السلام عليكم ورحمة الله وبركاته
شلونكم ..؟
اولا انا عبدالله صديق سهيل ( د.كيف) دخلت منتداكم عن طريق حسابة اللي بجهازة
مخلية دخول تلقائي ...
المهم بقولكم وش سالفتي وش السبب اللي خلاني ادخل منتداكم
واسرد هالسالفة بهالقسم ... السالفة طويلة واتمنى من الكل يقراة..
يوم الاربعاء طلع سهيل (د.كيف ) من الأستراحة على وجة الصبح عقب ماطلع من منتداكم
وقلتلة وين تبي قال دقايق واجي ..
تأخر ماجى طلعت انا للبيت ... جيت يوم الخميس العصر للأستراحة الا جهزة اللاب توب
على حطتة من الفجر ! سألت الشباب ماشفتوا سهيل ؟
قالوا ابد ماشفناة من عقب ماقفى الفجر ... نغزن قلبي حسيت ان فية شي ..
رحت لم بيتوة لقيتة مسكر كلة حتى الانوار مافية وسيارتة ماهي بوة
المشكلة ان امة واخوانة مسافرين لم الأمارات عندهم شغل هناك وهو ماراح معهم
عندة اختبارات وبحوث ... قلت خل اتاكد يمكن صافط سيارتة داخل البيت طقيت
الجرس ماحد رد ... ادق على جوالة مايرد ...
رجعت للأستراحة ... نطرنا لليل ماجانا ... رحت لم بيت جدتة قلت يمكن عندة سيارتة
ماهي بوة .. سألت ولد عمة الصغير عنة قال اصلا ماجانا ماعقب امس الضحى ..
ورحت لم خوالة مالقيت سيارتة مابغيت اسألهم قلت يمكن يرتجون خلي لمى نلقالنا
طريقة ... جا يوم الجمعة ماجانا وندق علية اثري جوالة انقفل ... رحت للبيت للمرة
الثانية مالقيتوة .. رحت صليت الجمعة بالجامع اللي هو يصلي بوة تفقدتة بس للأسف
مالقيتة .. لقيت جارة محمد الشمري مسكن وقالي /
هلا عبدالله شلونك ؟ ابسألك سهيل (د.كيف) وين هو ؟
لة يومين مامر علي المسكين من سافروا امة واخوانة وهو كل طاق علي عندكم كذا
عندكم كذاك ..! ارتبكت وقلتلة اية هو راح عند جدتة وصلى بالحامع اللي حولهم
قال / اية اني انخرعت علية ..
طلعت من الصلاة وانا احس نفسي منهار خلاص فقدت لقرب الناس لي ..
يوم الجمعة العصر وانا جالس بالأستراحة مع الشباب نفكر شلون ندور علية بخفية
دق جوالي اطالع الشاشة الا رقم دولي رديت علية طلعوا اخوانة الصغار
عاصم وعبدالله عاد متعلقين بسهيل حيييييل
قالولي عبد الله ماتدري وين سهيل لنا يومين ندق علية مايرد قلتلهم لاهذا هو عندي
نيم انشغل بالأختبارات ويكلمكم ان شالله اذا قام .
قالوا اية الله يخليك خلة يدق علينا مشتاقين لة مرررة ابي اشحذة يجي لم الأمارات
يستانس معنا .. قلتلة خير ان شالله اقولة
من بعدة خلاص ضاقت بي الوسيعة ..
مر يوم الجمعة وجانا يوم السبت المشكلة السبت عندة اختبار علية تقريبا 20 درجة
حتى مارحت للجامعة فوتت ذاك اليوم كلة من كثر ماهو ضايق صدري علية.
يوم جت الساعة 11 تقريبا دق علي دكتورة قالي وين سهيل؟
ادق علية مايرد ؟ قلتلة هو تعبان وماقدر يجي اليوم ...
قال خسارة سهيل اول مرة يفوت اختبار وهو ممتاز عندي والأختبار علية علامات
كثيرة قلة لازم يجيني بكرا .
طلعت انا وصديقي فهد على طول للمستشفيات قلنا خلاص ماهي حالة نبي ندور عنة
بالمستشفيات..
دخلت تقريبا 3 مستشفيات للأسف مالقينا اسمة وطلعنا للمستشفى الرابع ..
لقيناة عندهم .. للأسف مسوي حادث مروّع وصارت عندة كسور وسيارتة راحت
هوى وهو داخل غيبوبة ....
قلتلة ليش مادقيتوا علينا ؟ قالوا ماقدرنا نحصل على ولا معلومة غير اسمة اما بطاقتة
وجوالة انطحنن تحت الكفرات وحتى صفطة مالقيناة .. طلع ناسية بالأستراحة ..
بلشنا عاد شلون نعلم اهلة وهم بعيدين حتى ماهم داخل السعودية ..
رحت لم خالة وقلتلة .. انفجع وانصدم وقال اني فاقدة له كم يوم مامر علي ..
قلتلة وحتى حنا لنا كم يوم وحنا ندورة وبكل المستشفيات واخيرا لقيناة بهالوضع
المهم وصل خبر لأهلة وراح يرجعون بكرا ان شالله من دبي والصدمة كانت قوية
على امة واخوانة ...
نقلوة الحين لم الرياض والحمدللة صحى من الغيبوبة بس عندة كسور عنيفة
بالكتف والرقبة ... بس الحمدللة على كل حال ..
حبيت اقولكم .. واخليكم تشاركوننا فرحتنا بردود الروح لة وسلامتة من اللي
اشد من هذا ...
انا قلتلكم لاني عارف معزتة عندكم ومعزتكم عندة .. وكتبتها بهالقسم لأنة قسمة
المفضل .. وابيكم عاد بطريقتكم الخاصة تعلمون كافة الأعضاء بكل الأقسام
عشان غلاوتكم عندة ..
من غلاوتة عندي حبيت انكم تشاركوني فرحتي بردتة رغم انة تعبان شوي
بس الحمدللة على كل حال ..
اخوكم /عبدالله صديق سهيل (د.كيف)
مواقع النشر (المفضلة)