[poem=font="Simplified Arabic,4,black,normal,normal" bkcolor="transparent" bkimage="backgrounds/18.gif" border="double,4,black" type=1 line=0 align=center use=ex num="0,black"]
يعني من قلّ المصايب صاب هذا الصدر ضيـق=ولاّ يعنـي مـن حـلاة الحـظ وعْلـوّ المكانـه
ذي حياتي من مضيقٍ .. في مضيقٍ .. في مضيق=ولو بحثت الصبر فيني ما أجـد للصبـر خانـه
عادتي .. لا ضقت ادوّر حضن وعيون الرفيـق=مشكله .. لا صار ضيقي منه واحزاني عشانـه
يوم قال: اسمح لي برجع وانت كمّـل هالطريـق=لازم تقدّر .. وتنسـى .. ننتهـي كـل ٍ وشانـه
قلت: صبرك .. يرحم الله والدينك .. ما أطيـق=ماني ناقص فوق جرح اقدارنا .. جرح الخيانـه
حاجتي لك حاجـة الأيتـام .. وايديـن الغريـق=طالبك طلبه .. تراني أعشقك .. صُون الأمانـه
وراح ما كنّـه سمعنـي والتفـت لفتـة طليـق=وقال: أخيراً ما بغينا .. وللفـراق اطلـق عنانـه
عندهـا أدركـت فعـلاً قيمـة الحـب العتيـق=وقلت: هذي آخرتها .. مـا تجـاوزت امتحانـه
ضيق صدر وجرح قلب ودمع عين ونشْف ريـق=هذا كل اللي جنيت ومـا قـدرت اجنـي حنانـه
أستر لنفسي أعيش بضنْـك واحـزان وحريـق=ولا أموت من القهر وتكـون موتتهـا .. جبانـه
طالما بيني وبين المـوت .. مـا حاجـه تعيـق=غير خوفي من غضب ربي وانـا مُسلـم ديانـه
يارقيق الشكل .. وش خليت لاحساسي الرقيـق؟=كود صدمه .. نارهـا نـار .. ولعانتهـا لعانـه
لا نويت امسح جميع اوراقي الأولـى .. أفيـق=وانصدم في واقعي المُزري وفي قسـوة زمانـه
مدري .. كنّّ الحزن فيني شاف له نِعم الصديـق=مدري .. يمكن كنت فعلاً كفـو للحـزن وتكانـه
والفرح .. كالثوب لكـن يبـدو انّـه مـا يليـق=دام لبْسه لايّ خاسـر مـا وراه .. الا الإهانـه
آآآه ياحزني ترفّق .. صاحبـك جرحـه عميـق=أشهد انّك يارفيـق العمـر .. طيّحـت الميانـه
مثلي مثل اللي يراهن خلْق ربّـي فـي عشيـق=والبلى راهن .. ويدري خاسر العشـق ورهانـه
ويعني من قلّ الخساير صاب ذاك الشاب ضيـق=يكفي .. لا هالوقت وقته .. ولا مكانه هو مكانـه[/poem]
....
منقول
مواقع النشر (المفضلة)