مـشـعـل .. وحـيــآت الـدلآخـــه .. + 11

[! .. مـشـعــل .. !]

السلام عليكم

مساكم الله بالخير ان كنتم صباحاً .. وصبحكم الله بالخير ان كنتم مسائاً ..!

قلنا نبي نغير من شكل المواضيع .. بدال صورة فلان ونكت ومادري وش بعـد .قلنا بنعطيكم موضوع طويل كتبناه وبيتعب ألي مايصبر .. .

ملآحظه / ألي عمره اقل من 10 سنوات لا يقرا الموضوع , لأنها ماتصلح إلا للكبار من 11 وفوق وقد انذررر من اعذررر

ورجائاً ياكاتم لا تعدل اي رد بين الأسطـر <--- بيسحبكم على وجيهكم علشان تقرون الموضوع برواقه خخخخ


نبدأ / ...

بيوم الخميس صحيت من النوم الساعه ثمان الصبح , واسمع قرشعة الصحون بالمطبخ .. ودخلت ولقيت اميمتي جالسه تنفخ وتعجن .. وقلت اميمتي وش تسوين .؟

قالت ابد ياوليدي .. رمضان قرب وقاعده اسوي بروفه .. مثل ما انت شايف هذي سمبوسه وهذي لقيمات وهذي كنافه وهذي وهذي ...

قلت يمه , وراه السمبوسه , شكلها كأنه واحد رافع ايدينه ويدعي .؟ قالت احمد ربك اهم اشي المضمون بالداخل ولا * يغرك الشكل من برا

قلت طيب اللقيمات , اخبرها شكلها مدور . وراه صايره طويله كأنه سناره وملتويه ؟ وبعدين كأني شايف شكله من قبل .؟ اييييه كأنه احد اصابع رفيقي جيتار

قالت امي وبكل ظرافه .. جيتار ولا مرواس .؟ وهي تكعه ضحك .. قلت بايخه يا اميمتي .. ولا عاد تذبين على جيتار لأ اخليه يهكر التجوري حقتس ونسرق ذهبتس<-- امحق ولد

قالت اميمتي .. مشيعل ماتلاحظ اني عطيتك وجه وضيعت وقتي الثمين معك .؟ قلت موب عاقله يابنت بيل غيتس .. ابوتس ماورثنا منه إلا سروال ولبسه ابوي ..

وزنوبه وحده والثانيه ضايعه ومسوين اعلان عنها بالجريده و ..... ما امدان اكمل هالكلمه إلا والملاس ناشب بوجهي وتشويت ظفر مع الباب

طلعت وألقى ابوي جالس بالحوش ويتقهوى ويغني مقادير يادرب العنا .. قلت مسه بالخيرر .. قال انثبر وصب القهوه ولا يكثر وانا ابوك

مد فنجاله باليسار وقلت يبه .. الاسلام يقول لازم تمده باليمين وحرام عليك .. مادريت إلا الفنجال ناشب بجبهتي .. وقال صب ولا تكثر حتسي لا اسوي حفله بوجهك ..!!

صبيت له فنجاله .. وقلت يبه .. قال وتراااب .. وش تبي .؟ قلت طلعت براسي فكره .؟ قال اسقها . وقام يتقلب من الضحك , قلت ياليل المصاله قال وش تقول .؟

قلت ابد .. عادل امام مايجي نصك .. قال ايه وانا ابوك والله مايجي نص تنكيتي .. إلا هو اعتزل عن الكوره وانا ابوك .؟ قلت بيني وبين نفسي هذا الشبل من ذاك الأسد: (

قلت المهم يايبه .. ابقول لك فكرتي .. قال اخلص الله ياخذك وعطنا وسوستك خل نشوف .. قلت .. انا قررت اني اتزوج . ونزلت راسي يعنني مستحي .

قال ( وهو يمسس شنبه ) والله ياوليدي , اننا نبي الفكه منك اليوم قبل بكره .. مير من ألي بايع بنته وبيزوجها واحد خبل مثلك .؟ !

قلت يايبه انا كـلي اناقه ووسامه , قال اي والله انك ناقه وبعدين تمسك ياكلينتون كروز لاتعذب البنيات وتمخش مشاعرهن .. قلت يبه اسمه كوفي كروز ..

قال كوفي ولا كابتشينو .؟ وتسدح ضحك من هالذبه الماصله ..!

