![][ جادر في صقاع ][ غير متصل](images/statusicon/user-offline.png)
مهــمة خاصة :: في الربع الخــالي ::..
السلام عليكم ..
تغطيه خاصة من قناة الزين الفضائية لقصة بين القبائل في الربع الخالي ..
في احدى الليالي العجاف وفي ربوع بحر الرمال في الربع الخالي كان الشيخ جنون يعيش مع عشيرته اللي كل العالم تطور الا هالعشيره تصدقون عندهم دش وجوالات ودي اس ال
الشيخ جنون كبير بالسن وبالعافيه يشيل حاله ( عمره 24 سنه بس <---- بيتصفق ) وعاش هالشيخ عيشه ملحطه كل يوم والثاني يغزووونه عرب الشيخ كاتم وياخذون نياقهم وسياراتهم وذهبهم وجنون واعزتي له ما غير يتوعد ويهايط ويقول الايام بيننا وبكره تندم يا قميل
مرت الايام وتزوج الشيخ جنون بنت يقالها صبحه واول ما اشتعلت الدحه بالعرس يغزيهم الشيخ كاتم وربعه اللي كنه لاقطهم من البطحه ويسرقون بشت جنون وياخذون اخته ساحبه رهينه وارسلوله مسج اس ام اس يقول ( يا جنون الزلابه تجيب لنا مليون دينار عراقي ولا ودع ساحبه <---- شف ام الطموح مليون دينار عراقي ) وجنون محتار وش يسوي هو مجمع له اربع ملايين دينار عراقي وصرف ثلاث ملايين وبقى مليون واحد بس والحلال اللي عنده كله انسرق من كاتم وربعه وش السواه يا جنون .. وش السواه يا شيخ الشيوخ ( امحق شيخ )
قفلت الدنيا بوجهه وما عرف وش يسوي حط يده بجيبه وطلع باكيت دفدوف اصفر وولاعه وتوصل انه يعطيهم المليون الباقي ويردون له اخته ويعيشون على الفقر اللي هو فيه
قام وفتح جواله وارسل رساله للشيخ كاتم يقول ( خلاص المليون لك وهات البنت .. ويا جعلك ما تحدرهن يالاشهب ) ودايركت الشيخ كاتم ارسل ساحبه مع حدا العبيد واخذ المليون وعلى طول راح لمكتبة جرير وشرا لابتوب توشيبا الجديد اللي كان يحلم فيه من يومه بزر (( انترنت والتسذب واجد .. ورا ما نطلق عناننا )
مرت السنين والشيخ جنون منقهر من كاتم وربعه الحراميه واخته كل يوم والثاني تعايره لو بك خير كان ذبحت كاتــم ولو ..... ولو....... وهو المسكين ما يقدر يرد عليها ( ترا شيخ على نياته وماله بالشر وقال يا بنت الاجواد مقدرلهم لحالي خلي عيال اخوك " قصيمي وخجوول " يكبرون وراح ياخذون بثار ابوهم ...... قصيمي وخجوول عمرهم كان 8 سنوات وهالبزرين مأذين العشيره كلها يوم يضربون ولد فلان ويوم يكسرون قزاز سيارة فلان الين ما انغثوا الناس منهم وجو للشيخ جنون بتضف عيالك ولا شلون الشيخ جنون ابشروا والله لا اربطهم ( شيخ مش حالك ) ومسك عياله وربطهم بعمود بيت الشعر وجلدهم جلد مو طبيعي ( رجولتك ما طلعت الا على بزارينك يا شيخ ) وقصيمي وخجوول من كثر ما انجلدوا ما عاد يحسون وما يهمهم وفكهم ابوهم بعد ما غسل يده منهم وبعد ست سنوات كبروا قصيمي وخجوول وصاروا اكبر عرابجه بالعشيره وشرالهم ابوهم كامري وقعدوا يفرون على بيت جارهم يخبرون عنده بنت مزيونه
الشيخ كاتم كذلك تزوج وجاب ولدين " حيران وتك تك " بس عياله كانوا نعومين مره ومالهم بالشر وسوالفه .. حيران كل همه انه يسمع اغاني عزازي اول بأول وتك تك كان همه كله بالدنيا شعره الاشقر < ولاحظتو مؤخرا انقلاب تك تك للنعومه والشيخ كاتم مو مقصر معهم يجيب لحيران كل شهر اشرطه عزازي وتك تك يجبله كل يومين غرشة جل وزيت زيتون وما كان يظن ان الشيخ جنون وعياله بيردون كل شي اخذه كاتم منهم وعاش باقي حياته احلى حلاوه ووناسه وما كان يفكر بشي اسمه الشيخ جنون وظن انه خلاص عقب ما خطف اخته بليلة عرسه كسر عين جنون وما يقدر يجيه ما درى انه جنون مدبرله سالفه وبيغتاله فيها ..
