صلاامو عليكوم . < ما يقلد جنون ابد .. هع

طبعا كلكم تعرفون اني كاتب و روائي عالمي حصلت على عدة جوائز منها ::

1- جائزة نوبل للسلام في القفز بالزانه لثلاث سنوات متتالية .

2- في عام 1919 م حصلت على جائزة ابو عرقوب لافضل قصه قصيرة تتحدث عن مشكلة الفقر فالشعوب الاستقراطيه ..
و كانت القصة بعنوان " لا تأكلوا دراهم الضعيفين هم يعاقبكم رب العالمين " وقد ترجمت هذه القصة لاربع طعشر لغة حيه منها اللغه العربيه و اللبنانيه و السعوديه و الكويتيه و المغربيه

3- في عام 1325 هـ تم تعييني بمنصب لواء في الجيش المغولي يعني رفيق جنكيز خان الروح بالروح لدرجه اني كنت اعطيه الشورت حقي يلعب فيه و يرجعه طبعا" عقب ما يغسله و ينشفه و يجيبه لي ناشف

4- في القرن الخامس عشر تصادمت انا و رئيس الدنمرك عند اشارة حي السويدي و الحمد لله ان ربي ستر و الا كان تشوفوني لا هالحين منوم في مستشفى الشميسي خاصة اني صافقه و انا ما لمست الفرمل خير شر

المهم

هذا جزء بسيط من سيرتي الذاتيه و اللي يحب الزياده يقرى كتابي " مسيرتي فالحياه نظرة و نظرة " و هو يباع في جميع المكتبات العربيه و السعوديه < فرقت يالافدغ



نبدا قصة ( البنية التحتيه لعش الزوجيه )
والقصه عباره عن تسجيل حصري للخطوة الاولى لدخولي عالم الحياة الزوجيه و هي ( الخطبه )

طبعا العنوان كاتبه بعد دراسه مستفيضه و اتمنى ان ماحد يسألني عن معنى ( البنيه التحتيه )
اما كلمة ( عش الزوجية ) فهي مأخوذه من كلمة ( عش ) و العش مأخوذ من كلمة ( عش البلبل ) وهي طبخه معروفه


.

مالكم فالطويله <<< اي طويله عقب ما استلمتهم ساعه فالمقدمه

قمت من النوم في احد الايام و انا أحك جنوبي واحك راسي
و كالعاده اذا انت توّك قايم من النوم لا تستغرب اذا شفت جنبك بطانية طالعتن من تحتها كرعان

لانها بتكون يا كرعان اخوك يا كرعان واحد من عيال عمك جاي يتلحط عندكم كم يوم وكاذبن على اهله يقول بروح ادور و ظيفه و بجيكم

قلت انا هالحين الى متى وانا على هالحال ليه ما اقوم في يوم من الايام والقى بدال هالكرعان كرعان ارق وانعم يعني

ليه ما اتزوج و اغير حياتي و اصير فرد من ضمن افراد المجتمع << قبل الزواج الواحد يعتبر سطل بويه < ابوك يالفاهم ..

المهم
كن السالفه جازت لي و دخلت مخي
و انا اذكر اني مبطي شاري لي شريط اسمه " كيف تصبح قائدا" احسن قائد "
يقول المؤلف اذا اردت ان تصبح شخصا" قياديا" دق الحديد و هو حامي و نفذ قرارك على طول و خلك رجال < هذي طبعا" من عندي المؤلف ما قال خلك رجال