قلت المهم يبه انا ابي اكمل نص ديني و فيه بنيه دايم اشوفها تكب الزباله , وبيتهم بآخر الحاره ... قال بنت سعيد آدم .؟

قلت اييه عليك نووور .. قال نور ولا المنتشري ؟ وقام يتكرفس من الضحك .. قلت بيني وبين نفسي صبرُ جميل : (

عاد على جيت امي ومن جلست وصبيت لها فنجال قهوه ..قال لها ابوي وليدك ناوي يتزوج وش رايتس .؟

قالت وهي ترقع فنجال القهوه بنفجال ابوي وعقب ماقال لها نخبك وقالت صحتك im5

قالت والله خله يخلص الثانوي ويدخل المتوسطه وعقب مايجيب شهادة الدكتوراه ويتوظف معلم شاورما , نفكر انه يعرس .. بس الأهم انه يكون نفسه

قال ابوي وهو يبتسم ,, ويلوموني فيتس على هالذكاء .؟ استحت امي وضربت على كتفه ونزلت راسها وقالت نعلمك بس , وانا وجهي صار تسذا -->

قمت من عندهم وطلعت للأستراحه ولقيت الشله يلعبون بلوت
قلت ياعيال خلونا نسولف شوي . قالوا سولف احد ماسكك .؟

قلت ياعيال وش رايكم نسولف عن قضية الشرق الأوسط .؟ قال صويلح الشرق الأوسط ولا الرياضيه .؟ وكعوها ضحك الشباب ,, قلت الله ياخذكم من دشير خل اطس لبيتنا بس ..!

دخلت غرفتي ووقت عند الدريشه وقمت أتأمل القمر ويعنني رومانسي :frown:
وقمت افكر وقلت ياولد مالك إلا تبتدي من بكره وتخلي اهل الحي ياخذون فكره زينه عنك وانك موب خبل ..

صحيت الصبح وطلعت لمسجد الحاره , ومسكت المايك وقمت أأذن بصوت شجي وعذب , ومن ألتفت لقيت وراي اربعة رجال عراض ,, قلت اقم الصلاة يا ابا انس جزاكَ الله خيراً !!

قال وهو يتنهد .. يامشعل ياحبيبي , ماتشوف الساعه كم ألحين .؟ قلت مامعي ساعه , ابوي باع ساعتي بحراج ابن قاسم وشرا له تتن قبل العام ..

قال والله البلشه , ياخي انت يبيلك شهار او نقلعك بأقصى ديره .. بس نفتك من شوفتك !! الساعه ألحين 10 ياحماار .. وشو اذانه ألي اذنته قبل شوي .؟ !

حسيت ان وجهي حمر والعرق بدى يصب , وقلت اذان العصر ولا تونا .؟ !

قال الثاني تعال تعال حبيبي لاتخاف ,, مسكني مع اذني وقال .. مزعج الحاره . والناس طلعت من دواماتها وألي سكر محلاته ومستغرب .. وانت تأذن للعصر .؟
وقام يمسطني بالعقال حقه ويحذفني على الثاني .. واخذوني بالدور وصرت كوره بينهم . إلى ماشوتوني مع الباب :(

مرت سبع سنوات وانا بالثانوي واخذت الشهاده بتقدير جيد ومكتوب تحت ملاحظه /

" ياخوي بلشنا بك . سبع سنوات وحنا ندفك بالدرجات مير انت دلخ ..!

ويجيك المدرس ويقول حط صح عند هالجواب وتحط على ألي تحته .؟ خلاص ضف وجهك.. مانبي شوفتك ابد ..

ناجح ناجح ياخوي بس ارحمني ترا وراي عيال وحرمه . تكفى لا تجننا معك " مع تحيات اخوك المديررر ..!

رحت وانا مبسوط واوري ابوي الشهاده وقلت يبه البشاره .. قال نبيعك بسوق الغنم , قالت امي لا لا بسوق الخضره ,,

وقاموا يتضاحكون وكل واحد ماسك قلاصه ومعبينه ديو , يقالهم خربوها وداخلين جو

قال ابوي إلا عقب الثانوي وش يجي .؟ الابتدائي ولا لا يا ام مشعل .؟ قالت امي وهي مدخله اصبعها * بالقلاص وتلحس اصبعها , والله يابو مشعل ماظنتي الابتدائي

ان ماخاب ظني .. انه المتوسطه .؟ قلت يبه .. يمه . يجي عقبها الجامعه او الكليه .. بس رجاءً لاتضغطون علي وتقولون ادخل الروضه <-- كملها

قالت امي شد حيلك وانا امك وخلص المتوسطه بسرعه خل نزوجك ونفتك من الصرفيه عليك . وافتك من غسيل هدومك ألي كأنه من عهد فرعون ومخيسه بالحيل ..!

