طمبق طمبق .. وعندي موضوع !
{ بسم الله الرحمن الرحيم }
,
,
طمبق طمبق وعندي موضوع
,
,
<<<<اوكيشن عندي موضوع
بس طمبق طمبق اتحدى احد يحلها خخخ
,
,
نقول اهلين ونمستي لبنات عالم حواء والدردشه وعلى راسهم ورووده غلا<<< توني مسنتره عند فلم هندي بس ياسفابوووه البطل توفى وخلى محبوبته تدوج في الشوارع لحالها تغني وانا اصيح معها
وفي خلال دميعاتي اللي قامت اتبطبط جراء الفلم دخلت علي امي
فقطعت علي اندماجي ورومانسيتيوروعتني بقولها ...لعنبوا ابلسيك لي متى وانتي مقابله ذالهنود ............ ... ... اهييي ياماما
بس مانقول غير الله يرحم ايام شيشا كابور واميتاب باتشا وايمااااا ديسكووو دانسااااااا... وأاااااععععععععععع << الصرخه اللي تجي باول الأغنيه خخخخخخ ياحليلكم يابنات احسكم ماتدورن وش انا عنه احكي بس لو عرفتوا ذيك الأغنيهاللي ينط فيها البطل عالمنصه وتسبقه صرخة حرمه تقول أاااعععععععععععع وبقوه ... عقبها يغني ايا م ديسكو دانسا
تقولي وشهو اسم الفلم .. اهو قديم مره يوم اشوفه كنت باول او ثاني ابتدائي وودي اشوفه ثاني بس مدري وش اسم الفلم << تراك مضيعه يافتاة هذا منتدى الزين مو قروب شاروخ
خل انكمل موضوعنا لايجروني مع شوشتي وسيده عالأرشيف انا وعيال كابور
اللمهم امي العزيزه قالت لي ترا الضيوف على وصول وهذي حزتهم يشرفون
فاقومي تسنعي والبسي قبل لايجون .. وفتحت دولابي الجميل المرتب والمنظم
حد الهستيريا .. حد التشابك ... فالبنطلون يقول فكي يابلوزه والبلوزه تقول فكي يافنيله انتي الثانيه واجلس انا وياهم مصارعه وانا افككهم عن بعض لي جيت البس
فترميني امي الحنون بنظرة كلها زئير ووعود وتقول ... هين ان ما وريت هالعفسه والدوسه ابوك
وقومي اختاريلي من بين هالعفسه فستان كله كشاكش من سنة السبلهشاريته لي بحدا هالأعياد .. ولا لبسته .. وتقول هالدريريعه بتروح موضتها وانتي مالبستيها البسيها اليوم
لا يامامامستحيل البسه وش تبين الناس يقولون .. بدويه توها جايتـ,ن من اسبانيا .... وماناقصني غير المهفه .. اغني اولييييييييه وارقص سمبا
ومع احترامي للفستان وموضته اللي عيت تنقرض في النسيم وطقته .. اقترحت انا على امي انها تعطي الفستان "سوتارمي " وتلبسه اذا جت تقدم العصير حق الضيوف
عشان يقولون وش هالناس الذربيين حتى شغالتهم مكشخينها >>> ماتدري ان نيتي شينه !
بس امويمتي الله يطول عمرها ماصدقت خبر وقومي وعطيه شغالتنا << ياحلاتها ذاك اليوم بذيك الورده اللي على الخصر .... حاقه ماحصلتش
ومن فرحة الفستان خلتني اطخ لها صورهتبي ترسلها حق ربعها مناك بجاكرتا يشوفون الورده
اللمهم انا تفرغت لحالي وجلست البس واجيك طيران حق امي بالمطبخ ابي احرها اشوي لوووول
ادري فيها مايعجبها شي البسه ..
