[align=center][glint][/glint]
السلام عليكم ورحمة الله
كيفكم شباب ويا بنات منكم الزين والشين
و دايم تصير لك و معك بنفس الطريقه و غالبا نفس الوقت أو اليوم؟
طبعا و أكيد مالها عدد !!
.. و هذي – بالضبط المضبوط – مشكلتي
//\\
برايفت لـ إخواني
ما تحسون إنكم من زمان و أنتم صغاااار ..؟؟ قسم بالله أحس هذي أشكالكم من يوم تعرفنا على بعض .. منيب أشوفكم يالقزمان تكبرون أو حتى تتغير أشكالكم مثل الخلق و باقي الأوادم
بعدين أنا كم مره قلت لكم إلى منّي جيت أبنام عقب الدوام .. لا عاد اسمع حس ياصل لم باب غرفتي و الهواء اللي يحيطه ؟؟ .. لكن الظاهر انكم صقهان .. يعني عقب الطق و الهواش مع النوم اللي مدري وش فيه رافعن خشمه علينا هاليومين و يالله تتكرم عييناتي و تصكّ نفسه .. إلاّ يرتفع صوتكم و صراخكم .. خصوصا أختكم ذيك اللي تقل نافضه كهرب .. مير وحدتن منكم عسى ما ينغزه أحد حتى لو ما يدري إلا انفقعت صياح و لاهيب تسكت إلا باتسر .. !!
وسلموا لي عاد عقبه على النوم و الغرفه الظلما و المكيف البارد اللي شكلي منيب لاقيته بالدنيا .. إلا تسان الله يدخلن الجنه برحمته .. و لاّ وين الواحد يب يلقى الراحه و لاّ الأكل و أنتوا إخوانه ؟؟
إلاّ على طاري الأكل .. بالله كم عدد وجباتكم في اليوم ؟؟ <-- طراه إن لي أكثر من اسبوع أرجع لم البيت ميتتن جوع .. و لا مني رحت أبتغدى ألاقي الصحون ممسوحه بالحيل قوتن مره و لا أطلق صابون .. لعنبوا ابليس ريحوا بطونكم عطوا الأكل فرصه خلوه يحدر !!
(صورة وجه يقول : أول مره أشوف عيله تاكل ثلاث وجبات رئيسية .. و بين كل وجبه ثلاث وجبات فرعيه يتفرع من كل وحده ثلاث وجبات !!! )
//\\
برايفت لـ جدي
الله يعينك على نفسك قل آمين
يا بيّي أنت مشكله قائمه بحد ذاتها قسم بالله .. يعني من النوع اللي لا سولفت ما تسكت الله يحفظك .. و لا سكتّ إما لأجل تستهل السالفه اللي عقبه أو تبلع قهوتك اللي حرارته تصلخ الحلق مرتن وحده .. أو إنك نمت فجأه أو إنك فطست .. أدري لزم(ن) علي أقول : الله يطول عمرك بطاعته .. لكن تراك زودته حبتين أنت و هالوجه
ما قلنا شي .. تبي تسولف سولف بإيديك و رجليك .. لكن ماله داعي كل سالفه تاخذ به يوم إلى يوم و نص .. ترا ورانا أشغال غيرك ههههه
(نصيحه : تبي تعاقب أحد دخل عليه شايب نايمن زين مع دلة قهوة و اقفل عليهم الباب)
//\\
برايفت لـ وحدتن في بالي
يا دبشه ما تفهمين أنتي ؟؟
يعني قسم بالله لو إني منتس تسان استحي على دمي و لا عاد اتصل أبد !
أجل فيه وحده تدق في عشر دقايق 66 مره ؟؟ .. منتب صاحيه حشى !!
يا بنت اهلتس انقلعي ما بي اسولف معتس غصب الدعوى ؟؟ .. لا و المشكله تدق ولامني ما رديت ادهرت بالمسجات .. قالت ايش قالت : وراه ما تردين علي .. أو ردي الحين بلا مصاله .. أو وش قاعده تسوين شكلتس مشغوله .. بالله ؟؟ ما ودتس كل ما زينت شي أرسل لتس مسج و أعلمتس ؟؟
(تراي طلعت من الغرفه ابروح لم المطبخ )
.. همن (تراي مريت بالمطبخ و ابروح لم الصاله ) ؟؟
صدز لا قالوا : فيه ناس وجهها مغسول بمرقه .. و فيه ناس وجيهها ما قد انغسلت لأن ما عندها وجه أصلا !!
( وجه يقول الله يقلعتس )
//\\
فلاش لكم
أزين ما بالموضوع إنك تسب في ناس و تبرد خاطرك و هم ما يدرون إنك مقطعن جلدهم ..
برفتوا للي فاقعينن قلوبكم و المسبب الأول لمرض القلب و الضغط المبكر .. و لا يردّكم و يمنعكم غير الشات و لا هانت عصاي
(وجه يقول قو آهيد )
[glint]منقـــــــــــــــــــــــول !![/glint] [/align]
مواقع النشر (المفضلة)