يـخـرب بـيـتـك يا إيـاد مـدنـي شـوي شـوي علـيـنـا !! تلفـزيـونـكـم إنهـبـل
صبحهم بالنور والسرور .. الله حيهم كل واحدن باسمه .. واللي ماعنده اسم الله يحييه باسم أخوه (( بدت المصاله )) !:28ar:
والله يا جماعة الخير ان هالموضوع بالذات ماتوقعت أطرحه في الصرقعة .. لأنه وبكل صراحه جنس ثالث ! لعنبو بليسه لا هوب ذكر ولا إنثى :8ar: .. يعني ما أحس انه خاص بالصرقعة ولا ينفع يكون بالعام .. لكن الشكوى لله بعد مداولات مع نفسي قلت أمحط به.. والمشرفين يتصرفون وينقلونه مكانه الصحيح .. والظاهر ان الوعد ياموضوعي الحذف إن قاله الله :8ar:
يا إخوان يا أخوات هالموضوع جاء على حين غرة .. يعني ماكان في راسي نية للكتابة وإزعاجكم بمصالاتي المتكررة لكن الشكوى لله .. حظكم مقرود قسم بالله لأن فيه حدث مدوي رأيته بأم عيني هو اللي أدعاني أقتحم المنتدى عشان اكتب لكم عنه ..:12ar:
يا جماعة الخير يالمسلمين يا النشامى يا الحاضرين (( أقول أخلص علينا بس )) .. تلفزيوننا العزيز من تالي ماهو صاحي أبد .. قسم بالله فيه بلاوي قاعده تصير من تالي بس مااحد طق لها خبر مدري ليه ..:54ar:
أذكر في السابق .. كانت الاعلانات التجارية يجيبون حريم متسترات محتشمات حول ما يلبسن دسوس .. ويقعدن يسولفن ويتميصلن ثم تقول وحده لخويتها : ماجربتي المنتج الفلاني ؟ تقول خويتها : لا واللهي ماجربتهوش .. تقوم خويتها تعطيها المنتج اللي يتكلم عنه الاعلان ثم بعدين تجي تشكرها وتقول فعلاً منتج مهوب صاحي فادني كثير :8ar: وينتهي الاعلان ويا دار مادخلك شر ..
الحين لا .. الحين الوضع اختلف .. إياد مدني اكبر من هالاعلانات السطحيه :57ar:
إذا ما طقت الحرمه الجنز .. وفلت الشعر .. وقامت تتدلع وتمشي باالكريم أو الشامبو وتهز عمرها .. مايعتبر هذا إعلان عند أبو مدني هو وعيونه اللي كنها خطين .. يعني كذا ( - ا - ) << يلعن أم الذبة اللي يبي لها شرح وتفسير
أقول أخلص علينا واختصر بارك الله فيك :8ar:
أنا أذكر أن تلفزيوننا في السابق ينقلون مباراة أوروبية أو كأس عالم .. يقوم المخرج ياخذ فرة على الجمهور الحاضر للمباراة أو يتابع الأمواج اللي يسويها الجمهور.. ومن أول ظهور لمرأة متبرجه تنحاس الشاشه فوق حدر و النقل يتوقف ويحطون صورة ثابته على برج التلفزيون على بالهم منظر .. ثم تسمع محمد خيري يقول بصوت كنه صاحي نوم : عذراً للخلل الفني وسنعود لمواصلة البث بعد قليل <<< شكلهم راحوا يطقون المخرج الأوروبي :8ar:
لااااااااا الحين الوضع اختلف عند إياد باشا .. :-
من كان يصدق يا جماعة الخير أننا راح نشوف في يوم من الايام نور الشريف او أحمد زكي في أحد أفلامهم السينمائية على شاشة قناتنا الأولى ؟
نوووور ! :4ar:
نور الشريف يا أبو مدني ؟
نور الشريف اللي ماخلا حرمه في أفلامه الا وغمرها بحنانه تقوم ترزه في قناتنا يامدني ؟ أنهبلت يا ابو الشباب
أجحدوا اللي فوق كله .. وكلموني عن مشهد اليوم .. يا هو مشهد .. هبال يا مدني قسم بالله هبال :
جالس أنا والوالد في جو مفعم بالروحانية الأسرية .. في جو تملأه السكينة والوقار والحنان الأبوي .. وقاعدين نتفرج على قناتنا :-
"يبه أصب لك شاهي ؟:28ar: .. لا وانا ابوك توني متقهوي عند واحد .. لا يبه خلني أصب لك بياله على شاني ..بس ياولدي مالي فيه الحين والله .. ! وش اللي مالك فيه لا والله ان تشرب من يدي تراها بياله.. لعنتن تلعنك وانا أبوك وراك حقنه أقول لك ماأبي شي !"
