حديث العدسه

[شموخ أنثى]

على الذكرى وقفت أنثر دموعي في بيوت الطين
به أغلا ذكريات العمر كله وأجمل أيامي

بها عشنا البساطه مع بعضنا بالقسا واللين
وهجرناها ولا شفنا السعاده من هكالعامي

أزور أطلال في نفي القديمه بين حين وحين
أعيد الذاكره لأيام صارت طيف واحلامي

سقاك السيل ياوادي نفي ياسلوة السالين
بنينا فيك سيسان الهوى مع ترف الاقدامي

على وضح النقا نلعب علىوضح النقا صافين=
قبل مانعرف التمثيل والفديو والافلامي

قبل نعرف مخططنا ونسكن فلة الدورين
قبل يقرن بنات الناس ويشيلن الاقلامي

قبل نفقد ظلام الليل قبل ننور السيدين
قبل تسود الايام وتطول يدين الاقزامي

قبل نخلف نواياناونصبح بين جيم وسين
قبل نصبح حبايب ليله وفي ليله أخصامي

قبل مانبني احلام من القرطاس والفلين
قبل نحكم على بعض السلوم بحكم الاعدامي

قبل نصبح مثل قصة غراب ضيع الثنتين
وفي وسط الفلل نبني بيوت الشعر وخيامي

قبل مانعرف الشيكات بالميسور قنعانين
قبل نعرف رصيد البنك وحسابات وارقامي

قبل مايصبح لملابس النسوان خياطين
وثوب(ن) لبس ليله عافته من زود الانعامي

قبل يدخل بيوت الناس خدامه وسواقين
وحنا كلنا مع بعض سادات(ن) وخدامي

قبل نعيش بين زيود وهنود(ن) ومصريين
ومع تركي وبنقالي ومع سوداني وشامي

قبل مايختلط بالحابل النابل وزين بشين
واشوف اللي يمين يسار واللي خلف قدامي

هو الوقت اختلف ياناس والا الناس مختلفين
أنا وان قلت دنيا مدبره مانيب منلامي

عليم الحال سبحانه بماقدر لنا راضين
وهو في كل ماتخفي لنا الايام علامي

مغيره دايم ودنيا الفنا واللي بها فانين

كل ما دار الهوى شرقي وهب
رجّع بطيب الثرى عبقٍ عليل

وان تصلّب بالشمالي أو غرب
فاح بن واقحوان وشاع هيل

يرفل البلبل بجنحانه طرب
والنخيل يهزها الشوق وتميل

يا نخيل الخير يا فخر العرب
والزمان اللي عطا مجد ونخيل

يا ملاذ قلوبنا وقت التعب
يا ذرانا يا دفانا والظليل

من جريدك غارت بيوت القصب
وازفنت شمس الضحى عرش المقيل

إنت اللي للبقا كنتي السبب
نعمة من مالك الملك الجليل

يا (حصان الزور) خيّالك لعب
لو تشوفه عاسف بجماح خيل

ويا كنوز التمر كنزك ما نضب
لك مرد الضل جيل بعد جيل

جنتبين أرزاق من تين وعنب
من يقول الأمس بأفضاله بخيل

ما على البترول لو ولّى عتب
عندنا في كل وقت له بديل

والرطب لو يوزنونه بالذهب
راجح بقدره وفي حقه قليل

لولو جادت به الصحرا عجب!
له مذاق سايغ يشفي العليل

للبرد يشبه وبعضه للّهب
كل ما لذ وحلى جاله مثيل

من تراب أرضي ومن ماها شرب
ومن شفقها والهجاير والأصيل

التراب اللي لنا جاد ووهب
كبرياء وقايد حر نبيل

فارس شهم على العليا وثب
رد للصحراء كرمها والجميل

الجواد اللي له المجد انتسب
واقف مثل النخل للمستحيل

يكتب التاريخ عنه وما كتب
وتتعب رطاب القوافي بالرحيل

خطاوينا ..
لوين مسافره فينا ؟
لهذا الليل ..؟ ذاك النور....؟
او انه ما لها مينا ؟
خطاوينا ...
خطاوينا
سفر مكتوب يا دنيا
على صفحة امانينا .. بدون احساس
حتى لو قروها الناس
يظل الهم يتنقل بكف الياس
وكف(ن) ما لها بصمه
تكتبنا ... وتمحينا
خطاوينا ..
وعزه مالها هامه
بداله بالنظر قامه
وهي حفنة تراب وطين
يا كيف الوقت ينسانا ؟
ولا ننسى اسامينا
خطاوينا تعبنا ما وصلنا شي ..
لا لليل .. ولا حتى وصلنا ضي
ولكن ظلت الدنيا تمشينا
بكل دروب ..
بدون آخر مدى نمشي
لا من نلتقي بغروب
يلمحنا ...
ينادينا ...
ويمحينا ...
خــــطـــاويـــنـــا

