[align=center]
الهوى جند العاشـق وجالـه جنـود
دار ناس ٍ عجز غيـره ولا دارهـا
شف معاك الغلا قاد المعاليـق قـود
وانت تعرف طوال الهرج وقصارهـا
صادق الوعد عيا في ضميرك يجـود
والحشى من فعولـك والـع ٍ نارهـا
ياتسافـر وتبعـد ياتحـن وتـعـود
ساعة القلب عنـدي دقـت انذارهـا
ياطريق المواصل ياطريق الصـدود
اقصر النكبه اللـي طـال مشوارهـا
الهوى له حساب وله شروط وبنـود
لاتحسب الصغـار وتتـرك اكبارهـا
كم دمحنا وشلنا ميـر مامنـك فـود
تنكر العشره اللـي بحـت بخبارهـا
يوم تنقص بحبك يوم حبـك يـزود
والدلايـل كثيـره عنـدك اسرارهـا
يشهد الله عليك وكل خلقـه شهـود
تهدم البنيه اللـي ثابـت احجارهـا
احترقلك غـرام وتحترقلـي جحـود
بانت اللوحه اللـي بـان مسمارهـا
مايمشي فؤادك غير ضـخ الوقـود
بالمصالح حياتك تضـوي اقمارهـا
كان شوقي لعينك شي مالـه حـدود
ولك بقلبي قصور ٍ عالـي اعمارهـا
كنت احبك واظمك عن عيون الحسود
وان لمحتك يميني تسبـق ايسارهـا
لكن اليوم عنـدي مابقالـك عهـود
طاحت العشره اللي طـاح مقدارهـا
[/align]
مواقع النشر (المفضلة)