تعالو نفل امها وننسى شي اسمه دراسه و اختبارات ....
يومني شفت حمــادهـ طالع وزاقه الاخلاق قلت خلني انزل الماضوع اوسع صدوركم شوي..
يالبي قليب حمـــادهـ معصب وحـــط حرته بالموتر ......
هاه كيف الاختبارات ؟؟ وكيف النفسيات ؟؟ .. المهم ما علينا .. وش رايكم نفل أبوها بهالموضوع؟؟ .. و اخذكم معي لرحلة .. مال أمها دخل بالـCPU ..ولا الـCodes ونبي نعيش بعالم ثاني .. بعيد عن الدراسة والضغط النفسي .. وفلسفة الدكاترة .. اللي يجونك ما يعجبهم العجب ولا صيام العشر الاواخر .. والمشكلة ما قد شفت احد يتفلسف إلا اكتشف انه من جنبها .. أييييييه .. أقول لكم مريت بضغط نفسي وذهني الفترة اللي راحت ..الله لا يوريكم .. لدرجة رجليني لفـّن كلهن يسار .. وصرت اذا جيت ادخل القاعة والا جيت ادخل غرفتي لازم اتويقع على الباب من بعيد .. واحط خطوط طول ودوائر عرض .. وانحرف بمقدار 23 درجة فهرنهايت .. ثمين اجيك مسرع وادخل .. فأحيانا أبوّس حافة الباب .. وأحيانا تجي سليمة .. ويارب يفرجها ويعديها على خير هالفترة .. المهم ما علينا : طلعت من الاختبار يوم الربوع .. وأبي أي مكان اتجّه له مالها أي علاقة بالكمبيوترات ((بحكم دراستي حاسوب بالعربي خخخخ )).. حتى جهازي حاطه بالشنطة مع الاستبنه .. و عدة الشاهي .. مالي خلق على شي الكتروني ابد !! .. ووين تروح يا هـــاوي وين تروح !! وأجي والقى اخواني هالثيران متجمعين على السفرة ولا تدري وش هم يقولون .. ويسولفون بسرعة مع بعض عجزت افهم شي .. وياكلون ويحتسون.. واناظر وجييهم قلت والله من زين الاخوان ..المهم فهمت انهم يحتسون عن حمام وارانب !! وأنا اطمر من مكاني .. تسنهم قايلين سعد الحارثي جايبن هدف باخر الدقايق !! قلت ورا ما اروح لسوق الحمام ؟! أنسب مكان .. وهو المكان الي تنطبق عليه الشروط اعلاه .. والله وأتوضى واصلي العصر .. وادق سلف .. ولسوق الحمام !!
ياااالله يا جماعة .. أجواء ما تتخيلونها أول ما وصلت وأشم الريحة بغيت اديور .. و تطلع فوق راسي صورتي .. زي افلام كرتون .. ولها جنحان .. وعليها دويرة خضراء فاتح .. قال لي يا مـــحمد اللي يبي الدح ما يقول أح .. توكل على الله بس وادخل السوق .. وغير جو .. قلت لصورتي .. بس خياس ؟؟ قال يا رجال : مرتن بالعمر ماتضر ؟؟ .. والله والبق وانزل .. ياربيييييه مدري وشلون واصف لكم شعوري .. والعالم تتهاوش مع بعض .. واللي يقول ( على كم سيم زوج البط ؟) ويرد عليه راعيهن .. " افتح بابه " !!.. و ورا بالزاوية واحدن فاهمن سوق الحمام غلط ويبيع مكسرات وكاجو !! شوي يوم واحد لللللللللعن أم البوري !!! واشوف بزر قذررر أوصخ من ثوبه ما شفت !! ومطلع يده بغى يطقني يقول لي ابعد عن الموتر ما تشوف انت ؟! وأنا اوخر .. يوم لبق الددسن ..مليان الى راسه شبوك حمام .. وشوي الا يوم بدا المزاعق وبدوا العالم يكثرون <<--- من قو الطفاقة جاي قبل حقين المحلات .. واسمع مصطلحات لي خمطعش سنة ما سمعتهن !!
