إذا المراجل لبسة شماغ وعقـال........
قـل للعـذارى يلبسـنّ العمايـم
ما عاد يفرق زول حرمه ورجال........
دام الفعايل تشبه البعـض دايـم
المرجله ما هيب كلمه وتنقال........
وتروح ما راحـت هبـوب النسايـم
وإلا خشونة صوت أو رفع الأثقال........
أو رزة صـدور وفعـل الزلايـم
ولا هي بعد مفتاح موتر وجوال.......
وإلا ردى لسانـن حديثـه شتايـم
المرجله شيمه عن القيل والقال........
. رفيع نفس (ن ) حـر بالجـو حايـم
المرجله عقلٍ وزن وزنه جبال.......
ودون العقل وش فرقنـا والبهايـم
يا مسندي لو مايل الوقت بي مال.........
يا ولد أبويه يـا عظيـم العزايـم
يا معرب الجدين من العم والخال.........
يا نخوة المفزوع وقت الهزايـم
المرجله يا خوي هي طولة البال.........
هي العزم هـي الصبـر فالظلايـم
فيها الكرم عزه دله وفنجال.........
فيها الكرامه عن ردى الطبع شايـم
والدين لامنه خذا القلب منزال.......
مشى طريق الحـق وابليـس نايـم
ومن لا عرف ربه في طيب الحال........
لابد وقت الضيـق بالهـم هايـم
حتى صلاتك مع جماعات ورجال..........
في خيرها يا خـوي نعـم الغنايـم
ولامن نصف ليلك قم صفي البال........
يا عظم أجرك بين ساجـد وقايـم
ولا من رفع ربي له كل الأعمال........
حسن الذكر لا قالو فـلان صايـم
وخلك شريف القصد يا طيب الفال........
سوء المقاصد فالبيوت الهدايم
واحذر تبيع النفس في دب الأنذال.......
وتتبع خوي إبليس راع النمايم
النفس خيل لك إذا كنت خيّال........
ومن لا قوى نفسه قوتـه الهزايـم
ولا صرت ما تدري لويش أنت رجال.......
والله خسارة فيك ذبح التمايم
مواقع النشر (المفضلة)