<----- طاح وجهه :8ar:
المهم ..شوي إلا وجابوا فلم أمريكي .. طبعاً أنا ما تدخلت ولا غيرت القناة من باب تجديد الثقه في إياد مدني وانه ماراح يخذلني قدام الوالد بمشاهد ساخنه ..
بدأ الفلم .. البطلة ممثلة شقراء كل الزين فيها . . مرة بنطلون مرة برمودا مرة تنورة قصيرة وانا مازلت صامد ولا أفكر أغير القناة .. يخرب بيتك يا مدني على بيت اللي يثق فيك شوفوا اللي حصل :
البطلة دخلت الحمام أكرمكم الله .. أنا اللي في راسي أن المشهد راح ينقطع .. لكن للأسف أستمر المشهد والكاميرا لحقت الحرمة وسط الحمام وأبو الشباب مدني لحقهم بعد ولا قطع الصورة :57ar:
موقفي الأن ضعيف لو غيرت القناة راح يشك الوالد إني ألعب عليه وان هالقناة مهيب مظبوطة وعلى باله قافطني .. خليت الأمور وانا أرجي خير واقول ماراح يطول المشهد أكثر ..
البطلة مصختها يا جماعة الخير .. قامت وترست البانيو مويه ورغوة صابون .. ومازال إبااد مدني وتلفزيونه العزيز حاضرين وحالفين الا يورونا البطلة وهي تتروش
دخل عليها في الحمام رجل .. قامت تضحك هي وياه والكاميرا ثابته على رقبة البطلة وطبعاً اللي تحت الرقبة من غير هدوم وما طلعه المخرج بس الرجال اللي قاعد يكلمها أكيد يشوف !!:9ar:
جاء الرجال وعطاها سماعة التلفون وهي في البيانو .. قصدي البانيو ! لعنبو دارك يا مدني انت وأفلامك خليتني أخربط في الحتسي المهم أنتهى المشهد الحميم في قناتنا الأولى !gif55
هنا الوالد ألتفت علي وقد فقد أعصابه وقال :وش هالخنبقة الله يجزر عمر الظالم مانيب قايل عمرك .. واستطرد قائلاً : يالخسيس ياالهيس الأربد والله اني داري ان الدش اللي مركبه انت واخوانك يجيب قنوات فرنسا وتكذبون علي تقولون بس يجيب مباريات ! ..قلت: يبه الله يجزاك خير والله انك تسمع بفرنسا.. وش جاب فرنسا وقنواتها والله ان هذا تلفزيون دولتك انا وش دخل أهلي في الموضوع .. قال يا التسذوب أبو متعب لو درى ان التلفزيون فيه هالمراجة ماقعده دقيقه بس أنت تسذوبن طقووع وسمرمدي طالع على خالك سعود ! gif22
تدخلت كتيبة المشاة اللي هي أميمتي :29ar: وقالت وش دخل خاله سعود هااه ؟! خاله سعود عيذه بالله مايدوس العيب.. ماجذبه والله الا انت واخوانك ,, الوالد طقته أم الركب وقام يبولع ريقه .. المهم يوم شفتها قبست بين الوالد والوالده وانا اللي أحط رجلي وأطلع غرفتي وأجلس اكتب لكم هالموضوع ..
يا عيال منتداي .. والله اني مانيب أدّعي الخير أو أقول اني ما أناظر أفلام .. لكن قسم بالله قوية ان تلفزيون المملكة العربية السعودية اللي ينقل الصلوات الخمس والتراويح والقيام يصير فيه هالتطور السخيف !