عيال الشيخ كاتم كبروا بعد بس على حطة يدكم للحينهم واحد كمخه والثاني نعوووم حده بيوم من الايام جا تك تك وقال يبه ورا ما نروح للحلاق التركي اللي بطرف القبيله ترا اطراف شعري غثتني امشط لها ولا يفيد ترد تصير فلافل قال طيب الحين يجي اخوك من محل التسجيلات وناخذ السياره ونروح ... حيران وقتها كان بمحل التسجيلات قاعد يتهاوش مع اليمني راعي المحل
حيران : اقولك انا سامع ان فيه شريط لعزازي يغني مع نانسي عجرم وشاكيرا بمهرجان الاوسكار اليمني
اليمني : قني يشلك ياخي انا ما عندي هذي الاشرطاه انقلع من مخي ولا بدق على الهيئه واقولهم هذا قاي يدور افلام اباحيه عندي
بلع العافيه حيران وهج لبيت ابووه ويوم قرب للبيت قام يفحط ويخمس ويسحب جلنطات .. يعني زعلان ويوم شافه ابوه يحسب انه بيضربه قام الشيخ كاتم وسوى حبتين يا حيران ( عاش معزز ) ويوم وقف قاله وش فيك حورور قال مافيني شي بس متضايق من حاجه الشيخ كاتم ما درى عنه قاله عمرك ما رضيت ويروح هو وتك تك للحلاق التركي علشان يحلق لتك تك فرزاتشي
وبحدا الليالي كان الشيخ جنون جالس مع عياله ويسولفون عن الاسهم وجنون ما عندك احد يهايط على عياله يعني شوفوني اعرف بالاسهم قام ولده قصيمي وسأله : قال يبه الحين انت شيخ ولك هيبه بين العربان .. وراك حافي منتف ما عندك الريال الشيخ جنون توهق بالسؤال المحرج ووجهه قام يعطي الوان قال يا ولدي لا تقلب المواجع انا قبل نياقي كانت كثر الهنود بالبطحا يوم الجمعه بس غزاني واحد الله يسامحه واخذ كل حلالي وقعدت على الحديده .. لا حتى الحديده شالوها من تحتي قصيمي : ومن اللي غزاك يا يبه والله لا اجيبلك راسه الحين قال عرب الشيخ كاتم ... قصيمي: كاتم اللي عياله حيران اللي ما غير يفر بالسياره وتك تك الناعم قال وانت وش عرفك فيهم قال درسوا معنا بالروضه يبه قام الشيخ جنون ونفض يده وقال ياعيالي هذا انتم كبرتوا الحين وابيكم تردون لي حلالي وتاخذون بثاري .. قاموا عياله ثنينهم وبصوت وااحد ابشر يا يبه وحنا عيال صبحه بنت ابوها ( ما ينلامون يوم ينتخون بأمهم ... ابوهم شيخ نص كم )
وقاموا العيال وفكروا كيف بيردون حلال ابوهم ولقوا فكره انهم يخطفون عيال الشيخ كاتم ويطلبونه فديه وراحوا يتمشون بالبر ويلقون تك تك الناعم .. قالوا هلا بالاطخم هلا تك تك : تبون اوقعلكم قالوا لا .. حنا جايينك نبي نقولك عن زيت للشعر .. ينقاله زيت الحشيش الاخضر .. يقولون انه يطول الشعر وينعمه ويخليه زي شعور الحريم قال احلفوا .. قالوا هاه انت تعال الليله هنا وحنا بنجيبلك الزيت وندهنك فيه بعد اذا تبي قال تم ..... وجت الليله الموعوده وجا تك تك بنتظرهم ويوم شافهم قال يا هلا باللي لفانا من بعيد ويجونه عيال جنون ركض ويمسكونه ويربطونه ولعنوا خامسينه بالضرب ( ترا ضربهم ما كان بعجاري ولا سكاكين ... ضربوه بكرتونة فاين بحكم ان الولد ناعم ) واخذوه لخيمة ابوهم وقالوا هذا الناعم يا يبه وبكره بنجيبلك الولد الثاني .. قالهم اخوه قولوله ان عندكم اشرطة لعزازي ويجيكم الولد يزحف << ونعم الأخ
