السلام عليكم اما بعدين000
هذي سالفه صارت معي وصار مثلها واجد لكن اخترت ذا السالفه قلت خل بهبقها( بسدحها) عليكم
طلعت انا وواحد من الشباب الصالحين (من شاف وجهك مارجى صلاح مير كمل) طبعاً توني منمغط بأوفر تايم اجباري غصب من ورى خشمي المدير يحدحدني من سنتين على هالاوفر تايم وانا مغير اتعذر مره عندي عزا ومره بحضر عرس ومره اقول امي تسلم عليك وتقول لاتعطون وليدي اوفر تايم (صح عليك يا العذر القوي)
المهم انه حصل وتوني طالع دايخ مادريت الا هالادمي مسنتر عند موتري قلت وينك يا وجه الدينصور معاد لك شوفه؟ قال مشينا نتهجول(يعني نتمشى) قلت تم بس ابي امارس وجه العشاء قبل ثم سو الي تبي قال وش تمارس؟ قلت هذي كلمه يحلفون ان سيبويه حاك(ن) وجهه في جدران الكوفه ولا وقف الا يوم محط راسه بمكيف صحراوي ثم طلعت معه هالكلمه ..قال طيب وش تبي تاكل؟ قلت الي هو المهم غذاء اوادم مهوب تروح تجيبلي سندوتش علف ولا همبرقر شعير تحسب اني مثلك! ترى انت تتناول اشياء غريبة.
قال أي غريبه وش تقول انت؟ قلت المهم لايكثر مشيوف في الاستراحه قاعد تاكل من علف الغنم لاتصرف الله يجزاك خير ودنا مطعم ولا تطولها.
الحاصل وقفنا عند مطعم ودق له الرجال بوري يبي العامل يجي طبعاً ما اخفيكم ان البوري حقه شاريه من محلات قطع غيار السفن يعني يمكن يغرمونا راعين المطعم قيمه قزاز واجهة المحل .
جا العامل من عندي وقال شو بدك حبيب ألبي . وانا الي التفت اطالع فيه واسفهه يوم قعدت شوي قال شو بتأمر يا استاززز وارجع اطالع فيه قلت تحاكيني انت؟ قال أي ! تخبرون عاد انا منلخم ماعمر احد قالي حبيب قلبي !!
والله وانا الي اشك بنفسي واعدل جلستي واقوله وخر عني شوي وراك قمت تلصق فيني؟
وطالع في وجهه ولا البياض والعيون الخضر (الله يخلف علي) قلت عفواً الاخ مهجن مع فنايل المنتخب ولا وش ظروفك ؟ قال شو! قلت لا بس بغيت واحد همبرقر واثنين شاورما وكثر ببسي الله لايهينك!
قال اكثر ببسي يعني كم حبه ؟ قلت حبه وحده بس (احس بغى يصفقني يوم قلتها).
المهم مارست وجبه العشا وقام الرجال يسولف ويدخلني بمواضيع وطلعني من مواضيع وانا مخي من يوم طلعت من العمل وهو مكتوب عليه مغلق لتفريغ الوقود (محطه الله يجزاك خير مهوب مخ) والله وانا الي اخطم عليه خطمه واحد(ن) مهوب متابع ابداً ابداً قلت الا تدل استراحتنا؟ والله وهو الي ينلخم لوهله ثم قال ايه ادل .
قلت زين دز لها خل نتكي فيها ونروق ازين من هالفرفره الي ماحلاها ربي ناهيك عن سواقتك صاير كني راكب في اخر مرتبه باص والكفر الي ورى منفقع (وضع مأساوي جداً) قال لو سواقتي به شي ماعطوني رخصه يا الشيخ قلت اعقل بس انت شافو وجهك تقول وجه ضفدع فيه امساك رحموك وعطوك رخصه ولا لو يدرون هذي سواقتك كان سحبو رخص عايلتكم كلها عقاباً لك مير رح للاستراحه الله يثيبك.
والله وفيما حنا متجهين للاستراحه(متعوب على الجملة) مرينا عند منتزه من منتزهات الثمامه قال خل نجرب ندخل قلت رح لاتخليها بخاطرك (طبعاً انا مقدر ان الولد طفشان جداً ) يوم وصلنا عند باب المنتزه ويفتح خويي الدريشه يبي يكلم السكيورتي وانا منزل راسي العب بالاشرطه اثر السكيورتي قاله عايلات فقط ويلتف علي خويي يقول شفت وش يقول واطالع في خويي قلت من الي يقول؟ قال السكيورتي! قلت طيب ناده ونتفاهم قال هذا هو واقف!
والله وانا الي اسمي واتعوذ من بليس قلت وش ذا البدله الي تمشي لحالها؟ اللهم جلسهم في المكان الي هم يقعدون فيه دايم (يعني اللهم سكنهم مساكنهم بس مع الروعه اختبصت) قال اعقل لاتورطنا. اثره السكيورتي بس في الظلام اختفت ملامحه. قلت الله يخلف ليت راعي المطعم معطيه شوي. المهم انت يا الاخ وراه ماندخل اهلنا داخل ونبي نجيبهم!
قال كم رقم جلسه اهلكم؟ قلت والله انا امي ماتعرف تجلس الا وهي ماده رجليها يعني تقدر تقول كنها رقم ثنين وابوي ينسدح يعني خل نقول رقم واحد يصير رقمهم 21 . قال تستهبل انت قلت لا والله قاعد اجاوب (ترى انا جايب طبلوني بس تخبرون توني طالع من الدوام) قال كم رقم الغرفه الي هم فيها؟ قلت عاد هذي مدري الظاهر انهم يتمشون مهوب في غرفه (اسمع بالتصريف) قال دقيقه انادي خويي يشوف لكم طريقه والله ويروح يناديه يوم جا خويه ولا عليه خشم مشالله تبارك الله من الاذن الي الاذن.