وافز و البس قميص النوم واروح يم اوميمتي لاقيها تقهوى فالصاله
انا : صباح الخير يا احلى ام فالدنيا وانا مطلع يدي من ورى الباب معي ورده << يقال لي اني تغيرت و صرت رومنسي
امي : وش قومك هالحزه مهيب بالعاده ؟
انا : مامي بدي بوسه <<< استخف الرجال
امي : مبيريك < دلع مبارك .. انت طايح على راسك من فوق السرير مثلك كل يوم ؟
انا : لا والله يا اميمتي بس انا اليوم بدي تعطيني بوسه < يعني اني ما سمعت ذبتها علي لان راعي الشريط اللي قلت لكم يقول لا تلتفت إلى النقد الموجه اليك
امي : اقول اعقل و خلك رجال وش عندك اليوم قايم بدري ؟
انا : يامه تعرفين ساره بنت عمي ؟
امي : ايه اعرفها وش فيها ؟
انا : تراها بنت عمي < على بالي امهد للموضوع
امي : احلف
انا : و الله
انا : طيب بسألك تعرفين البيت الأخضرالكبير اللي جنب بيتنا
امي : ايه اعرفه
انا : تراه بيت اهل ساره << يا ليل مش فايت
امي : الحمد لله و الشكر بس
انا : طيب سؤال اخير لو سمحتي << اقولكم صايرن ذرب
امي : فكني من اسئلتك اللي كنها و جهك خلني اتفرج فالتلفزيون و اتفرج في ذااللي يطبخ عزالله يطبخ احسن منك ما قعد قدر في البيت ما شلوطت جنوبه في روضة خريم انت وخوياك
انا : سؤالي يقول وش الشيء اللي تتمناه الام لولدها مو ودها انها تشوفه بالبشت اذا جاء زواجه ؟
امي : تناظر فيني بنظرة مدري وش تبي بس اقطعوا يمناي اذا ماهي تقول بينها وبين نفسها " الولد هذا لا يكون شافط الكلوركس اللي في المستودع "

طبعا" انا مهدت للموضوع و هالحين ابي ادخل مباشره << امحق تمهيد
قلت اسمعي يمه انا قررت اتزوج ساره بنت عمي و ابيك تخطبينها لي و ترى ان ما خطبتيها لي بجلس على كبودكم ولاني متزوج حتى لو تزوجوني نيودلهي << يقال لي جايب اسم بنت مغنيه اجنبيه مشهوره ..

قالت هذي و الله الساعه المباركه يا وليدي و الله انها اول مره احس ان فيك رجاء
قلت لا لا خلاص تراني نويت افتح صفحة جديده و اعشعش مثل الرجاجيل .!

طلعت امي تصلي الظهر وانا جلست احوس في الدولاب ابي اطلع البشت حق ابوي << يقال لي اسوي بروفه
رجعت الوالده و عيونها مغرورقه بالدموع عقب ما شافتني طاقن بالبشت و الطاقيه وقاعدن الف في الصاله
عاد الله اعلم هي دموع فرح و الا دموع حزن خاصة عقب ماشافتني لابسن البشت و مطلعن رجيلاتي مع كموم البشت كني لابسن شورت << امحق عريس

المهم الوالده جعلها تسلم تحمست و راحت العصر لبيت عمي بتفاتح ام العروسه فالموضوع
انا شفتها طلعت منّا و انا اللي انقز و اطلع فوق الصطح ماخذن كل ( المحاقن ) اللي فالمطبخ عشان اسمع الصوت زين
المحاقن = جمع محقن و هو عبارة عن محقن صغير يستخدمونه لحقن المياه من الجراكل الكبيره للجراكل الصغيره << امحق شرح


طلعت فوق السطح و ملزق المحقن فأذني و اتسمع في بيت اهل ساره
شوي الا كني سمعت صوت بنت تقول " الراي رايك يا بابا "
و انا اللي اجيك صافطن الطبلون نازل مع الدرج وششششششششششش < هذا صوت الهوا
و انزل تحت الا و ذا المصري حق مزرعتنا جاي ينزل سطول الرطب عند الباب قلت يا مرحبا يا مرحبا
قال : اهلين وسهلين ازيك يا لا
قلت : انا الحمد لله بخير اقول انت فاضي ؟
قال : ايوه فاضي عاوز ايه
قلت : ودي اغني و مافيه احد معطيني وجه
قال : الله الله اي ده دنتا طلعت واد رومنسي بشكل
قلت : اسمع اسمع
( مباركين عرس الاثنين - ليلة ربيع عين قمرا .. واللي جمع بين قلبين .. الله يطول في عمره )
قال : بس بسسسسسسسس يخرب بيتك و بيت القمرا بتاعتك

