اخواني واخواتي في منتدى الزين وشلونكم وشلون شيبانكم عساكم بخير ..
وطبعا بمناسبة عيد الأضحى اقول من العايدين ومن الفايزين ولو انها متأخره شوي بس مثلكم يقدر .... طبعا اليوم راح انقل لكم قصه وقصيده مأثره لبنت فقدت غالينها ........
اليوم جايكم ... بحزن نوره
حزن
انكسار
نوره الحره اضحت بدون اجنحه
الاخ السند العز راد الضيم مات
راح ولا بقى الا فرسه
والقدر اخذ اللي فيه الامل
راح الصغير بحافر فرس اخوه
الاول فارس ذبح على ظهر الفرس
والثاني طفل ذبحه حبه لفرس اخوه
والفرس عرفت الاول وتشيمت من الثاني
كنها تقول ماعقب الفارس رباط وطفل صغير
بيت العز منول على ثنتين هي شجاعه وكرم
ولا كان العز بالمال لان المال بدون الثنتين بيزول وان مازال بيصير مذمه على راعيه
والبنت منول عزها بفعل ابوها واخوها واكثر ماتعتز به ويرفع شانها هو فعل اخوانها
ولا يخطب اخت الفريس الا عزيز قوم والعزه في الكرم والشجاعه
يا كبر وجع قلبك يانوره فقدتي غالين وفقدتي عزه وقدر وفقدتي أمن الدار ومهابته
نوره عقب ترقب اخوها الخيال الفارس وهي على وجه بيت الشعر اصبحت تجلس في اقصى البيت
ولاعاد فيه من تحتري مجيه والا ترقب اخباره و افعاله وتطرب لمدح طيب فعله من القريب والبعيد
وفقدت من ترفع صوتها باسمه وهي تقول وانا اخت فلان
وش اوجع نوره وش زاد وجعها عقب ذا كله مهيب بخيته عز الله ماعقب اللي هي فيه شي
ولكن الاقدار تبتلي الناس بامر الله مصرف القدره سبحانه
اخوها الصغير هو اللي معقود فيه الامل وهو من في يده يطلع نوره من حزنها
ولكن قدرة الله ساقته على درب اخوه اللي قبله وربطت الاقدار بين فقد الاول والثاني بالفرس
الفارس مات وهو على ظهرها وهذا قدر الفرسان ... والثاني ذبحه حبه لفرس اخوه
فرس الفارس عنيده ومن طبع الخيل الاصايل تاخذ من جبارة فارسها وتكسب طبعه
وفرس الفارس فيها العناد والقسوه لانها عرفت ريحة الدم ومداحم الخيل ولها من صواب الفارس نصيب
ان اخطاها رمح مره يمكن تصيبها شلفا وان اخطت الفارس رصاصه يمكن تلقى فرس الفارس منها نصيب
وفرس الفارس نادر ان تقبل غيره الا ان كان فيه قوه وصلابه ويقدر يّطوعها ويكسر جبارتها ويعسفها
ومن هنا قالو الاولين الخيل تعرف خيالها
لكن جهل الصغير وحبه لراعي الفرس ساقه لقدرته
قام يتّرومها ويتقرب لها ويمسح عليها ويتلقف لجامها بيده اللي عادها طريه
ولكن الفرس فاقده راعيها وجايها من ذا الصغير مازاد بلاها
واستنكرت الصغير ورفست الصغير وطيرته تقول خرقه وفجت صدره
ولا وقع في الارض الا هو في عين نوره اللي حطته بين ايديها وهي اطالع فيه وعيونه طايره و يدور النفس
راح اللي بقى لك يانوره
ابوها كيف صار حاله؟؟
صوت العزيز انطفى بين شيب راس وفرقى عياله
ياشين حاله في زمن تضيع فيه الانفس بين مرض ماله علاج وضرب القنا اللي ماتجي العزه الا به
انكسر العود وبلع وجعه وهام في حزنه ...
نوره انشدت وقالت بيتين بغت تلحق العود عياله لو ماقصرتها
يا موت أخذت أثنين وش عاد خليت
أخـذت قبلتنـا وراعـي ضعـنـا
فتقتنا فتق الذرى من قـرى البيـت
يا ولينا مـن يجلـي الضيـم عنـا
يوم سمعها الشايب قال اسكتي والا لَحقت نفسي عيالي ..........
اخوكم راعي الطيب
مواقع النشر (المفضلة)