مجروح لكن حالتي مستقرة !!
السلام عليكم ورحمة الله وبركاتة
قصيده جميله .. للشاعر \\ حسين البليهي
اتمنى ان تنال على اعجابكم
اللي ضرى قلبه على طعن الاحباب
ماظنتي طعنة عدوه تضره
واللي يخاف الحبْل لاعضه الداب
شوري عليه يْحطْ شيلة وغرة
هالحين عقب الداب والسم والناب
يخاف من حبلٍ خياله يجره
لالاتتطمن حيل ياعز الاصحاب
مجروح لكن حالتي مستقرة
وابشرك ماني مشكك ومرتاب
مداي ياصل ويتعدى المجرة
وابشرك ماني بفاحش وسبّاب
ولاني جبانٍ يطعن بحين غِرة
واللي يحب السْتر لاجناب الاجناب
ماظنتي فضح القريّب يسره
حتى لوانه هيسٍ اربد وشذّاب
يب الله يعينه وجرحه يصره
ولوالسحابة كل ماتنبح كلاب
تبرق وترعد كان صارت مْجِرة
وترى الرجولة ماهي بطول الاشناب
ترى الشنب ينبت على كل فرة
وانا ادري ان الوقت لو زان قلاّب
شفنا به انواع التعب والمعرة
صار الاسد يضرب تحيّة لسنجاب
ولياعصى تاطا علابيه هِرة
( صبرا وشاتيلا )الأسى ماسمها ارهاب
و(محمد) ارهابي ولله(دره)
تغيرت حتى الاسامي والالقاب
(ريماس) كانت قبل عقدين (قِرة)
ودنياك لهو ولعب ومفاخر انساب
متعة غرور وخاسر اللي تغره
يارب يامصبّر على الكيّ (خبّاب)
ياجاعلٍ جنة عدن مستقرة
تحسن عزا من طاب جرحه ولاطاب
ومن تجبره يبرا وينزاح شره
من تجبره لوهوكسيرٍ ومنصاب
يركض لوانه دربه بوسط حرة
عزي لمن هو يخذله رب الارباب
وياسعد من رب الخلايق يبره
والآدمي مطلوب ياخذ بالاسباب
لوكان مايملك ولوجزء ذرة
يارب تقبل عبدك لياذنب وتاب
وليانقطع زره بسترك تزره
و تكفيه شر اللي لها سبعة ابواب
وام الثمان تْصير هي مستقرة
سلامي
رد مع اقتباس
مواقع النشر (المفضلة)