دخلت الجامعه بتخصص مدري وشو بس الاهم اني اتوظف واتزوج واكمل نص ديني .. جلست ثمان سنوات والجامعه اربع سنوات .. وتخرجت الحمدلله كالعاده دفوني دف ..

وتوظفت مراسل بأحد المدارس .. وعزمت الشباب بحفله وجمعنا قطاوة الحاره بهالمناسبه وفليناها بالشارع عند قصر ابو ايمن , اكبر تاجر بالحاره , هما بيته كبير وحنا شعبي .؟

قلت يقالي ابهك على اخوياي وابقول هذا بيتنا بس فيه عمال يرممون عشة الحمام والدجاج ويحطون رخام <-- من زود النعمه قمت افسق بكلامي

رحت انا وابوي لبيت سعيد , نبي نخطب البينه .. والحمدلله تم الزواج والمهر كان علبتين تونه وكمونيه لأبو بثينه <-- زوجتي المصون :frown:

دخلت الطخمه بالغرفه وكانت مستحيه .. وجلست بجنبها بعد مافصخت البشت .. وقلت حبيبتي وخري الغطوه عن وجهك انا زوجك..!

ماش حسيت ان البنت كأنها ضاقت ,, وقلت عادي ياقلبي نزلي الغطوه خل اشوف الوجه الحسن والبشوش .. ابتسمت وبان على وجهها بياض كأنه جبنة كيري مصفوفه بجنب بعض

قلت لا والله اكلنا تبن .. اجل هذا وجهتس وانا من اليوم اقول وخري الغطوه ؟ .. قالت مشعل حبيبي اهم شي الأخلاق والجمال زائل , واستحت ونزلت راسها ..!

قلت ايه اهم شي جمال الأخلاق وإلا من زين وجهي انا بعد من اتريق عليتس .؟ قالت عارفه ياقلبي وجهك كأنه ربابه معلقه بجدار المجلس وقامت تكركر من الضحك

قلت ماشفتي خشمتس ألي كأنه واحد يقول مالي دخل .؟ قالت عاد خشمك انت ألي كأنه طفاية حريق بزاوية المدرسه وههههههههه حشرتووه بالذبه هاادي ..!

قلت اصبري , ماشفتي شعرتس ألي كأنه شعار السيفين والنخله .؟ ههههههههه حشرتس يالعبده <--- لزختني عقب هالكلمه بالكعب الزهري حقها

قالت هرام تجرح مشاعري واحاسيسي هراام عليك ,, وطقتها صيااح . قلت ياليل النشبه , واطلع جوالي واقرا ملاحظه ناسخها من موقع عن الكلمات الحلوه ألي تنقال للبنت ..قلت حبيبتي ودنيتي ومهجة تسبدي ويابعد كلوتي اليمنى , لاتزعلين مني . وابشري بألي يوسع صدرتس ألحين ويراضيتس .. :redface: ..

طلعت للغرفه الثانيه ورجعت ومعي طيران ,, وقمت اطق واغني .. يا اسود يا سواد الليل .. يالون المسك والعنبر .. شبيه المشتري والزين .. ومن حقــُه اذا اتكبر ..

وهي حطت اصبعها بفمها ونزلت راسها " يعنني مستحيه " وعقب مارجفت الطار ودخلت انا جو بعد .. ..

جتها ام العبيد وقامت تستنزل وقلبتها شكشكه قدامي وتهز خصر ورقبه ,, وانا ارجف بالطار وصح عليتس يالخاله , إلعب .. إلعب

انا من شوفتك ما امل يا اسود .. وحبك كل يوم يكبر... تدلل ياخفيف الظل يا اسود ... عليك احلى من السُـكر .. :24ar: ..

وعدى هالليل وسواده بهدووء ونمناا وهي تهز رقبه بالسرير كل ليلها .. ..

صحينا الصبح . ولقيتها ماسكه ورده حمراء وتقول حبيبي هذي وردة هُـبناا .. قلت انا وش بلاني بهالرومانسيه .؟

قالت ايش .؟ قلت ابد ياقلبي .. كنت اقول ليتني ورده بين اصابعتس خخخ
قالت انت وردة حيااتي ياحيااتي ,, امممطاااخ <-- بوسه غسلت خشتي

من افطرنا قالت حبيبي .. ابيك تقولي كلمه ... قلت كلمه ... قالت لا اقصد كلمه يعني من قلبك ..؟ قلت شلون كلمه من قلبي , اخبره تطلع من لساني .. قالت غبي !!

