السلام عليكم ورحمة الله وبركاته
ماأدري ليش ماعمري حبيت مديرة مدرسة درست فيها ..
وماأدري ليش دايم المديرة تكون شريرة .. وصورة واقعية للوحش المخيف
وياما لا شفتهن حطيت رجلي مع أني ماأكون مسويه شي
بس هم حتى الوقوف أو المشي جريمة تستلزم العقاب ..
صحيح القسوة والغلظة مطلوبة خصوصاً انها تنفع مع بعض العينات ..
بس حتى الحسنى والكلام الطيب نتائجه قد تكون أفضل وذات مدى بعيد
وسبحان الله على اني كنت أمشي جنب الحيط مثل مايقولون ..
لكن ماسلمت من المديرة أو من تليها
وأكثر شي كان يقهرني لامن معطن (( الشباصات )) اللي في روس ذا البنيات
في المتوسطة كانت مديرتنا لاشافت راس وحده فيه شباصه
ماتجي تقولها شيليها ..
تجي هي بنفسها وتتلها من شعرها لين شعر البنيه اللي قاعده طول ليلها تهبطه منتفش ..
والحلق .. عاد أكثر شي أحبه أنا الحلق من بد كل الاكسسورات ..
ومره كنت واقفه بالطابور وجت وقفت جنبي وبدون أي كلمة مدت يدها ..
عاد دايم كل وحده تخبر وش عندها وتعطيها اياه ..
المشكله ان الحلق كان ذهب وكان هديه من أبوي ..
ويقالي من الحيا و (( الخوف )) طبعاً ماعلمتها انه ذهب
وراح الحلق مراح جدي ..
ومره كنت أتمشى مع صديقتي وقالت لي شي ومزحت أنا وطقيتها مع كتفها ..
شافتني اداريه وهي تلقطني للمديره وماطلعت من مكتبها الا أنا كاتبه تعهد بعدم ممارسة العنف مع أقراني ..
وهي طقة كتف وصار تعهد وعنف .. لو اني زانطتها وش كانت سوت بي ..؟؟
وبعد أكثر شي نستمتع فيه ويرعبنا في نفس الوقت (( التفتيش )) ..
لاداهموا الفصل وطردونا منه وقعدوا يفتشونه ..
اللي يقهر انهن يفتشن والوحده كلها أمل تلقى شي معنا ..
متعتهم ووناستهم لا خذولنا شي .. ورموه بالزباله والا كسروه وعيوننا تشوف
أذكر مره كان تفتيش ووصلتني ويوم خلصت ابتسمت أنا لصديقتي ..
قامت حجرتنا ونهارها كله وهي تقول اعترفي انتي وياها وش معكم .. :mad:
ومره وهي تفتشنا خذت القرآن وفتشته .. قلت :: قرآن وش بنحط فيه يعني ..؟؟ :9ar:
قالت :: اسألي عمرك
وطبعاً أي محاولة لنا بتعديل شعورنا أو تمشيطها أو جلب أي شيء حتى لوه فازلين
تقابل بالعقاب ..
طبعاً مدارس البنات مافيها مرايات .. ومن زود الشر صابغين البرادات
عشانها تعكس .. وأنواع التلطيخ والمناظر البايخه في المدرسه
ومو بس أدوات التجميل ولو انها ماتتعدى المرايه والعطر واذا خربتها البنت جابت لابيلوا
حتى الكتب مرفوضه .. وياويلك ياسواد ليلك لو لقوا عندك كتاب غير الكتاب المدرسي
وياليت اللي نجيبه يعني كتب ممنوعه أو مهيب زينه ..
أي شيء ماله دخل بالمدرسه مرفوض ..
طيب العلم والفائدة غير مقتصر ع الكتب المدرسيه ..
فيه أدب وفيه روايات وكتب علميه ممكن تكون مفيده أكثر منها
مع ان هالكتب المفروض تكون متوفره في مكتبة المدرسة مو نقعد نعيرها لبعضنا
ومع ذلك ياما تعرضت كتبي للمصادره طبعاً مع زفه تهبل ..
وتهديد ووعيد لو عدتها مره ثانيه ..
وبعد فيه شي يعني الله بس يستر عليها ذا اللي طرالها ذا العقاب ..
في المتوسط ويمكن تذكر (( أم صقر )) .. اذا صارت جزمة البنت مخالفة
أقصد تعلوا عن الأرض أكثر من 3 سم شلحوها الجزمه .. ولبسوها شبشب حمام
<<< وأنتم بكرامه
وخلوها تكمل الدوام فيه .. ولا جت تطلع تمرهم تبدل
طبعاً ماكان يأثر في البنات .. بالعكس كان أبرد
وأذكر مره فتشوا ولقوا معي دفتر صغنون فيه خواطر ..
خواطر عاديه وكنت في بداياتي يعني مهنا زود في اللي أكتبه ..
خذوه وهزأوني وودوني المديره وكتبت تعهد
ودقوا على أمي ..
وجتني أمي منهبله تقول وش أنتي مسويه .. وعلمتها وقالت :: بس
قلت :: ايه
قالت :: وش أنتي كاتبه فيه طيب ..؟؟
قلت :: يمه اللي قريتها عليك ذاك اليوم
قالت :: وكل ذا عشان اللي كتبتيه .. بلا خواطر لو انتس كاتبتن شعر وش كان سووبنا
قلت :: اووووه كان صرت منحرفه ومااستحي وماتربيت
وطبعاً راح الدفتر مراح جدي ..
الله يحللهن ويبيحهن كانهن هبلونا ..
بس ان شالله ان التربويات الآن غير ماكان على أيامي <<< ماصارلك ثلاث سنين طالعه من المدارس
خفوا ع البنيات واحتووهن .. والكلام الطيب أفضل بكثير من الهواش والتعهد والطق
بقلم :: أنــــشــودة الــمـــطــــر
مواقع النشر (المفضلة)