قلت عفواً اخوي هذا خشم ولا لثام قال كيف؟ قلت اقول كيف الحال انشالله تمام؟
قال ايه بخير. قلت طبعاً ولا تحسب ان عندي تعقيب على خشم حضرتكم او لاسمح الله اني قلت ان برطمك كنه برطم بعير مضيع امه في ملاهي وفيه البكوه ..ابداً ماحصل أي شي من هذا! قال انتو وش بغيتو؟ قلت لا هونا معاد نبي شي الله يجزاك خير حنا مضيعين وشفنا وجهك ودلينا المكان. قال كيف يعني؟ قلت ليه الخريطه الي بوجهك مهيب معتمده من البلديه؟ قال أي خريطه؟ قت اوه معليش احسب انها خريطه طلعت لحيتك لاعبت بها الحبوب معلش لاتواخذنا تخبرون ماتوضحون في الظلام انتم (يقالك برقعها)
والله وهو الي يعصب والمناخر قامت تطلع دخان تقول شكمان تريله ديزل وانا الي انغز خويي قلت اقول دز يا السنايدي قبل لانروح فيها ترى ذا الخاتم الي في يده مهوب عبث لو بحلف ان فيه ثمانه جن متكين حلفت. قال خويي والله انك صادق! قلت ايه افا عليك خاتمه مكتوب عليه من تحت شقق مفروشه للجن وهو بغى يطوره ويخليه فندق بس مابعد صرحوله ..امش انت وانا اقولك السالفه بعدين.
الحاصل طلعنا من هناك (ليه انتم دخلتو اصلا؟) ومرينا بقاله نجيب لنا غريضات قبل لانتمركز بالاستراحه لان لو قعدنا مافيه امل نجيب شي (انواع التعيجز) المهم تقضينا وجينا نحاسب ولا فيه بالكاشير اثنين نط واحد منهم تقول مقروص يقالك بيحاسبنا وانا اشوفه متحمس قلت خله مانيب مفشله ولا انا بالعاده اكرش المتحمسين واثاريه راسب بالرياضيات وطلع حسابنا خمسين وهو لو يطير ويوقع ماتعدى ثلاثين ريال قلت الله ابوك يا الزيدي قال الثاني تكلمني قلت لا اكلم هالي مافي حارتهم حلاق قال خويي وش دخل الحلاق قلت ماتشوف شعره؟ ناقص يحطون على رقبته سيفين وطلع شعار السعودية . هيه انت يا ابو يمن تستهبل وش عنده فتى الحلبه بيلعب علي؟
قال خويه معليش هو جديد ولا يعرف بالحسابات قلت مشكلتك مهيب مشكلتي يالله هات اثنين ببسي زياده ولا بشتكيكم (ابيها من الله) قال طيب بس فكنا من وجهك . يوم شفته موافق قلت وهات كيسه رز وثلاثه كيلو طماط وعلبه ملح وبسرعه قبل لا اغير رايي ترى يدي تحكني ودي ابلغ عنكم (بلاهم مادرو ان جوالي استقبال اصلاً) قال طيب . والله ونطلع من عندهم وفيني حره كان بأخذ اكثر
(الله لايوليني على مسلمين)خخخخخخخخخ
الحاصل رحنا للاستراحه وتكينا فيها وتو جونا بدا يصير تمام مادرينا الا واحد من الشباب داخل علينا قال ابشركم نجحت وعطوني مكافئه . وانا الي انلخم قلت مكافحه أي مكافحه وش حنا مسوين قال لا يا رجال شهاده شهــــــــــاده قلت افا؟ من الي شاهد(ن) علينا انا ما اعرفكم يالله كل واحد ينحاش من جهه(جحدهم) لاننمسك مره وحده وان قالو وراكم طالعين بالليل قولو رايحين نجيب علاج امي من الصيدليه ( اسمع بالعذر الموحده) قال هيه انت يا مخروش انا نجحت وعطوني دراهم!! روق. وانا الي انظر اليه نظره العطشان لكاس المويه (ترى هذي نظره متوحشه) قلت قم اطلع برى الله ياخذ عمرك خرشتنا وفككت جونا على الفاضي قم اقلب وجهك الي كنه حبت كومثرا عملاقه مع هالخشمك الي تقول واحد بوضعيه السجود لكن مهوب الا من لحيتك هالي كنها شرابين صوف ملصقين بوجهك قم حسبي الله عليك.
والله وانا الي يخرب جوي وواجهت صعوبه اني ارجع لمستوى الروقان الي كنت فيه والله واشيل عفشي واصفق خويي من القهر (تحسون انه مظلوم خويي بالسالفه) واروح بيتنا انخمد ابركلي من هالطلعات الفاشله
وفي النهايه انشالله اني ما طولت عليكم ( احس الاعضاء يبون يدعون علي اذا طلعت الفاتوره ) خخخخخخخخخخخ
مايستفاد من الموضوع
1-ان اي واحد يداوم دوامين رسمي ودوام قطاع خاص واذا اضفنا لها اوفر تايم اعرفو ان النفسيته بتصير غلط يعني انتهو لا تحرضشوون مع النمونه هذي على شان يبي يطلع حرررت ابوو الشغل على علباتك
2-لاتخلي واحد متحمس يحاسبلك
3-لاتخلي باب الاستراحه مفتوح يمكن احد يجيك على حين غتره ويفكك جوك (لاتفوتكم على حين غتره) خخخخخخخخخ
واخر شي تكفوون لاتفشلووني ولا كأني كتبت المووضوع
وتيتي تيتي مثل مارحتي جيتي
مواقع النشر (المفضلة)