قصيده اعجبتني وللأسف ما اعرف قايلها
ان شاء الله تعجبكم
سبع ساعات أسولف واتكلم واستخف دمي
وهي تسمعني وتضحك ومبسوطه على الآخر
سبع ساعات اعلمها عن احزاني وعن همي
واسولف عن حكاية طفل كان وصار هالشاعر
سبع ساعات تتساقط حروف الصدق من فمي
على صحراء مسامعها سحاب العشق متناثر
سبع ساعات ونادتني باسمه ما هو باسمي
تناديني فهد واسمي انا ياللأسف جابر
تشنج كل شي حولي ومسمعي يدمي
ركز خنجر فهد في مسمعي من صوتها الخادر
تخدر فكري وجسمي وذاب بداخلي عظمي
وصرت اسمع صدى صوتٍ يردد غطلة الشاطر
غلطة الشاطر بعشره واقعي وحلمي
وترددها زوايا غرفتي والواقع الغادر
كثير أصوات شقت جلدي اللي يحتضن عظمي
وصراخ الباب والدولاب والشباك والساتر
وونات القلم والدفتر اللي يلتفت يمي
وخايف وش ابي اكتب بوسطه من هنا لباكر
وكانت ساكته وصوت النفس من خشمها وخشمي
ربع ساعة وببحة صوت قالت خير وش صاير؟؟
وطرى في بالي عبدالله وخالد واحمد ونشمي
والى آخرهم فهد تسعة وأنا مدموغها العاشر
وقلت ابداً ما غير الخير ولكن امسحي رقمي
اكيد انه فهد جالس سبع ساعات وهو ناطر
وقالت لي: رجاءً ، والا أقول لك طير يا عمي
مسوي حضرتك في هالزمان العاشق الطاهر
وقالت لي أقول ، وقلت انا بأقول وذا علمي
عجب للناس وش هالناس تخطي وبالخطا تكابر
انا يا بنت بأنثر لك حياتي واجمعي ولمي
بعضه ، بأنثره في مسمعك هالحين ومن خاطر
ترى عمري انا تسعه وعشرين وكذا رسمي
ولكن عشت أيامي دبلها مقبل وعابر
أصيل وكل أصيلٍ ما يبي مدحي ولا ذمي
وسبع أنعام في هالناس أخص الحامد الشاكر
أنا من نجد وربعي هم عتيبه وخالي الدحمي
وبرقا لحمي ودمي وانا من روق ومع ناصر
انا جابر ولد هايف وسلم الطيب هو سلمي
ابوي اللي مربيني على الجزلات وأتفاخر
أنا راعي مجاهيمٍ يشّع بفخذها وسمي
وراعي خيل وراعي بير وبيتٍ مبغضه كافر
على الرمضى حفت رجلي بأرضٍ عاشقه ضمي
وشمسٍ تشرق وتوقف على راسي وانا صابر
عرق وجهي يصب وأمسحه بشماغي وكمي
وألد عيوني عن ناسٍ سرقني يمها الناظر
وأنا شاعر ولو أكتب عجزك الفكر في نظمي
ولاني بالغرور احكي ولكن واثق وقادر
وانا رجّال هاوي للقمم ويقودني عزمي
وأبي أرقى على راس الجبل وانتي مع الحادر
عرفتي ليه أنا طاهر؟؟ لإنك همي وغمي
ولإن الدنيا في عيني جبل نرقاه ونغامر
يابنت الناس شفتي كيف بليا سلاح ما نرمي
ولا نوقف بوجه البندق المليان ونخاطر
خلقنا الله بشر بعقول وذا واقع وذا وهمي
وكلٍ يتبع مراده وفينا رابح وخاسر
وقالت لي فمان الله شعلت النار في جسمي
فمان الله يالطاهر ومثلك قله ونادر
ورحت آخذ كتاب الله واحلّف بالكتاب امي
لو أن اسمي فهد بالله ما كان أحلى من جابر؟؟؟؟
منقوول
مواقع النشر (المفضلة)