قلت وشوووو .؟ قالت لا ياحيااتي مافيه شي امممطاااخ ... قلت اخلصي وش تبين انتي ؟ قالت ابي كلمه قوويه تهزني هز وتخليني اصارخ واناقز !!

قلت مافيه خيارات طيب .؟ .. قالت مشعل عاااد .. قلت طيب تبين كلمه تخليك تناقزين ؟
قالت اييه .. ونزلت راسها يعنني مستحيه ..

قلت قربي جبهتس يابعدي خل اكسر البيضه .. طخخخ <-- صوت البيضه .. ايوا حياتي تقولين تبين كلمه ؟ قالت اييييييييييه

حطيت رجلي على الطاوله واقضم من البيضه وقلت طالق , قالت لاااااا لااااااا قلت وش بتس ياقلبي .؟

ماظنتي فيه اقوى من هالكلمه وتخلي الحرمه تهتز .. قالت انا عارفه انك ماتحووبني , يلا انقلع عن وجهي .. طرااااخ " البياله تحت خشمي "

ابطلع لبيت ابوويه .. قلت يابعدي خل نتفاهم طيب .؟ وصكتني بالبياله على جبهتي مره ثانيه ,, وقالت خلاص انت طلقتني .. قلت موب قصدي .. طيب نعيد الحركه بالبطيئ ؟ بثينه بثينـه !!

المهم .. تطلقت بثينه مني .. ورجعت لبيتنا وانا اجر وراي دلآختي .... لقيت امي وابوي جالسين على القناة الأولى ويناظرون مسلسل بدوي ..

ومشغلين المسجل على اغنية أليسا " اجمل احساس بالكون " .. قلت بيني وبين نفسي .. الله من زين الجو .. مسلسل بدوي وأليسا شلون تجي .؟

لو مشغلين اغنية نانسي عجـرم " اسمحيلي يالغرام " كان نبلعها .. ..

صبحك الله بالخير يبه ولاتهون امي .. قال ابوي عارفين انك مسوي بلاا ,, حنا ماقلنا لك انك موب وجه زوااج .؟؟ قالت امي وجه ولا مقفى وهههههههههه

عاد يقالي ابحرجهم وقلت هذا نصيبي من الزمن ويجب ان ارضى به .... قالت امي تعال انثبر ولا عاد تسلسف عليناا , يقالك شسكبير الألمعي .؟ !

قال ابوي .. تعال اجلس جنبي يا غازي القصيبي .. وخل نتابع المسلسل ومد كاسك اصب لك .. خربتها معهم وطحت بالديوو .. وقرقعنا كل وقتنا

قمنا نناظر المسلسل , وشفنا البطل انقتل وابوه قام يصيح عليه وامه تصيح .. وابوي وامي داخلين جو وطاقينها صياح معهم . وانا كملتها صياح وسمعنا الجيران طاقينها صياح

والحاره والديره وكل السعوديه يصيحون والشرق الأوسط وحلف النيتو والكونقرس طاقينه * بتسوه مثلنا وجورج الأب والأم ودبليو إف طاقينه صياح وكونداليزا رايس

نشفت المناديل بخشمها من الصياح وكوفي شوب عنان وشيراك خامين بعض وطاقينه صياح <-- ماتحسون اني تميصلت وشطحت بعـيد .؟ كله من تأثير الديو لا بارك الله فيه

نرجع للبطل ألي مات وابوه يصيح عليه وحنا نصايح معهم .. بلحظه خاطفه سألت ابوي وقلت يبه .. تخيل لو اني مكانه ومت ,, وش موقفك من الأمم المتحده .؟ !

تبي تصيح مثلهم او تسوي عزيمه واحياء كل سنه لذكرى مماتي .؟ قال والله وانا ابوك انت حشاشة جوفي .. وتكفى لا تسألني وش تعني هالجمله .؟ توي سامعها ونفسي اقولها ..

قمت من مكاني وقلت يبه يعني تحبني ؟ قام ابوي وهو يمسح دموعه وقال ايه احبك ,,, نقزت انا وخميت ابوي خمه قويه .. ورجفني على طول ونشبني مكان المزهريه .. ..

وقال ياحمار خل نسوي اكشن شوي .. ونقول كم كلمه مؤثره وكل واحد منا يطلع فوق راسه مربع ويتخيل الأشياء القديمه والذكريات ألي صارت ..

وإذا جا بكره نكمل الحلقه الأخيره وعقبها خمني واخمك ونجلس نصايح مثل هالمسلسلات ..!