وتتشبّثْ بقَايا ذكريات الحُبْ
وأول سالفة فيها بدينا
وآخر سالفة مرت عليك
قلت :أحبك موت
وأنت قلت :أموت فيك
ومن بدينا :
نَزْرَعه لـ الموت ويموت بـ يدينا
وكانت سالفتنا
حُبْ في نكهة مقابر .

. زرعت في صدر المعاناة معلوق
ونبضت نبض الشوق وسط المحاني .

. وأشرقت في ليله من أنفاسي شروق
ورسمت في وجهه بقايا الأماني .

. ووصلت دم بدم وعروق بعروق
وخليت كل مالان بالحب لاني .

. قبل أمس ضاق الشوق ياعالم الشوق
والنفس حارت بين مجني وجاني .

. للي رحل وأقفى وراه قلب محروق
وستصعبت كل الحروف بلساني .

. خنقتها وانا أعترف حيل مخنوق
مابين هجر وبين لعب الزماني .

. ناديت له ولاكن بيّ الصوت منطوق
ولوحت له ولاكن عيونه تراني .

. ياضيق صدري عقب ماغابت بروق
وجفت بوسط الصدر حلو المعاني .

. يانفس عزك فوق أياّت مخلوق
ولازعزعك في عالم الغير داني .

. الغيم لامن مر ثم أرتفع فوق
رزقي يجيني مايجي شخص ثاني .

. تبقا الرجل كنها على القاع طابوق
ويبقى الشموخ وباقي العمر فاني

خبرتوا حد(ن) يبكي على واحد(ن) يبكيه

وخبرتوا حد(ن) مسجون مايبغي إفراجه

أحبه ولا أبغضته على شيء(ن) يسويه
ولا زالت رقاب الرجا فيه منعاجه


عسى منزل(ن) ضمه حقوق الوسم تسقيه
وتضحك له الدنيا وهو يضحك حجاجه


فقد خاطري شيء(ن) من الضيقه مسليه
وغدت روحي من الناس والليل هجاجه


اورح لمكان(ن) خابره .. خابره يأتيه
أسوق القدم صوبه وهي مالها حاجه

يا كليب شب النار يا كليب شبـه
عليك شبه والحطب لـك يجابـي

حنا علينا جيب ماها وحبـه
وعليـك تقليـط الأباريق العذابـي

ادغث لها يا كليب من سمر جبـه
وشبه ليامنه غفـى كـل هابـي

حط الورق والماي ومن ثـم صبـه
تصبغ على الفنجال مثل الخضابي

الوالمه يا كليـب عجّـل بصبـه
والرزق عند اللي يجيب السحابي

ومن يوجعه رأسه ترى الشاي طبه
وليا تقهوا كيفة الرأس طابي


ماحرّف فيها ابد

ـاماحلا الـمسرى مع طرة النور
مـن قبل خيط الشمس يبدي شعاعه

عـفشك مـكمّل فـيه زلٍ وماطور
وبـيتٍ من (القاضي) جديدٍ شراعه

وعـدة الـمطبخ بـين قـزٍ وتنّور
وحـوايج واغـراض فـيها نفاعه

ورز(الـمهيدب) مع سكاكين وقدور
واحـرص على الطبّاخ كمّل متاعه

تـنزل بـروضٍ توّه اليوم ممطور
والـغيم عـقب الشمس تم انقشاعه

الـبر حـولك كـله ورود وزهور
وقـت الـربيع العشب زاد ارتفاعه

حـتى الرمل تشتم له ريحة عطور
والـقاع خـضرا كـن فيها زراعه

معك خروفٍ مايبي ضرب صاطور
اذا ذبـحـته عـلّقه مـن كـراعه

احـمس بـصيله والمعاليق عالفور
مـن طعمه الجوعان ياكل صباعه

(( سنابل شوق )) والطاري من هموم القصيد أحيان
على عشب السهر وأغلى ربيع العمر وأشواقه .

