السلام عليكم ورحمة الله وبركاته
كيفكم كل ابوكم
عساكم طيبين ،،، انا الحمد لله بخير وعافيه " من سألك انتي "
بخش في الموضوع دغري ((مو من عندي سامعتها في مسلسل سوداني ))
هذا الله يسمنكم مره من المراريت كنت جالسة عند التلفزيون واطالع قناة اليمن ومنسجمه جدا جدا
جتني الشغالة تقول (دلوعه دلوعه يالله قوم بابا يبغى انتي " مدري وش بلاها تنافخ " )
قلت وش يبغى قالت ما ادري هو قاعد يسوي حوسه في مستودع هو يطلع كل شي برا هذا في واجد مشكله تغقر يللاتهاى يء تيسلا مهسيبل " جتها ام العبيد "
انا : خلاص خلاص بروح له الحين روحي يالله
رحت لابوي ومثل ما قالت الشغاله لقيته يحوس في المستودع وعافس الدنيا ودار بيننا هذا الحوار
" متعوب عليها ذي "
انا : نعم ابوي بغيت شي " مسويه مؤدبه "
ابوي : وين امك
انا امي رايحه عازمتها جارتنا ام محمد اليوم مجتمعين عندها الجيران
" على فكرة الجيران مسوين دورية كل يوم عند وحده تعزم ام علي وشغالتها اللي توها جايه "
ابوي : طيب وين اخوانك
انا : نسيت يا ابوي انهم رايحين استراليا مدري بريطانيا يشجعون المنتخب
ابوي مازال يحوس في المستودع : طيب وين ابو جلمبو
انا : حسن ارسلته للبقاله يجيب اغراض
" على بالي يسالني عن السواق لانه سواقنا اسمه صعب مره ما اعرف انطقه وانا مسميته حسن على اسم سواقنا اللي قبله "
ابوي عرف اني ما فهمت : وين العده اللي فيذا
انا : هذي هي ،،، كانت موجوده عند الباب على طول والوالد الله يحفظه له ساعه ونصف وخمس دقايق وعشر ثواني وخمس طعش جزء من الثانيه يحوس قلب المستودع فوق تحت وما شافها الله لا يعمينا قولوا امين
ابوي اخذ العدة وطلع منها شي كبير لونه احمر وقال يا دلوعه تعرفين هذا وشو
قلت لا ما ادري قال هذا ابو جلمبو ،،، عاد انا قعدت ساعه اضحك على نفسي تذكرت يوم يسالني عنه وانا على بالي السواق
عاد انا بصراحه رسخ اسم هذا الشي في عقلي اخذته من ابوي وقعدت اقلب فيه يمين وشمال واتمقل فيه زين قال ابوي وش فيك تقلبينه كذا قلت لا بس شكله غريب اخذه ابوي مني وراح يفك ويربط في المغسله (( مسوي يعرف ))
انا رجعت ادراجي " هذي عاد سامعتها في مسلسل يمني"
رحت عند التلفزيون وحطيت على قناة المستقلة وقعدت افكر في ابو جلمبو وافكر وافكر رجعت لابوي ولقيته عافس الدنيا وكاسر الحنفيه والمغسله يوم توهق راح بيجيب سباك عاد انا لحقت عليه قبل لا يطلع وقلت له ،،، ابوي لحظه بسالك سؤال قال هاه وش عندك قلت الحين ابو جلمبو هذا وش اسمه قبل لا يجيه ولد ؟؟!! ابوي ما رد علي طلع وسكر الباب،،،،،،، لكن انا ما اقدر لازم الاقي جواب رحت اتصلت على بيت جدي والحمد لله هو اللي رد علي سالته نفس السؤال لكنه مارد علي قام سكر السماعه في وجهي مير اقوم وادق على عمي واساله قال الله يهديك كم مره قايل لك لا تسهرين توني بقول له اني والله ما سهرت بس ما لقيته الا مسكر السماعه في وجهي
انا عاد مسكت معي ليش ما يبغون يعلموني وش اسمه اكيد فيه شي
قمت ما خليت احد اعرفه الا ودقيت عليه علشان اساله لكن ما لقيت جواب
بعدين قلت بس ما يبيلها الشرطه في خدمة الشعب وادق على ثلاث تسعات ويرد علي واحد يا انه توه قايم من النوم وحالم بزوجته او انه توه متاطق معها في التليفون
عاد انا في البداية خفت بس قلت ياله تشجعي واساليه يمكن يكون عنده جواب يوم سالته قال " اسمعي يا بنت قولي لامك ترفع التلفون عن البزران " وسكر السماعه (( لا تعليق ))
يالله وش اسوي كل ما اسال احد يتهرب مني ولا يعطيني وجه ما عدا ابو صالح راعي البقاله اللي بجنب بيت جدي هذا يوم سالته قال والله يا بنيتي مدري لكن واصلي البحث عن الجواب وبنحط جائزه للي يجيب لنا الحل وهي قسيمة شراء من بقاله ابو صالح بقيمة ريالين الا ربع عاد انا شكرته علشانه رفع من معنوياتي وقلت بس ما فيه الا اني اعلن عن هذا السؤال والجائزه اللي حاطها ابو صالح في المنتدى ان شاء الله نلاقي الجواب الشافي " برضه متعوب عليها "
مواقع النشر (المفضلة)