واناظر يميني ويساري ..والقى ذاك الجداوي !! حاط رجل على رجل !! وقاعدن يشرب شاني !! قلت ذا شكله فلة .. خلني بروح اسولف معه .. يوم وصلت لمه قلت السلام عليكم .. يوم دلّى يهز رقبته .. كنه يقول لي وعليكم السلام بس بدون صوت !! واناظر الحمام اللي معه .. قلت شكله يستهبل !! حات ريش راسها وتافلات العافية لا ومن زين الطبايع حاطن لهن حب شمسي .. ينقاله مدلعهن .. قلت له وش ذولي يالحبيب .. حمام زاجل ؟؟ قال لي زاجل في عينك (تتريق يا واد ) .. قلت له اسمي مــحمد منيب واد !! قال وتنكت كمان ؟! قلت له لا انكت ايقاعات !! .. واخذ له شفطة من الشاني .. قال (هيا يا واد ) امشي من هنا .. انتا مالك ومال الحمام .. قلت وين الحمام ؟؟ قال ايش شايف هذي "وهو يغز على حمامه" ؟! قلت بالله ذي حمام؟؟ كنت احسبها بيض عيون !! وبعدين يخوك ادري انها حمام !! بس وراك محلقها موس !! يخوك من بيشتريهن وهن كذا <<--- نسبته لابوه !! .. قال لي : ربي اكرم منك .. قلت له :وأكرم منك .. لكن يالله حطهن لي بكيس اباخذ لي جوزين بـ4 ونص و خلني عميلك !! وتراك الكسبان !! يوم دريت مار يضحك !! قلت له يخوك من الصبح اضحك !! معبسّ وحالتك حالة !! قال لي والله شوف يا خوي الزباين يرفعوا ضغطي وانا دوبي صاحي من النوم .. و السوق هادا مو زي سوق زمان !! قلت له ليه يعني عشان ام كلثوم ماتت ؟! يوم ضحك اقوى من الاولى !! وتسنه بدا ياخذ علي .. وخليته يفضفض .. والله يا هو بتل يسولف .. قلت شكله يبي يقول انه معاصر عمر المختار .. ثمين ابمزعّ حمامه هالصلعان !! .. بس يمينا بالله هالربع ساعة او الثلث ساعة اللي جلستها معه .. متعة ما اقدر اوصفها .. يا اخي يا زين اذا جلست تسمع هموم واحد .. بعيد عن المجال والبيئة اللي انت عايشها .. المهم ودعني بحفاوة ..وتركته وخشته يمدي الحمامة تدخل باثمه
واناظر واطلق لعيني العنان وألقى شبك كبير مليان دجاج !! وأقرب لم الشبك .. وأحط عيني بعين دجاجة !! وأخذ نفس ونقعد نتبادل انا واياها نظرات العشاق يمكن خمس دقايق !! حسيت عندها اشياء كثيرة ودها تقولها بس ما احد فاهمها .. حسيت ودها تتكلم ودها تنطق بس ما جاء الوقت اللي تتجرأ وتكشف لي اللي يدور بخفاياها .. يالله يا عيون الدجاجة .. والله يا جماعة نصيحة اخ لاخوانه اللي وده ينسى الدنيا ومشاكلها وهمومها .. يحط عينه بعين الدجاجة ربع ساعة !! وراح تدرون ان الدنيا ما تسوى قوطي الشاني اللي مع الجداوي !! أجواء ما يحس بها الا اللي عاشها !! تحس ان الدجاجة انسان برئ !! .. انسان طيّب ما عنده خيقي بيقي !! .. يا حبي لها هالدجاجة .. ابسألكم سؤال ؟! بالله من فيه منكم فكرّ يوم من الايام يعرف الدجاجة ورا شكله صايرن تسذا ؟؟! من قد سأل نفسه عن رجلين الدجاجة و ليه اظافرها طوال ..وهل اذا ضاق صدرها .. بدت تقرضهن بسنونها!!<< أي سنون يرحم والديك والا ما يجيها هالشعور ؟! اقول لكم حطيت عيني بعينها اكتشفت معاني كثيرة للحياة .. والله اني حبيتها من كل قلبي .. وقعدنا نتكلم انا واياها بلغة العيون ..<< على قولت القايل:
من عيوني لك مراسيل الغرام *** كان تفهم في لغة حب العيون
وحاولت اوصل لها .. وش كثر انا حاس بدفا عيونها .. والطيبة اللي كل العالم غافلين عنها .. خلونا واقعيين مع بعض اكثر ؟؟ ليه الدجاجة بس تعطي بس تعطي .. ما تاخذ ابد !! ليه الدجاجة مهمشة بهالمجتمع ؟؟! ليه اذا جينا نروح لبخاري قلنا له (عطنا نص حبة ) !! حتى ما نتنزل نقول (نص دجاجة) !! لهالدرجة انانيين ؟! .. يا جماعة راعوا شعورها .. حتى الديك صاروا يستخدمونه في (مطاقات) والفلبينين صاروا ما يسمعون به وصار له حلبات وسعة صدر!! ويدربونه ويحبونه !! والدجاجة لاعنين خير خيرها ..و كمل الناقص (انفلونزا الطيور)..
