يكفي حبيبي سكة الموت يكفي ....
( والخافي أعظم )
يكفي حبيبي سكة الموت يكفي
فرقاك دربٍ آخره ساحة العود *
الخوف اودّع موق عينك ويخفي
قصة غرام وبصمة انسان مفقود
يقضى شبابي والزمن هدّ نصفي
وتوّي على عثرات الايام موجود
بالله وش أذنبت وآعيش منفي
غير ان عيني واجهت جندك السود
ضقت الهموم وطيّح الحمل كتفي
وان جيت اجي لك يطلق الجرح بارود
.
.
.
ياأمّ فيصل شتّت الوجد حرفي
وارجي صدى الونّات ياصل لمقصود
ياأم فيصل حرّق الدمع طرفي
بيني وبينه باب بالشمع موصود
والمشكل اني كلّما فقت أغفي
تشهد عليّ الخلق مانيب في المود
طال الشقا وآنا احتري الجو يصفي
واقف على رزنامة الوقت منضود
كلّي طفيت وعيّت الروح تطفي
إي والذي سوّاك والوضع مشهود
ليلياً اسهر خدّي فـْ بطن كفي
وآنام في وادي من الدمع مهدود
والنطق يغدر لكن القلب يوفي
والعين تبصر لكن البخت محدود
.
.
.
منهو يطمّن خاطري منهو يشفي
منهو يلمّ الشمل والجمر موقود
يا قوّة الله ليته الأمس يلفي
لو ربْع ساعه أشرب اكسير ويعود
أيام كان الحب للنفس يضفي
ريح الطبيعه بين الازهار ووْرود
ساعة تولّع تحت الاضلاع شغفي
ما كان يدري صادق الحب منقود
.
.
.
ياأم فيصل كيف الاحباب تقفي
وضح الاماني تنقلب مدهمه سود
ياأم فيصل ماهو من نقص عرفي
مير البلا المقرود وان طال مقرود
ياأم فيصل لاهب الشوق ضعفي
وين المواعد والمواثيق وعهود
ويلاه لامنّي تذكّرت ترفي
شقّيت صدري بالتناهيد ولهود
عفت الاكل والشرب وبْرغم أنفي
حتى غدا كلّي على بعض كالعود
.
.
.
لو يتركوني ليما يغشانِ حتفي
أو يسكتون وأمر مولاي منفود
لو راد ربي حطّ لي قلب صلفي
خالي من الإحساس والطيب جلمود
لو راد خلا قسوتي فوق عطفي
لو راد خلاني فهد آل لسْعود
لاشك هو أدرى بحوجي وظرفي
راضي بحكمه بالجفا واقبل نعود
.
.
.
لولا ولولا لألأ الكون عزفي
شكّلت من قاف الشعر ماس بعقود
واتعبت انا الأحباب بالمشي خلفي
واطعمتهم ابياتِ عنقود عنقود
ياأم فيصل والشعر بعض نزفي
والخافي أعظم في الفؤادين موجود
ياأم فيصل يعْجِز الحال وصفي
ياصعبها .. حتى على الموت محسود !!
،،،،
والتحية للجميع
عبدالعزيز بن سعد
رد مع اقتباس
مواقع النشر (المفضلة)