مير انت حمار ودلخ . ماتفهم ولا راح تفهم .. قومي يا ام مشعل خل نلعب كيرم وعقبه ننام .. ورانا عزايم بكرره وعوار راااس ..!

جلست انا بمكاني اتحسس طبعة رجل ابوي ببطني .. وحالي يرثى إليه ..ومرت السنوات والشهور والأيام والساعات والدقايق والثواني <--- قلبت اوم الدعوه .؟!

بعد سبع سنوات تعبت نفسيتي , ابوي يقولي يالدلخ وامي دايم تذب علي .. وبثينه مادري هي ميته او حيه .؟ <-- حيه ولا عقرب .؟ <-- بايخه .. ..

قررت بأحد الأيام ان اكتب وصيتي وانتحرر واترك الدنيا ... كتبت ورقتي وكل قصت حياتي .. وجهزت الحبل وعلقته بالمروحه وبلحظه ..!!!!

دخل على ولد لونه مثل الحمار الوحشي ,, اسود ملقم بأبيض , كأنه كت كات طاح بقلاص حليب بالغلط ..... قلت سم يازول .؟

تبي مكان سفارتكم .؟ او توك طالع من شبكك بحديقة الحيوان ومضيع دربك.؟ اخلص ترا وراي انتحار وشغل ومرافس خخخخ

قال لي بابا .. اول مانطقها كأني اشوف زول بثينه من ورا الباب .. وبلحظه دخلت علي بثينه وقالت وهي منصدمه مشعل وش تسوي .؟

قلت ابد ابنشر الغسيل على المروحه .. يعني وش رايتس واحد ماسك حبل يعني بيصور معه .؟ اكيد بينتحر .. <-- ينكت وهو بيودع الدنيا.. ..

قالت تنتحر وتترك هــ الأطخم يتيتم وبدون اب.؟ قلت وشووو .؟ هذا ولدي .؟ قالت ايه ولدك عبسي .. اول ماطلع من بطني , نقز للدكتوره وقال باللهِ يالطخمه ماشفتي نامق .؟

وعلشان كذا سميته عبسي ... انا نزلت مني كم دمعه بس غرزت بمطبات خدودي .. وخميت ولدي عبسي ومن زود وناستي فيه علقته مكاني على المشنقه

بس اشوا تداركت امه الموقف وسحبته ... وطلعنا من بيت اهلي ورجعنا لبيتنا بعد ماتزوجتها مره ثانيه ..

واتفقت انا وبثينه اننا نربي عبسي احسن تربيه بشبك الدجاج والحمام .. وندخله كلية الطب اذا اخذ شهادة الإعدادي


"

وهنا نصل لنهاية مسيرة الشاب الأطخم مشعـل وحياته " الخياليه " ... ونتقبل آرائكم حول الموضوع .. هل هو مااصل وبايخ .. او يمشي الحال .؟

ان كان ماصل فكله من السهر ومواصلة 28 ساعه بالتمام ولا احد يلومن , لو تشوفونن كأني مقضم .. ..

"

بعد المشاوره مع احد الأخوان , يقول انه ماعرف بعض الكلمات من موضوعي فحبينا نوضحها لسعادة وجيهكم ..!

عاد شلون لو انا كاتب باللهجه القصيميه البحته .؟ .. كأني اشوف وجيهكم فاتحين على موقع ترجمه وتنسخون وتلصقون ..


القلآص = الكوب او الكاس وممكن نسميها ميداليه ذهبيه عادي ترا <--- براااا

لآ يغـرك = لآ يهـمــك ..!

بتسوه = صيـحه ..!

الوعد الصبح ان شاء الله .. ابطلع اغط بنومه عميقه .. ولا اوصيكم بالردود .. :frown: ..


اشوفكم على خيرررر ياحلووين ( F )

[نهر الـ ح ـب]

:

قريتـ ربع الموضوع ونزلت اشوفـ طول الموضوع طلع طوويـل وتحطمتـ

اذا روقت ليـ رجعـه

:

[كاتـم الآهــات]

ههههههههههههاي

مشعل بيه منزل موضوع بالصرقعه

لا لااااااااا موب معقووووووووول ابد ابد


لي باك موب صاحي لفصفصة الموضوع

[alzen57184]

مشعل خلصت الفصل الاول مع امك وابوووك

ويوم جينا على الاستراحة وبنت الحلال قلت بلاش ما بدهاش اقوووم اسوي قهوة وارجع للموضوووع


بس امك وابوك خوووووووش فله

لي عوده

[ღ حـَـلاااا نـ ج ـّــد ღ]

<-- قريـت المـوضوع كلـوهـ
لكن لي بـاك