ها اش رايك فيني ياماما ياحبيبي
وخلال استعراضي
مادريت الا بالبيز واصل بخدمة سفري على وجهي
بس اشوى انها مهيب حول الدله ولا كان صفقتني فيها :13ar:
وقالت الله ياخذ عمرك انتي ناويتـ,ن اتطيحين وجهي قدام الأوادم واتفشليني
.. وراه يايمههذا البنطلون وفيه زري على جمب .. والبلوزه شاريتها من محلات ماكدونالد لووووول<<< ابي بس اطمنها انها موضه وغاليه والا حركات الماركات ذي ماتمشي عليها
بس ماش برضوا الجنز ماجازلها وخذتني بتلابيب بلوزتي ام الماركه ولبستني عليها تنوره كتمت فيها حريتي وانطلاقاتي تبعتهم بخماخم في اذوني << اقصد حلق يععع ياشينه خصوصا اذا كان طويل
وكملنا الزينه بالكماليات وقالت فلي شعرك عاد وكديه وانثبري هنا لين اناديك
ودقت ساعة الصفر ونادتني امي الحبيبه
وقبل ما اطلع من غرفتي كتبت ورقه وعلقتها على بابي
" ممنوع الأقتراب , ترى اغراضي تحتها حيايا وعقارب وحشرات سامه تقرص
فابعد ياسوسه انت وياه عن غرفتي ..وللأهميه جري التحذير "
هذا تنبيه حق اخواني الملاقيف
ورحنا مع الوالده نقابل الضيوف وبدت عاد مباريات الكلام والمجاملات وسوالف الحريم اللي مالها اخر
وانا للحين ساكته ومسويه عمري يعني اني مستحيه... وبدت وحده تكلمني تبي اتجرأني ... وتسألني وش احب وش ما أحب... مسيكينه ما درت اني بنهد عليها كلي .. واشتغل عليها بهلوانيه واقولها اني هلاليه
وموتي افلام الكرتون .. وليتهم يعيدون لنا جنقر وسنان وفلونه
و اروق على قصص الجن وافلام الرعب وانا اكل الكاكاو واشفط الأسكريم وناويه ادرس تحضير الأرواح
والكورن فليكس اقرمشه بلا حليب لي جيت اقرا قصص بولسيه
الأدميه قامت اتبولع في ريقهابس تبسمت وقالت .. طيب وش تكرهين
واجيها كلبوني بعد .. وانا اقول
اكره شغل البيت وماطيق شي اسمه مطبخ وماستحملها ريحة الدجاج واللحم وهو ني مابعد طبخ
وديني ودين البزارين ولجتهم وازعاجهم
قالت انتي نباتيه ؟ ؟ قلت لا ... هوووو.... وش دخل اسمي بنباتيه وغير نباتيه
قالت لااا عشانك ماتطيقين ريحة اللحم .. قلت اهاااا.. لا عادي .. انا اكل ماجاني (مع ان ما احب اللحم ) بس اهم شي اللي طابخه غيري مو انا
قالت يعني تبين خدم وطبابيخ .... قلت والله نفضل ذلك بل نقدره
عقبها الحريم سكتوا وامي قامت تغمزلي وتهددني تبي تفلقني
ماتدري ان بنتها شابه تعيش بداخلها طفله صغيره تقول اشياء ويصدر عنها حركات طايشه وماهي متوقعه
اتمنى لو سمعت امي تقول لي في يوم
" ابنتي عيشي حياتك كما تودين
واستمتعي بطفولتك
فالطفوله اليوم حالة موؤده
وعندما يحين الوقت ستجدين نصفك الأخر
الأنسان المناسب الذي سيفوقك
حيويه وجمال
,
,
وليس خذوه فغلوه ؟!
وكالوردة تهدى لأول قاطف
اتمنى يا أمي ان تنزلي قليلا لمستوى
تفكيري الصغير
الى مستوى احلامي
وطموحي الذي يصل حد الجنون
فهل لكي الوصول كي تكبحي جماحه
بأرشادك وتفهمك
فمن دونك ينتهي كل الطموح "
واتحداكم ان عرفتوا من خربطتي شي او طلعتوا بشي
لكن للأستفسار او الأضافه او التعليق
يرجى المراسله عبر
com . عالم حواء @ طمبق طمبق
حفظكم الرحمن
سلام
وخدا هافز <<< بروح اكمل الفلم ههه
تحياتي وتقديري:
آهات الحب,,
رد مع اقتباس
مواقع النشر (المفضلة)