طرى علي موضوع
ايام العيد وكل عيد وكل مناسبة...
تنحاس مريرتنا ونعاني من انواع السلام اللي تعبر عن كل واحد ونفسيته ومدري وشهو عنه
وذلك من طريقة بعض الناس في التحيه والسلام.. واللي حسب مشاهداتي وبعض المواقف
تتلخص في الهرطقه اللي بتجيكم تحت:
--- بعض الناس اذا جا يسلم يمسك يدك بقوة أمه وابوه ويرعصها
عاد انت ويدك كانك جلف بتتراعصون والقوي هو اللي بيستانس
جلوف وتصلحون لبعض... بقريح وبكيفكم
وان كانت يديتك يا قليبي رخيوه..
فبعد ما تسلم عليه ما اظن يمديك تزور مناخرك الا نهار ثالث يوم
-- بعض الناس يمسك يدك همن يبعد وجهه همّن يجيب خده بقوه ويلمخك على خدك
همّن يكررها ثلاث مرات وانت بس تستقبل ذا التلميخ من خدوده وانت في حالة رعب
وترد عليه وفي قرارة نفسك تقول :
اح من العايدين اح من الفايزين اح تقبل الله
---النوع الثالث هذا والله ودي اشفر الحتسي فيه
وهو اللي يطل في وجهك وناحرن براطمك.. تنحاش منه وتعطيه خدك ويمطخه وتسمع صوت
المطخه ترنع.. همن ينحر خشتك ثانيه شوي ويلقط براطمك الله يحوم تسبده.. وتقعد انت تنحّش عنه
وهو يلاحق خشتك يبي يبوسك كنكم في كليب اليسا (اجمل احساس)
(الله يبغثر بتسبدك انت واياه)
--النوع الرابع النوع المطفوق ودايم تلقاه يلبس نظاره ام قاع بياله
تكون مشخص ومرسم والشماغ تلق وتلمع طالعن عليك بذيك العّدّه من وفيها وهذا ينحر شماغك
ويحك اذنه فيها وما يهنا له لين يمتّخ معه 15 سلك من الشماغ بمسمار يكون ناط من نظارته حقة
الحيان همّن تقعدون تناشبون تفككون ذا السلوك وتتنكد ويخرب عيدك والا مناسبتك وتدور لك
مقص يقص ذا السلوك .. يلعن امها حاله
ان كان ربعك فيهم احدن تسذا عليك بالغتره والا اذا جا بيسلم عليك
طق بنت البكاّار وافلح
-- النوع الخامس هذا عكس هذولي كلهم.. تجي تسلم عليه وتعَيّد عليه وكن المنّه له هو وجبهته
يسلم من بعيد كن فيك بلهارسيا..
مع انك يا حياة الشقى وش انت عند روحك.. تعجعج اطياب ومصنفر حتى براطمك لكن الشكوى لله
-- النوع الاخير سلامه زين ومعقول بس مشكلته يترك كل عطورات الاسواق
حتى اللي عند ابو ريلين وبزعمه انه متطيب بدهن ورد وهم لاعبين عليه وباعينه زيت قير
واصلا اكره ريحه عندي دهن الورد احس اني مضبط الشخصيه في غرفة جدتي
يجيك الاخ هذا و يحوسك ويلعوط خدودك .. همّن ابحل بعمرك وش يروح ذا الخياس والزيت منك
يا الله يسبحك تكروني من حقين السيارات...
السؤال اللي يتبادر الى الذهن..
فيه احد من اعضائنا الموقرين سلامه مثل الاصناف هذي؟؟
مواقع النشر (المفضلة)