الله يذكر الفارسي بالخير .. كان رجالن أجودي ومنظبط وماله في هالأمور .. أذكر أنه قد جاب فيلم كنت قد شفته على الفيديو وكان فيلم مليء بالمشاهد الساخنه .. لكن الفارسي أذكر أنه قصقص الفلم وقطع فيه تقطيعن مهوب صاحي وأختصره من ساعه ونصف إلى 23 دقيقه بس .. :38ar:
صح ان القصة أندمرت والبطلة ماشفناها أبد والمشاهد تخش في بعض وصار الفلم غير مترابط وغير مفهوم لكن يحسب للفارسي انه جاب فلم حلو وجديد ولم يخدش الذوق العام الله يذكرك بالخير ياابو فارسي.im8
أرجع للحبيب اللي بايع أمها بريال إياد مدني:40ar:
أشوفه مكثف البرامج الحوارية النسائيه .. وساحب على محمد خيري والسليمان وعوني كنانه والشباب .. مدري هو بزعمه الحين انه يناصر حقوق المرأة ؟ أو على باله شوفونا ياعالم ترانا تحررنا والمرأة السعودية تقدمت وصارت تطلع كاشفه ! مدري هو عنده خبر أن نصفهن فلسطينيات والنصف الآخر من مصر أو مايدري أبو الشباب..
واحد يقول لي قسم بالله يابو سارة ان في القناة الأولى من فترة جايبين نادية الجندي في فيلم وطالعه بقميص نوم يظهر أكثر مما يخفي ! هههههههههههههههه لعنبو بليسك يا إياد صاقع في باب الوزارة قبل تدخلها ؟ من جد أنواع اللحسة وقاااااضي هالوزير:54ar:
رسالة لأبو مدني :
ترانا نفهم وفينا مثقفين .. صح ان أغلبنا ألله بالخير لكن ترى يجي منّا .. مدري من لاعب عليك وقال ان مشاهدينكم دلوخ !! عمر التطوير ماكان بالتعري والتحرر وجيبوا فلانه خلوها تقدم وأفلام مدري وش تبي وتجميع هالساقطين والساقطات ..
<----------طالعوا من يتكلم
أفلام وما أفلام هذي عادية في أي قنوات ثانيه .. لكن قناتنا قوية.. ترانا شعب له خصوصيته أو ماتدري ؟
البرامج الثقافيه في تلفزيونك دمار وقديمه شفناها مليون مرة من يوم اننا صغار.. وينك عنها وعن تطويرها؟ ..
في الرياضه تلفزيونك دمار ومافيه بطولة كبرى نلقتوها لنا ومنتخبنا ماشفناه من سنة ونصف ولا أدري وش قاعد تسوي؟ ! في تلفزيونك أنواع الركاكة في الإخراج والتصوير ولا انت داري ! في تلفزيونك يعك المقدم ويلت ويعجن مليون مرة ولا عنده ثقه في نفسه مثل غيره من المقدمين في القنوات الاخرى..
أعتقد أن كل ماتقدم تطويره أهم وأبدى من مشهد البانيو وأخواته ولاّ وش انت شايف يا مقلع
<--- يارجال ماجاب خبرك تراه أمس جامعن نبيلة عبيد والفيشاوي ومحمودعبدالعزيز في فيلم واحد ومعطيك بالخامس :4ar:
رساله للمسؤؤلين
<-------أقول لاتتحمس واجد:8ar:
والله إن كان الوضع جايز لكم .. فالله يخلف .. وان كان الوضع مايرضيكم فشوفوا لكم صرفة في هالوزير .. أقروا عليه ..عالجوه.. ودوه لشيخ يتسويه.. أي شيء .. تراه ماهو جايب لكم خبر؟؟ ولا تتفاجئون بكرة ان شفتوا في قناتنا راشد الماجد يغني مشكلني هو ودرزن الفرافير اللي معه
ختاماً .. آسف للإطالة وأدري أن بعض التقدميين ماراح يجوز لهم رأيي وطرحي فلا أقول لهم سوى : (والله هذي الساعه المباركة انت وياه )
<------ حقير
المووضووع للنقاش وتجاذب الآراء وشد الشوش.. ويمنع منعاً باتاً التطاول على المسؤؤلين وأولهم كاتب المووضوع ...يا لبى قليبه
وكان معكم الناقد الفضائي (هجومي) وإلى اللقاء مع حكاية نقد جديدة وكشف حساب وزير آخر .. وتشير المصادر الى أني راح أنقد قريباً وزير يقرب للملك ويبدأ اسمه بحرف نايف (( حطوا رجلينكم الثور جاب العيد )).:8ar:
(الموضوع منقول)
<--------- يبعد الشبهه
بس قبل لا أطلع :-
برايفت إلى والدي العزيز :-
أمووت وأعرف ليش ماتكلمت الا يوم أنتهى المشهد ؟ كان بإمكانك تهاوش في منتصفه أو في بدايته لكن مدري وش سالفتك يا أبو صالح .. آآآآخ منك يامفتري :28ar:
مواقع النشر (المفضلة)