. يميل الوصف وعيون القصايد والمدى التحنان
و((صوت الصمت)) في نبض الجريح وهامة أعماقه .

. حبيبي لا تخالط جرحي المغمور بالأحزان
ترى بعض الدروب اللي جفاها الوصل....مشتاقه .

. تغيب اغلى تعابير الجروح وصمتها الخوان
وينبض للحزن صدر الزمان وناعس احداقه .

. يسيل البوح من واهج هجوسي واحتري هتان
ونزف العمر هو مركب عناي وموتي فراقه .

. يسافر مغترب ديره ويرجع مغترب خلان
مشاويره محطات السواد ولجة اوراقه .

. على ريق الضما ماتت طيوفي والعطش عنوان
عليه انساب ويميل البخت لا مال براقه .

. وهبت اللي ترك جرحي ملامح صوتي اللي بان
شريت من العتب حضن الكلام ولحظة عناقه .

. انا اللي يحتري صبره ويسري به مع الابدان
شعورن يحترق با ادفى الخفوق ويعلن احراقه .

. يصوت للدفاء والبرد بضلوعه رفيقن كان
مع همومه تراتيل الجفاف وجرح خفاقه .

. تمحور به من المظلم كساد الامنيات وحان
من الغيره سجع قلبه ونادى وانحنى ساقه .

. على صمته كسح كل العباير نبضه العطشان
وعاتب با الرماد اخر ثواب الجرح با اخلاقه .

. يسمي رحلته مركب قصايد واللقاء بستان
محل في نظرته درب السحاب وعانق اذواقه .

. مع انه لو لقى با اخر فتافيت الشقا اوطان
يجود ويرتمي دلوه من اجل قلوب عشاقه .

. سلب عذره سلب عمره سلب مايشتهي انسان
سلب حتى مسافات الحنين وخالف سياقه .

. تمهل في مسافاته ولو قلب العنا مالان
عسى يصبح على شمس الوصال وشمعة إشراقه .

. حبيبي قلت ماعندي وسلمت القصيد اوزان
ولابه في رضاك الا شموخ الياس واسواقه .

. عساك ان شفت في جرح الضماير تكرم الزعلان
وترسم له بدورات الامل تاريخ لا اشواقه .

ما سألت الشمس عن وقت الغروب
دامها وان جاملتني غايبه

الوصل لو نبتعد وصل القلوب
ما نسيتك لو ظنوني خايبه

دمعةٍ في خافقي عيّت تذوب
من عذاب البعد عاشت هايبه

الوداع يبكّي أحجار الدروب
ما يلام اللي بكا حبايبه

والليالي وعدها الصادق كذوب
ذوبت فالصبر روحٍ ذايبه

من عشق من قلب والله ما يتوب
كل عاشق .. عاشقٍ مصايبه

في عيوني يسكن الحلم الطروب
والأماني نجمتينٍ شايبه




وأخيرا ً اختتم عدستي بهذه الأبيات المهداة لي مع هذه الإلتقاطه المعبره

شامخة للجرح ..!!
ياجرحي تعآل
والشموخ ان كان لأنثى تجهله
شامخة للجرح ..!!
وافهم ما يقال
ولو تزيد الجرح ببقى مذهله
شامخة للجرح..!!
تهزمني محال
صار لي من كثر جياتك صله
جيتني بطعنه واقول ارحب تعال
وتزيد في طعنك ولاهي معضله
ايه انا حبيت لو حبي محال
وافي بحبي لو انه مشكله
شامخة للجرح..!!
وطال الوقت طال
وللشموخ انثى ومثلك يجهله ..!

[ALDAWSARI]

صباح الخير

موضوع جميل جداً

وصور جميله , شكراً لك

[لهفة الخاطر]

ماشاء الله عليك

الصور والكلمات

في منتهى الروعه

[واثق الخطوه]

احينا الصمت أبلغ من الكلمات ,,


لذا لن أعلق ,,

[" ميلآد الهدى "]

ماشاء الله عليك شموخه
تصوير وتنسق وترتيب ولا اروع
تسلم الأيادي
وبإنتظار جديدك أكيد