تحية عاطرة لكم.. متواضعة أتمنى أن تروقكم
شبيه الورد
الغرام اللي ذبحني شوق واحلام وقصيد
..... يبّس عروق السرور وكسّر اغصان السعاده
والهيام احساس ظالم كل ماينقص يزيد
.......... يربك انفاسي ويستمتع بتأثير الزياده
وانت عارف ما يذوب الصوت في وقت الجليد
......... يختفي تحت الشعور اللي يشابه للبلاده
والهوى طفل ن مشاغب طيب ولكن عنيد
............ يلعب فقلب المولع ويتلذذ في عناده
وانت تدري عن غرامك وش مسوي فـ الوريد
.......... مستحل الصدر كله ويتمشى في بلاده
تنحني ضلوعي لعرشه عشق و انفاسي نشيد
......... تحت إيقاع الفؤاد اللي يناجيك بإجاده
يا شبيه الورد جيتك مخلص وحرفي بريد
.......... تِعبت كفوف الأماني تعقد لحلمي مهاده
عايش ف دنيا طموحي مغترب دايم وحيد
.......... في ديار ن مالي فيها لاحزام ولا وساده
منهك التفكير صابر وانتظر شي ن جديد
.......... علها ايامي تجيب الحظ والخير وبراده
في ديار الملح جالس واتوجّد من بعيد
......... للديار اللي تعوّدها الكرم والطيب عاده
نجد يالبى ثراها كل شي فيها فريد
........ ناسها واحساسها والخير فيها والرياده
ليت لي فيها دقايق وانثر حروفي قصيد
....... يرتوي صدر المعاني فرح واحلام وسعاده
سلطان بن ناصر
مواقع النشر (المفضلة)