السلام عليكم ورحمة الله وبركاته ..
--المشهد الأول --
المكان : فصل من فصول مدرسة اولاد .
محمد: خالد عطني قلمك بكتب فيه ماجبت معي اقلام اليوم ,,
خالد : بس ماعندي غير قلم واحد واحتاجه الحين
محمد: بتعطيني ولا شلوووون
خالد: يبو الشباب والله ابيه احتاجه ..
محمد: طيب ترا ان ماعطيتني بعلم عن ذاك وذاك
خالد: لاااا تكفى خلاص خذه بس يرحم والديك لاتعلم
شوشره بالفصل .. كل واحد يألف قصه .. مايدرون بالضبط وش خلا خالد يخاف بهالشكل
الفصل يسأل خالد وش ذاك وذاك ..وجهه ينقلب .. رد عليهم ولا شي .. ومحمد يضحك بثقه
تكررت السالفه اكثر من مره .. صارت ابتزاز وكل ماحاول خالد يعترض خاف من طاري ذاك وذاك
يوم من الايام .. خالد قافله معه من الصباح .. ومحمد بدا يتميلح ..
محمد : خالد ابيك تحللي واجب الرياضيات مالي خلقه ..
خالد : معصي والله شغالة ابوك شايفني ؟
محمد: تبي اعلم ؟
خالد: بالطقاق يطقك انت وذاك وذاك <-- كانت قافله من جد
محمد: طيب .. ياشباااااااااب .. اقولكم شي ... الشباب متحمسين كالعاده يبون يعرفون وش ذاك وذاك ... محمد يكمل كلامه : شفتوا خالد هذا .. ترا اسم امه ساره
-- صدمه بالفصل --
ناس تضحك .. وناس تذب .. وخالد وده الارض تبلعه .. خلاص عرفوا اسم امي يقولها وهو ضايق صدره
واحد من عرابجة الفصل : اجل اسم امك ساره خخخخخخخخخخخخخخ
صوت واحد يطلع من مجموعه بالزاويه : وش الاخبار يا ولد ساره ..
خالد تحطم .. كره مدرسته ويبي يتركها ويفتك من الذب الي يجيه
--المشهد الثاني --
المكان: استراحه
جمعه شباب .. سواليف .. بلوت .. فجأه تلفون واحد يرن .. يناظر جواله يبي يعرف مين الي يدق ويعرف انها اخته الي بتسافر بكره .. ييرفع السماعه بعد مايقصر على صوت المتحدث ..
هو : هلا ..
هي : اهليين ,, وش اخبارك
هو : الحمدلله بخير ,, (انتي) وش اخبارك ؟
الشباب سمعوا (انتي) التفتوا عليه .. مين قاعد يكلم .. يسألون بعض.. الرجال ارتبك كأنه يسوي شي غلط ..
هي: اقول .. نوره وريم بناتي يبون يكلمونك يقولون بنسلم على خالي قبل مانسافر ..
هو وهو وده ينهي المكالمه باسرع وقت : طيب بس بسرعه ..
هي: طيب مين تبي تكلم أول نوره ولا ريم ؟
هو ابتلش .. كيف يقول نوره ولا ريم والشباب كلهم جنبه
هو: اي وحده مو مهم <-- يبي يطلع منها
هي: لا لازم تختار <--
هو: اقول انا مشغول الحين بنتعشى بكلمك بعدين يالله مع السلامه
هي متحطمه: طيب ..
الشباب: من كنت تكلم !!
هو: كنت اكلم (اخوي) !!!!!!
------ لحظه------
من متى كان اسم البنت عيب ؟
واحد يقول الاسم يمكن يسبب فتنه !! .. لكن الواقع ان هذا الشي ماله اي علاقه بالفتن ولا بالدين .. مجرد عادات متخلفه في (بعض ) الناس .. الرسول صلى الله عليه وسلم .. فيه احد احرص على الدين منه ؟ ..طبعا لا .. كل الصحابه يعرفون اسماء زجاته وبناته .. والامثله كثيره !!
ليش (بعض) الناس ترتبك اذا جا طاري الجنس الاخر ؟ وش العيب اذا احد عرف اسم امك ولا وحده من خواتك ؟ يعني ماتفتخر بأمك وخواتك ؟ متفشل منهم ؟ ليش تفكير (البعض) سطحي جدا لدرجه انه يعتبر اي شي فيه طاري البنات يمس بشرفه ! شخص قالك يا ولد فلانه .. ليش تعتبر سبه ؟ انت بالاصل موب ولد فلانه ؟
ليش (بعض) الناس لما تدق عليه وحده من خواته ولا امه او حتى زوجته يستحي يرد وهو مع اخوياه ؟ مع ان نفس الشخص يرد ويتفاخر لو دقت عليه (خويته) !!
ليش بعض الناس تخاف يشوفها احد من اخوياها وهي مع اهلها بسوق او حديقه ؟ طيب والعالم كلها الي بسوق وش فرقها عن خويك ؟ للأسف بالرغم من اننا وصلنا مرحله كبيره بالتكنلوجيا والتطور الا اننا مازلنا نملك افكار جاهليه عبيطه مالها أي أساس
مثل ماقال الشاعر :
يا أمة ضحكت من جهلها الأمم <-- مايدري منهو الشاعر
تشاو :mmmQ:
مواقع النشر (المفضلة)