرفر فيها .. وأنا كذا
بيني وبينكم ..
ولأول مره في حياااتي .. أفكر لو اني رجال مو بينيه
عشان بس أماشي الرجاجيل وأخلص من سخافة الحريم
شوفوا لاتهاجموني .. وتعصبون .. وايديك مو سوا ومدري ايش
أنا قرفانه ياجماعة الخير .. وماصرت كذا من شوي أو من وحده وثنتين
والله حنا يالحريم نشيب الروس .. ونحير العقول
في النهايه .. اعذروني ع الكلام اللي كتبته من دون مراجعة أو تنقيح
بس والله من حرتن فيني ..
صاحبك كل عرق فيه مل الكلام ..
ما بقى غير وجه الصمت يستعذبه ..
طول عمره يقول وما لقى الا الملام ..
كل وجه كذوب يصد ويكذبه ...
كان يحلم تكون الارض برد وسلام ..
وان روح المبادي نص ما يكتبه ..
شال طيب المشاعر في عروقه وقام ..
يزرع احلى الاماني والوفا يكسبه ..
كان يرسم على الكراس شكل الغمام ..
لاهما والسنابل حلمها تشربه ..
كان يحلم ويحلم في سدول الظلام ..
تبتدي شمس باكر ممطره معشبه ..
طيبة الريف كانت في حياته وسام ..
ما يساوم عليها لو خسر مطلبه ...
وش تسمي شروده خلف سرب الحمام ..
غير وجه بشوفة مات ويعذبه ..
صاحبك لجل هذا مل وجه الكلام ..
ما بقى غير وجه الصمت يستعذبه ...
من بديت أكتب الموضوع وأنا أردد هالأبيات ..
مواقع النشر (المفضلة)