واناظر في الشبك أبشوف وش حاطين لها اكل ؟! .. واثرهم حاطين لها (علف) !! علف يالظالمين !! عنز هي !! والا عشانها ما تطلب !! وساكته تسوون بها تسذا !! اتحدى واحد يجيب لي أكلة مخصصه للدجاج ؟! دايم الدجاجة ما تاكل الا اكل غيرها .. والله ما جرحني شي كثر أني اشوف في عيونها القهر والضيم !! وهي دارية انها مجروحة !! عمركم شفتوا احد كاتبن قصيدة بالدجاجة ؟!! كل القصايد بالبعارين .. والخيول ..والصقور.. عمركم شفتوا احد جايبن راعي .. عشان يرعى بدجاج ؟! عمركم شفتوا احد شاري وكر وبرقع .. ويدرب دجاجه على الأقل يأمن مستقبلها؟!! عمركم شفتوا أحدن شاري شبك زين والماء على شنق والاكل على شنق وحاطن به دجاج ؟؟ حتى الحمامة .. يستخدمونها بالسياسة .. وحمامة سلام حمامة سلام عمركم شفتوا .. أحد يقول دجاجة سلام .. ما قد شفنا الا دجاج شواية .. لهالدرجة مهملينها !! عمركم شفتوا لوحة بها رسمة دجاجة ؟!كل اللوحات نمور واسود .. بالله وش يسوى كودو وماك وتوم توم وكنتاكي وهارديز .. بدون هالانسانة الطيبة هالانسانة اللي ما آلت جهد .. حالبينها حلب !! يبونها تطلع بيض بالقوة !! بحياتي ما قد شفت (فقاسة ) للبعارين !! والا فقاسة (للارانب) !! بس الفقاسات للدجاج !! عشانهن ضعوف ولا احد يدافع عنهن ..
صدقوني أسلم حل عشان نطلع من الاجواء الاختبارات .. والضغوطات .. اننا نحط عيننا بعيون الدجاجة .. ونسسسكت ما نتكلم ولا ننطق بحرف !! جربوا هالطريقة وتشوفون وشلون تصغر الدنيا بعينكم .. وتشوفون وشلون ان فيه ناس تضحي وتتعب ولا احد معبرها ..
وحنا قدامنا المجد .. وتعبنا .. مقدر ومثمن .. وجهدنا ماراح يضيع ..حتى لو حملنا مادة حتى لو تعثرنا بكم كورس .. حنا سوينا اللي علينا والباقي عند رب العالمين .. ورزق الواحد مولود معه ..
بهالدنيا نسمح للغربان نطير بسمانا !! لكن ما نسمح لها تبني لها عش في دارنا !! كل الامور السئية أمور عابرة !! والهم كأس .. ان طال حملنا له .. ارهقنا واتعبنا !! رغم صغر حجمه !! لذا الواجب من كل واحد منا !! يعطي لنفسه مساحة أنه ينزّل هالكاس من يده !! ويريح جسمه وذهنه !! ويطلع من عالمه !! بأي شكل من الاشكال !! يسترخي يفكر حتى لو بعيون الدجاجة !! ويرضى بالمكتوب !! ويتقبل الحياة مثل ماهي !! أنجح رجال العالم !! هم اللي ذاقوا مرارة الفشل !! أشهر المخترعين !! هم اللي تعبوا هم اللي قاوموا هم اللي تحاربو !! هم اللي تدمروا !! بس بالاخير لا يصح الا الصحيح !! .. أمهر العازفين .. هم اللي اذا انقطع من آلاتهم .. وتر !! كملوا بباقي الاوتار !! ما يعيقهم شي !! ولا يوقف اراداتهم حدث عابر !! .. بكل شي يصادفنا بهالحياة حنا المستفيدين .. حمل المواد عبارة عن تجربة تبي تعلمني مستقبلا .. اني مقصر بجانب من جوانب حياتي لازم اضغط على نفسي شوي .. واعوض هالنقص .. نزول معدلي .. المفروض ما انه يهدّ حيلي ويخليني العن خير الدكاترة .. وانسى تشخيص الحالة .. وان اللي صار بسبب (خطأ مني ) !! وتقصير !! موب بسبب ( عيب فيني ) !! لذلك الخطأ يصحح !! والاعوجاج يقوّم .. وارجع لوضعي الطبيعي .. بنفسية مفتوحة راااضية .. عشان يكون لي مساحة اقدر افكر بها .. واشوف نفسي بكل وضوح .. لكن بمجرد ما انا عايش .. بضيقة صدري .. وهمومي .. ولا به اي مجال للتنفيس !! ابتعب واتعب اللي حولي !! ولا راح القى هالمساحة اللي اقدر افكر فيها بنفسي !! واصلح عيوبي !! واستفيد من تجاربي !! ويضيع الوقت كله ما بين !! ندب لحالي !! وتنفير الناس مني !! .. وصدقوني اخر كل نفق .. لازم يظهر النور !!
ان شاء الله يعجبكم الموضوع
تحياتي لكمـــ
مواقع النشر (المفضلة)