ويروحون ثاني يوم ويلقون حيران يفر عند مدرسة البنات قالوله لا يفوتك ترا عندنا شريط لعزازي يغني دويتو مع نانسي عجرم وشاكيرا قالهم احلفوا .. قالوا افا ما تصدقنا يعني قال : الا ولو ... قالوا خلاص تعال بالمكان الفلاني الليله وبنجيبلك الشريط ومعه هديه ستريو سوني وراحوا وتواجهوا بالليل ومسكوا حيران ووكلوه تبن وضرب وكل شي وخلوه يغني آه يا ليل بصوت عزازي وربطوه بجمب اخوه الخكري ببيت الشعر ... الشيخ جنون انهبل من اللي سووه عياله اللي كان يظن انهم يطلعون رخوم عليه وافتخر فيهم وقال بقى الراس الكبير ان جبتوه لي ازوجكم واخليكم شيوخ بدالي قالوا ما عليك يبه .. وحط يده بجيبه وطلع باكيته وولع زقارته وروق .. وارسل للشيخ كاتم مسج ..( ترا عيالك الكمخه والناعم محجوزين عندي .. رد الحلال اللي اخذته مني ولا ترى بيروحون بخبر كان )
كاتم يوم قرى المسج ما سكت وجمع رجال قبيلته كلهم وهجموا على عرب الشيخ جنون ... وجنون ما فاتت عليه ان كاتم بيغزيه بنفس اللحظه فكان حط جاسوس بحارة الشيخ كاتم من قبل كذا بيوم وكان ينقلهم الاخبار اول بأول ويوم اقبلو على الشيخ جنون .. راح الجاسوس وعلم الشيخ جنون اللي قال لعياله ... خلوكم عند باب الحاره ( قمت اخلط ) واطرحوا اللي معه كلهم واذبحوهم الا كاتم ابيكم تجيبونه حي وراحوا قصيمي وخجوول عند الباب ويوم هجموا عليهم كاتم وربعه ذبحوا القبيله كلهم لحالهم <----------- انواع الارانب ... ومسكوا كاتم وجروه لبيت ابوهم جنون وحاول كاتم ينحاش منهم وقالوله وين على الله يا عم قال ابروح اتسوق بجيان .. شرايك يعني ابنحاش .. وهناك قال جنون اخيرا يا كاتم انا وانت وجه لوجه سمع كاتم صوت ولده تك تك يصيح والتفت قال ولا يهمك الحين افككم وانا كاتم ولد أمي باللحظه اللي كان فيها كاتم ملتفت لولده اللي يصيح الشيخ جنون صفقه على علباه (العلبا = اسفل الرقبه ) وكرووها ضحك قصيمي وخجوول على حركة ابوهم وقالوا مدري متى بيكبر ذا البزر واخيرا انكسر راسك يا كاتم ..
بعد ما طاح راس كاتم .. مسكوا الشيخه قصيمي وخجوول بدال ابوهم وتزوجوا وصارت لهم هيبه اقوى من هيبة ابوهم وكاتم صار يشتغل في البطحا وتك تك وحيران صاروا يشتغلون كاشيير في كارفور
وتوته توته .. خلصت الحتوته
اعذرونا على القصور .. ومعليش اذا فليتها شوي بس حنا بالصرقعه والزعل مرفوع
الموضوع أوب كله من عندي يعني معليشي بعض الشي مقتبس أو نقول 80% مقتبس < اجل وش باقي يالاشهب ..
مواقع النشر (المفضلة)