السلام عليكم شباب وبنات
ابي اقولكم سالفة صارت معاي قبل فتره وابي اخذ رايكم فيها
قبل شهر تقريبا توني فرحان مخلص اختباري وطالع من الكلية والابتسامه شاقه وجهي وقاعد امشي في أمان الله واغني ومبسوط لأنه آخر ترم وبخلص انشالله.
المهم دق علي واحد غلطان من دولة نيجيريا الشقيقه مدري وش يبي ومدري منهو قال السلام عليكم قلت وعليكم السلام قالي أنت فلان؟( ويتكلم بالفصحى من زين الطبايع)؛ قلتله لأ النمره غلط.
ودق بعدها بخمس دقايق وقال نفس الكلام، ورديت بنفس الرد، ودق ثالثه ورابعه لحد مافقع قلبي وبعص جوي قررت اني اتفاهم معاه.
المهم دق للمره المليون وتوني بشتم وبسب وبلعن.
قالي: ( أفرغت من امتحان مادة الاحصاء ؟
سكت وتوقعت انه واحد بيسوي مقلب،بعدين فكرت وقلت منهو من اخوياي الفله الي داق مشوار لنيجيريا الشقيقه عشان يسوي مقلب( والله فاضي )
قال: اعرف انك استغربت كيف عرفت انك انتهيت من الامتحان، واعرف انك لست فلان، واعرف انك فلان ابن فلانه بنت فلانه( الملعون قهرني يوم عرف اسم امي وجدتي والي قهرني اكثر من وين عرف اساميهن جدتي موب وزيرة خارجية ولا عارضة ازياء ولا ممثله عشان تنشهر في نيجيريا والوالده موب مطربه والا متحدثه باسم الحكومه ولا قد شنت حرب دوليه او اي نوع من الحروب الا داخل المنزل فقط، وما اقول الا الله يصبرك يا ابوي وعلى اجر انشالله ).
المهم قالي: انت ياهذا ألازلت معي؟!
قلتله الحين انت عرفت اسم امي وجدتي وماعرفت ألازلت معك والا ولا؟
قال : نقطه جيده ، ولكن دعنا من هذا الآن وأريد ان اخبرك بشيء.
قلتله بكل براءه: وماذا هذا الشيء؟ ( يلعن ام الفصحى الي اعرفها )
قال: اذهب الا المكان الفلاني ستجد حجر شديد البياض ارفعه ستجد تحته ورقه سأتصل عليك حين تكون الورقة بين يديك.
قلتله بكل سفاله: وشوله اضرب مشوار هالمكان بعيد،بعدين ماقلتلي من انت ووش تبي؟
قال :ستعرف حين تقرأ الورقه وإياك ألاتذهب؟ قد حذرتك.
بيني وبينكم قلت بروح اشوف وش سالفته وماني خسران شي،وفعلا رحت وما امداني اوصل الا لقيت ظرف شكل لونه كان فوشي بس من قوة الوصخ صار ازرق وريحته خايسه،وما امداني امسك الظرف الا دق علي ملعون الصلايب وقال:
أحسنت احسنت، اقرأ ماجاء بها ( بيني وبينكم طقتني العبره من الخوف وقلتله بصوت اشبه مايكون بصوت بزر مصفقين عيال حارتهم وماخذين طاقيته وصابين عليها مرندا فراوله انت وش تبي انت وش تبي؟ )
قالي: لاتخف انا رسول لك من قاشوش الأعظم.
قلت : اي قاشوش وفانوش؟!
قال : لاتغضبه فيسخطك قرداً اعمى لاترى ولاتسمع إياك(( عاد انا خلقه قرد بس اعمى واصقه مصيبه)
قلتله : طيب ليش ريحت الظرف خايسه؟(( حسبت قاشوش داق مشوار من نيجيريا الشقيقه للرياض وهو حاط الظرف تحت اباطه))
قال: لاعليك انما هذه الرائحة راحة عنبر نيجيري عطرتها طباحا كي تصلك برائحة زكيه ( امحق رائحة زكيه والله جاني شد عضلي في خشمي، وبعدين الصباح عطرها وحنا عصر ماشالله على خدمة البريد الجوي حقهم احسن من البريد السعودي)
المهم فتحتها وكان فيها خرابيط وكلام واجد مافهمت منه الا اسمه النيجيري وكان اسمه امين الله اوركا حسن وقالي: خرابيط واجد يعني صل ركعتين بدون وضوء وركعتين بوضوء وراح تنجح بالاحصاء شرط ان هالورقه تغسلها في ماي وتتوضا من هالماي .
الحمدلله انا انسان اصلي بوضوء طبعا ومن الحنفية وراح هاليوم كله تفكير ودق علي بعدها بثلاث ايام قال نتيجتك بكره وانت ناجح مع انك مانفذت طلب قاشوش الاعظم وانا ترجيته يسامحك وقال بسامحه بشرط.
قلت شنو هالشرط؟؟
قال انك تحول سبعة الاف وثمانمائة واربعون دولار(لو معي ربع هالمبلغ سافرت شهرين في اسبانيا ةسكنت بالشانزيليزيه عند مجمع المطاعم في عاصمتها بكين) لهذا الحساب واعطاني رقم وتشتري بقرة لايزيد عمرها عن سنه وشهرين سوداء بالكامل وتذبحها على شاطيء البحر في وقت الغروب وتقول لك ياقاشوش ، افدي سخطك ، بعجل سمين.
لما سمعت هالكلام سفلت فيه وفي قاشوشه وفي عجله ونيجيريا الشقيقه ولعنت ابو الطيب فيهم، ورحت للشرطة وتكلمت معهم بدال مايساعدوني ألقوا القبض علي وسوولي تحليل دم ( على بالهم سكران) يوم دروا ان مافيني الا العافيه كرشوني وقالوا لعاد تعودها نطلناك بالتوقيف( لاحظوا قساوة الكلمة نطلناك،، ماراعوا مشاعري)
رحت لامام مسجدنا ومن يومها وهو كارشني من المسجد ومايسميني الا الفاسق.
خفت فتره بعدين تعوذت من ابليس وذكرت الله ولحد اليوم وهذاك يدق علي ويقول : قاشوش متحلف فيك ، قاشوش بيلعن والديك ، قاشوش مدري شنو.
الحين ياشباب ابي اعرف رايكم بالقصة وتراها واقعيه وصايرتلي وابي رايكم بكل جدية مع شوية صرقعه.
وشكرا مقدما على كل من تعب نفسه وقرا موضوعي.... واحتري ردودكم
مواقع النشر (المفضلة)