و اجلس انوقز فالبيت
وشوي و ينفتح الباب الا اميمتي داخله قالت مبرووووووووك مبروك البنت وافقت
قلت : وييييييييييييين انتي قديمه انا سامعها على الهوى مباشره

قالت : و الله ما تخلي خبالك اكيد طالعن بالمحاقن فوق الصطح مثل كل مره
قلت : قسم انها آخر مرررررررره

المهم
قلت وش اسوي يا ولد
لازم اصير ذرب و اهنيها بهذه المناسبه لاننا صار بيننا عيش و ملح و محاقن و فالمستقبل بنعشعش سوا

وش اسوي وش اسوي
قلت بسسسسسسسسسس
ما فيه الا اني اكتب لها خاطره تعبر عن مكنون صدري و ارسلها لها عشان تعرف اني نعم الزوج
و اقوم و اطلع القلم و امصع ذيك الورقه و اكتب :

( زوجتي العزيزه و ابنة عمتي التي لم تلدها امي :
اكتب لك هذه الكلمات و انا احس ان ودي اناقز من الفرحه لانني و بكل صراحه مستانس و من كثر الوناسه و دي اصطر لي واحد بس للحين مدري من .!
زوجتي العزيزه دعينا من التنظير فإنه لابد من احلال عملية السلام و السعي في رقي الامم و حل عقدة النزاع بين الشعب الفلسطيني << الجمله ذي زارفها من جريده الرياض بس ابي اوريها انها ماخذتن واحد مثقف
واخيرا" لا اقول لك وداعا" ولكنني اقول لك :
و الله ان اطلع لك في كل زاوية مثل الجني و ان انشب في حلقك

والسلام عليكم ورحمة الله وبركاته
صديقك المخلص :
مضيق هرمز << يعني اني جايب اسم غربي )


وقعت تحت الرساله و لفيتها في سجادة الصلاه حقت الوالده و نويت ارسلها لها بس السجاده ما تنفع
بيكشفونها
و اطلع بالرساله الا وذا اخو ساره الصغير قالت سليّم تعال يا حبيبي
قال : لااااااااااااا تبي تهبدني على رقبتي مثل كل مره
قلت : افااااااا و اطلع البوك و اشر له بالريال و يجي طاير قلت اول شيء لف لف و عطني ظهرك
قال : بتهبدني ؟
قلت لا افا عليك و اعطيه الريال و هو يلف و انا اطلع الدباسه من مخباي و انا ادبس الرساله في فنيلته من ورى قلت يالله توكل على الله و رح لبيتكم و علم اختك ساره ان الريال من عندي و اني بصير من اليوم و رايح في مقام ابوك ..

وصلت الرساله بحفظ الله و رعايته و البنت استانست خاصة عقب ما قرت ( مضيق هرمز )
و استمرت رسايل الغرام و الشقا على سليم جعله يسلم

و بكذا انتهت قصة الخطبه
انتظروا الجزو الثاني رمضان الجاي << راعي طويله

فالجزو الثاني :
1- سالفتي مع اخوها الصغير اللي خذا مفاتيحي و لا رجعها
2- سالفتي يوم شفت ساره بالعبايه مارتن من عند بابنا
3- سالفة يوم عزمونا للفطور في رمضان

و المزيد المزيد

ومضه ::

تم فتح باب التهنئة بمناسبةالخطبة < نصاب ما خطب أصلا



ومضه ثانيه ::

للأمانه .. فكرة الموضوع وبعض النطلات مقتبسه من كاتب في منتدى آخر ..